Moskvada mətbuat konfransında xarici işlər naziri Ceyhun Bayramov bəyan edib ki, Rusiya Qarabağın status məsələsini sonraya saxlamaq mövqeyindədir və bu, bizim üçün qəbuledilməzdir:
“Sirr deyil ki, Rusiya tərəfi Qarabağın statusu ilə bağlı məsələnin gələcək illərə qalmasını təklif etmişdi. Hər bir tərəf təklif verə bilər. Biz öz gündəliyimizə, təkliflərimizə əsaslanmalıyıq. Biz ilk gündən bu təklifin qəbuledilməz olduğunu bildirmişik. Biz baza prinsipləri üzrə danışıqlar aparırıq. Azərbaycan yalnız öz milli maraqları çərçivəsində addım atır”.
Maraqlıdır, Rusiya bununla bağlı Azərbaycanın mövqeyini bilə-bilə nə əcəb indiyə qədər belə bir mövqedən əl çəkməyib və Moskvanı belə bir mövqedən çəkindirmək üçün nə etmək lazımdı? Doğrudanmı Rusiya anlamır ki, Azərbaycan Qarabağın status məsələsi deyilən bir məsələnin yenidən gündəmə qayıtması ilə razılaşa bilməz? Rusiyada inanırlarmı ki, bunu təzyiq vasitəsi ilə Azərbaycana qəbul etdirəcəklər? Ya hansı bir məntiq çərçivəsində Rusiyanın siyasi dairələrində belə bir inam ola bilər ki Azərbaycanı nə vaxtsa buna məcbur etmək olar?
“Kreml bunu süni şəkildə gündəmdə saxlamaqla hər iki ölkəni təzyiq altında saxlamaq istəyir”
Məsələyə münasibət bildirən Yeni Yol Partiyasının sədri Ramil Hüseynovun fikrincə, Rusiya ona görə status məsələsini sünu şəkildə gündəmdə saxlayır ki, Qarabağ məsələsinin birdəfəlik həllini istəmir: “Əvvəla, 2022-ci ildə Ermənistanla sülh sazişinin imzalanacağı ilə bağlı gözləntilər özünü doğrultmadı. Prinsipcə, bu gözlənilən idi. Ən azından ona görə ki, Fransa nümayişkaranə şəkildə Brüssel formatını pozdu. MDB başçılarının son sammitində də Bakı və İrəvan arasında sülh müzakirələri aparılmadı. Çünki Ermənistanla Rusiya arasında konfrontasiya getdikcə dərinləşir. Paşinyan hakimiyyəti Qərbdən dəstək alaraq açıq şəkildə Rusiyanın üzərinə gedir. Ümumiyyətlə, danışıqlar zamanı müzakirə predmeti nə ola bilər? Qarabağın statusunun danışıqlar predmeti olmayacağı məlumdur. Çünki bununla bağlı Azərbaycanın mövqeyi birmənalıdır. Qarabağın erməni icmasının gələcək taleyi Azərbaycan qanunları ilə həll ediləcək və bu məsələ müzakirə predmeti ola bilməz. Status və erməni icmasının taleyi, beynəlxalq hüquq normalarına görə, Azərbaycanla Ermənistan arasında sülh sazişinin mövzusu ola bilməz. Bu, Azərbaycanın daxili məsələsidir və ölkə qanunları ilə tənzimlənəcək. Ermənistan isə bunu qəbul etmək istəmir. Rusiya da bu məsələdə separatıların mövqeyini dəstəkləyir. Ona görə ki, Rusiya Qarabağ məsələsinin həllini istəmir. Rusiya yaxşı bilir ki, Azərbaycan status tələbi ilə razılaşmayacaq. Üstəlik, Azərbaycan Vətən müharibəsindən sonra qalib dövlət statusundadır. Birinci Qarabağ müharibəsində məğlub olmağımıza rəğmən, Azərbaycan status məsələsini qəbul etmədi. Belə olan halda necə ola bilər ki, indiki vəziyyətdə biz geri addım ataq? Bu əsla real deyil. Ancaq Kreml status məsələsini süni şəkildə gündəmdə saxlamaqla hər iki ölkəni təzyiq altında saxlamaq istəyir. Kreml siyasətinin əsas mahiyyəti bununla bağlıdır”.
Vidadi ORDAHALLI
