Ermənistanın baş naziri Nikol Paşinyan Sankt-Peterburqda Rusiya lideri ilə ikitərəfli görüşdə deyib ki, bu gün üçün ən vacib məsələ Laçın dəhlizindəki böhrandır:
“Təxminən 20 gündür ki, Laçın dəhlizi bağlanıb və bu, Qarabağdakı Rusiya sülhməramlılarının cavabdehlik sahəsidir”.
Paşinyanın iddiasına görə, üçtərəfli bəyanata əsasən, Laçın dəhlizi Rusiya sülhməramlılarının nəzarəti altında olmalıdır və Azərbaycan sərnişinlərin, yüklərin maneəsiz keçidinə zəmanət verir:
“Belə çıxır ki, Laçın dəhlizi Rusiya sülhməramlılarının nəzarəti altında deyil. Təbii ki, mən bu vəziyyəti və onun həlli üçün variantları müzakirə etmək istərdim”.
Göründüyü kimi, Paşinyan açıq şəkildə Putunə sülhməramlılarla bağlı etiraz edir. O niyə belə cəsarətlənib? Qərbin dəstəyinə arxalanaraq Rusiyanın üzərinə gedə bilərmi?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, bu, Ermənistan siyasilərinin adətidir: “Onlar daim kömək etdikləri, onlara kömək edən tərəflərə iddia ilə yanaşırlar, iradlar bildirirlər və bu özünəməxsus bir alver vasitəsidir. Faktiki olaraq ermənilərin təsəvvürlərinə köklənsək, onların istəyi və gözləntisinin nədən ibarət olduğunu görə bilərik. Ondan ibarətdir ki, sülhməramlılar erməni seqmentinin tərəfində çıxış etməlidirlər. Yəni orada bizim Azərbaycanın dinc nümayişçilərinə, ekoloqlarımıza, ictimai birliklərimizin nümayəndələrinə gərək təzyiq göstərsinlər, güc tətbiq etsinlər. Hətta onları ordan qovsunlar. Onların bizimkilərə qarşı normal davranmasının, dözümlə yanaşmasının nə ilə bağlı olduğunu biz bilirik. Çünki bizimkilərin tələbləri haqlı tələblərdi. Onlar bizim hüquqlarımızın qorunmasına hesablanıb. Digər tərəfdən, ərazilərimizdə gedən proseslərlə bağlı monitorinqlərin keçirilməsini aktuallaşdırır. Çünki ermənilər ömür boyu harada yaşayıblarsa, əgər o torpaqlar azərbaycanlılara məxsus olubsa, onları ya dağıdıblar, ya da mənimsəyiblər. Üstünə bir xaç vurmaqla bunlar bizim qədim torpaqlarımızdı deməyə çalışıblar. Ona görə də ermənilərin istəyi alınmır. Birincisi, Azərbaycan köhnə Azərbaycan deyil. Ermənistan da həmin Ermənistan deyil. Başları əzildikdən sonra onlar çox məyusdurlar və istənilən tərəfə iddia ilə yanaşırlar. O cümlədən onlar sülhməramlı adı ilə orada fəaliyyət göstərən hərbi kontingentin, Rusiyanın davranışlarına korrektələr etmək istəyirlər, onları təhdidçi yollarla Azərbaycanın üstünə qaldırmağa və ümumiyyətlə oranın hərbi potensialından öz xeyirlərinə istifadə etməyə çalışırlar. Ancaq bu olan iş deyil”.
Ekspertin sözlərinə görə, Paşinyan da digər sələfləri kimi real vəziyyəti düzgün dəyərləndirə bilmir: “ Lap Qərbin dəstəyi də olsa, Qərb bu bölgəyə heç bir vəchlə gəlməyəcək. Paşinyanın, erməni faşistlərinin də ən böyük səhvi ondan ibarətdir ki, onlar bu məsələyə çox böyük ümidlər bəsləyirlər. Humanitar səviyyədə olan dəstəklərdən başqa, Avropanın, Qərbin Ermənistana heç vaxt hərbi dəstəyi olmayacaq. Əgər onlar revanşizmlərini məhz bu mifik dəstəyə kökləyirlərsə, çox böyük yalnışlığa yol verirlər, bu heç vaxt da olan iş deyil. Ona görə də, ola bilsin ki, hər tərəfdən Pasinyan dəstək alır, ona vədlər verilir. Ancaq bunların heç bir əhəməyyəti olmayacaq. Azərbaycanın üstünlüyü artıq bərqərar olub. Biz proseslərin nəzarətini əlimizdə saxlamışıq. Lazım olan tədbirləri özümüz görəcəyik. Əksinə, sülhməramlılar bizim yanımızda gözükölgəlidirlər. Çünki ərazi bizim ərazimizdir. İstismar olunan faydalı qazıntılarımızın müqəddəratı ilə bağlı düzgün sorğular ünvanlamışıq. İstər-istəməz, Ruben Vardanyanın babası da qəbirdən gəlsə, o heç bir şey edə bilməyəcək. Bu aksiyanın sonu birmənalı olaraq bizim qələbəmizlə bitəcək. Paşinyan, onun ətrafı kimə bel bağlayır-bağlasın, heç bir xeyri olmayacaq”.
Məhəmmədəli QƏRİBLİ
