Bildiyimiz kimi, hazırda ölkəmizdə bütün sahələrdə, bütün bölgələrdə ciddi islahatlar gedir və islahatların da əsas məqsədi vətəndaş məmnunluğunu təmin etməkdir. Ölkəmizdə həyata keçirilən islahatlar Naxçıvan Muxtar Respublikasını da əhatə edir.
Tarixən Azərbaycan dövlətçiliyinin beşiklərindən olan Naxçıvanda yeni islahatlar dalğası başlayıb. Bir sıra fikirlərə görə, Muxtar Respublikada son baş verən proseslər nəticəsində burada mövcud olan ciddi problemlərin hamısı arxada qalacaq. O da vurğulanır ki, Naxçıvanda bütün sahələrdə yeni idarəçilik sistemi olacaq və əhalinin indiyə qədər üzləşdiyi bütün çətinliklər, problemlər həllini tapacaq. Bildiyiniz kimi, ölkəmizin bu diyarında yerli idarəçilərin öz işinə səhlənkar münasibəti nəticəsində çox ciddi problemlər mövcud olub. Bu da daim ictimaiyyət tərəfindən tənqid edilib, qınanılıb. Ona görə də, bu gün baş verənlərin köhnə “ənənələr”in üstündən xətt çəkilməsinə gətirib çıxaracağına inananlar çoxdur.
Artıq Naxçıvanda yeni dönəm başlayır. 27 il Naxçıvana rəhbərlik etmiş Vasif Talıbovun gedişindən sonra Prezident İlham Əliyev Naxçıvan Muxtar Respublikasında səlahiyyətli nümayəndəlik təsis etdi. Ölkə başçısının sərəncamı ilə Fuad Vahid oğlu Nəcəfli Prezidentin Naxçıvan üzrə səlahiyyətli nümayəndəsi təyin olundu.
Hazırda Naxçıvanın statusu ləğv edilməsə də, idarəetmədə əhəmiyyətli dəyişikliyə artıq başlanılıb – Gömrük Komitəsi və DTX ləğv edilib, onların bazasında mərkəzə tabe olan baş idarələr yaradılıb. Prosesin davamında Naxçıvanı “ayrıca dövlətə” çevirən bütün strukturların, nazirlik və komitələrin ləğvi qaçılmazdır.
Oradakı bütün nazirliklər, komitələr, xidmətlər ləğv edilərək, Bakıya tabe baş idarələr və yerli qurumlarla əvəzlənəcəyi gözlənilir. Nəticədə Naxçıvanda məmur ordusu əhəmiyyətli dərəcədə ixtisar ediləcək ki, bu da büdcənin israfının qarşısını alacaq. Yada salaq ki, yalnız DTX-nin ləğvi nəticəsində Naxçıvana ayrılan dotasiyanın məbləği 31 milyon manat azaldılmışdı. Belə ki, Baş İdarə olduğu üçün qurumun maliyyələşməsi Azərbaycan DTX-nin balansına salınmışdı. Qurumların ləğvinin korrupsiya, rüşvətin azaldılması, süründürməçiliyin aradan qaldırılması, biznes və şəxsi təsərrüfatın inkişafına da səbəb olacağı gözlənilir.
Xatırladaq ki, Naxçıvan Gömrük Komitəsi də ləğv edilərək, onun bazasında baş idarə yaradılıb. Həmin qurumda aparılan yoxlamalar nəticəsində Gömrük tariflərinin tənzimlənməsi və ödənişlər şöbəsinin rəisi Mənsur Əsgərov 132 milyon yeyinti ittihamı ilə həbs edilib. Ötən gün isə Naxçıvan daxili işlər naziri vəzifəsinə yeni təyinat oldu. Bu vəzifə Süleyman Nemətova həvalə edilib. Qeyd edək kii, Süleyman Nemətov bundan əvvəl Bakının Suraxanı rayonunda rəis olub. Bundan əvvəl isə Sumqayıtda polis rəisinin müavini, Qubada isə rəis kimi fəaliyyət göstərib.
Maraqlıdır ki, gözlənilənlərin əksinə olaraq, Naxçıvan DİN öz struktur mahiyyətini qoruya bilib. Yəni nazirlikdən başqa bir quruma transformasiya edilməyib. Bu qurumlara yeni təyin olunan rəhbərlərin seçimi də diqqət çəkir. Yeni təyinat alan kadrların hamısı əslən Naxçıvandandır. Ancaq onlar Naxçıvanda dövlət görəvində olmayıblar. Naxçıvanın spesifikasına yaxşı bələd olsalar da, oradakı məmur kontingeti ilə təmasda işləməyiblər.
Naxçıvan Muxtar Respublikası Gömrük Komitəsində aparılan əməliyyat, komitənin ləğvi və burada bəzi şəxslərin həbsi ilə yanaşı, gömrükdə indiyədək mövcud olan qeyri-rəsmi qadağalar ləğv edilib. Naxçıvanı Türkiyə ilə birləşdirən Sədərək və İranla birləşdirən Culfa gömrük məntəqələrində İran və Türkiyəyə gedən vətəndaşlar üçün tətbiq olunan qadağa və məhdudiyyətlərin bəziləri aradan götürülüb. Naxçıvan Baş Gömrük İdarəsinin rəisi vəzifəsini müvəqqəti icra edən Vüqar Əliyev gömrük işinin təkmilləşdirilməsi barədə sahibkarları məlumatlandıraraq bildirib ki, başlıca məqsəd idxal-ixrac əməliyyatlarının asanlaşdırılması və sürətləndirilməsi, gömrük əməliyyatlarının şəffaf şəkildə həyata keçirilməsinin təmin olunması, sahibkarlıq mühitinin daha da yaxşılaşdırılmasıdır.
Bütün bunlar onu deməyə əsas verir ki, Naxçıvanda yeni idarəetmənin əsası məhz yeni kadrlarla qoyulur və xalqın bundan çox müsbət gözləntiləri var.
Məhəmmədəli QƏRİBLİ
