Müxtəlif beynəlxalq təşkilatların davamlı şəkildə haqsız tərəf olan ermənilərin, Ermənistanın tərəfini tutması artıq ənənə halı alıb. Özünü uşaq hüquqlarının beynəlxalq müdafiəçisi sayan UNİCEF də ermənipərəstliyindən qalmır.
Ermənistan mediasında UNİCEF-in Laçın yolundakı “vəziyyətlə” bağlı “bəyanat”ı dərc edilib. Bəyanatda “Laçın dəhlizi ilə girişin faktiki olaraq bağlanması uşaqların vəziyyətinə mənfi təsir göstərir” ifadəsi yer alıb. Bu azmış kimi, bədnam bəyanatda “Dağlıq Qarabağ” ifadəsindən istifadə edilib, halbuki, “Dağlıq Qarabağ” adında ərazi vahidi yoxdur.
UNİCEF iddia edib ki, Laçın dəhlizinin bağlı qalması uzun müddət davam edərsə, guya “daha çox uşaq dolanışığı, sağlam böyüməsi və rifahı üçün zəruri olan əsas qida və xidmətlər çatışmazlığından əziyyət çəkəcək”.
Təşkilat bəyan edib ki, Qarabağdakı erməni uşaqlarının “müdafiəsini təmin” etmək üçün çalışır və sair.
Əvvəla, Azərbaycan Qarabağdakı erməni uşaqlarının hüquqlarını pozan, onların əziyyət çəkməsinə səbəb olan heç bir addım atmayıb, hər zaman humanist davranaraq beynəlxalq hüquq çərçivəsində fəaliyyətini ortaya qoyub. O dəhlizi də Azərbaycan bağlamayıb. Digər tərəfdən də, oradakı uşaqlar bizim vətəndaşlarımızdır və Azərbaycan dövləti hər zaman onlara qayğı-diqqət göstərməyə hazırdır. Məsələ burasındadır ki, Qarabağda yaşayan uşaqlara Azərbaycan heç bir pislik etmir və onların hüquqlarını pozmur, dəfələrlə humanitar dəhliz açıb və müalicəyə ehtiyacı olan uşaqların Ermənistana getməsinə şərait yaradıb. Amma ermənipərəst beynəlxalq təşkilatlar “stəkanda fırtına” yaratmaqda davam edirlər. Düzdür, UNİCEF-in bəyanatında Azərbaycanın adı çəkilməyib, amma söhbətin Azərbaycandan getdiyi aşkardır.
UNİCEF uşaqların hüquqlarını müdafiə edən təşkilat kimi nə üçün Birinci Qarabağ müharibəsində Ermənistan tərəfindən öldürülən, əsir götürülən, indiyə qədər taleyi məlum olmayan uşaqların bir dəfə də olsun müdafiəsinə qalxmadı, niyə Ermənistandan tələb etmədi ki, azərbaycanlı uşaqlarla bağlı məlumat versin? İkinci Qarabağ müharibəsindən əvvəl və müharibə dövründə Ermənistan Gəncəyə, başqa şəhərlərimizə qadağan olunmuş raket atıb uşaqlarımızı öldürəndə niyə UNİCEF Ermənistanın üzərinə getmədi? Nə üçün başdansovdu bir bəyanatla işini bitmiş saydı? Qarabağda erməni uşaqlarına qarşı heç bir təhlükə olmadığı halda UNİCEF “təhlükəsizilik tədbirlərindən” danışır.
“Harda idi onda bu UNİCEF?”
Siyasi şərhçi Azər Həsrət “Bakı-Xəbər”ə bildirdi ki, beynəlxalq qurumların yüksək vəzifələrində oturan insanlar çox vaxt bizim kimi ölkələrdə baş verənlərdən həqiqətən də xəbərsiz olurlar. “Xəbərsiz olduqlarına görə də naşılıq nümayiş etdirirlər. Alayarımçıq təbliğat məqsədilə ötürülmüş informasiyalara əsaslanıb bəyanatlarla çıxış edirlər. UNİCEF-in də qeyd olunan bəyanatı o qəbildəndir. Mən şəxsən qurumun saytında bəyanatın orjinal mətni ilə tanış oldum və dərhal da ağlıma bir fikir gəldi ki, bunların Laçın yolunda baş verənlər barədə ümumiyyətlə məlumatı yoxdur. Çünki uşaqların bu yolda baş verənlərlə bağlı əziyyət çəkəcəyindən narahatlıq ifadə edirlər. Əlavə olaraq da qeyd edirlər ki, “uşaqların əziyyət çəkməməsi üçün” o yoldan humanitar məqsədlərlə keçid təmin edilməlidir. Bunun özü ondan xəbər verir ki, adamların yolda nə baş verməsindən xəbərləri yoxdur. Çünki elə ilk gündən, yəni dekabrın 12-dən Azərbaycanın ekologiya fəlları yolda etiraz aksiyasına başlarkən həm dövlət, həm də vətəndaş cəmiyyəti bəyan etdi ki, humanitar məqsədlər üçün yol açıqdır. Sonrakı günlərdə biz dəfələrlə müşahidə etdik ki, hümanitar məqsədlər üçün keçidə heç bir əngəl yoxdur. Yəni istəsə, xəstəsini Xankəndidən götürüb Ermənistana aparır, Ermənistandan tibbi personalın, dərmanların Xankəndiyə gətirilməsinə şərait yaradılır. Maşınlar gəlir. Bundan başqa, “Qızıl Xaç”ın maşınları hər gün o yoldan gəlib keçir. Ərzaq daşınmasında heç bir problem yoxdur. Rus sülhməramlıları da rahat bir şəkildə ərazidə hərəkət edirlər”.
A.Həsrətin sözlərinə görə, azərbaycanlı etirazçılar o yolun humanitar məqsədlər üçün istifadəsini əngəlləmir. “Amma UNİCEF çağırış edir ki, humanitar məqsədlər üçün “yolun bağlanması yolverilməzdir” və sair. Təşkilat olmayan bir şeydə bizi ittiham edir. Ona görə də həmişə deyirik ki, bu cür beynəlxalq qurumlara vaxtında və əsaslandırılmış informasiyalar çatdırılmalıdır. İndi düşünürəm ki, Azərbaycanın müvafiq dövlət qurumları videofaktlar, şəkillər, ümumiyyətlə o ərazidə baş verənlərlə bağlı UNİCEF rəhbərliyinə etiraz məktubu göndərməlidir. Azərbaycan UNİCEF rəhbərliyindən tələb etməlidir ki, yalan üzərində qurulmuş bir bəyanata görə üzrxahlıq etsinlər. Yəni olmayan bir şeyə görə bizi niyə ittiham edirlər? Bu məsələnin bir tərəfi. İkinci bir tərəfi isə odur ki, Azərbaycan torpaqları 30 ilə yaxın müddətində darmadağın, tari-mar edilib. Bizim mədəni abidələrimiz məhv edilib, yer üzündən silinib. Azərbaycan uşaqları 30 il ərzində ermənilərin vəhşiliyindən olmazın əziyyətlərini çəkib, Ermənistanın terroru nəticəsində neçə-neçə uşaqlarımız həlak olub, neçə uşaq hər iki valdeynini itirib. Bizə qarşı soyqırım törədilib. Harda idi onda bu UNİCEF? Onun bəyanatı qərəzlidir, birtərəflidir və bunlar erməni ağzı ilə danışır”.
A.Həsrət hesab edir ki, Azərbaycan dövləti rəsmi şəkildə, ən yüksək səviyyədə bunlara yerini göstərməlidir. O qeyd etdi ki, Azərbaycan, oradakı etirazçılar Laçın yolunu humanitar keçidlərə bağlamayıb, bu göz önündədir: “Əgər UNİCEF-də kiməsə maraqlıdırsa, buyursun gəlsin, monitorinq aparsın”.
İradə SARIYEVA
