Fransadakı ermənipərəstlərin Azərbaycana yönəlik aqressiyası səngimək bilmir. Belə ki, sağ və sol təmayüllü yüzdən çox Fransa millət vəkili Makrona müraciət edib.
Müraciətdə qeyd olunur ki, Makron Ermənistan və Qarabağ ətrafında cərəyan edən proseslərə müdaxilə etməklə “sonradan önlənməsi mümkün olmayacaq hadisələrin” qarşısını almalıdır: “Emmanuel Makron Dağlıq Qarabağ ermənilərinin və Ermənistan Respublikasının təhlükəsizliyini təmin etmək üçün hər şeyi etməlidir. Makron Avropa İttifaqı və ABŞ partnyorlarını birlikdə Azərbaycan üzərinə sanksiyaların qoyulması zərurətinə inandırmalıdır ”.
Birgə müraciətdə Fransa parlamentinin hər iki palatasını təmsil edən deputatlar “Azərbaycan tərəfindən blokadaya alınmış Qarabağdakı” vəziyyətin “humanitar fəlakətə” səbəb ola biləcəyini vurğulayırlar. Daha sonra qeyd olunur ki, ki, 2020-ci ildən yaranmış vəziyyət Bakının geri çəkilməyəcəyini, ermənilərin “etnik təmizlənməsi” üçün istənilən bəhanədən istifadə edəcəyini göstərir. Siyasətçilər qeyd edirlər ki, aralarındakı bütün fikir ayrılıqlarına baxmayaraq, Ermənistan və Qarabağa dəstəkdə həmrəydirlər. Onlar hesab edirlər ki, Fransa bu məsələdə “100 il gecikib”.
“Fransa dövləti Rusiyanın təzyiqləri qarşısında tab gətirə bilmədiyinə görə...”
Məsələyə münasibət bildirən AMİP-in sədr müavini Afsəddin Nəbiyevin fikrincə, Parisin bu dərəcədə həyasızlaşması gözlənilən idi: “Fransa parlamentində təmsil olunan siyasi qüvvələrin rəhbərləri adından Fransa prezidentinə ünvanlanmış məktubda Azərbaycana qarşı əsassız ittihamlar səsləndirilib. Müraciətdə ölkəmizin suverenliyinə, ərazi bütövlüyünə qəsd mahiyyətində addımlar atılmasına çağırışlar edilməsi Fransanın tamamilə qərəzli bir bir dövlət olduğunu ortaya qoymuş oldu. Belə addımlar birbaşa Ermənistanın maraqlarına xidmət edir. Fransanın bu addımları Azərbaycan dövləti 44 günlük Vətən müharibəsində ərazilərimizi erməni işğalçı ordusundan təmilzlədiyi dövrdə də özünü göstərdi.Türkiyənin Azərbaycana olan siyasi dəstəyindən dolayı Fransa Azərbaycan qarşı bu şəkildə iyrənc siyasət yürüdür. Ancaq qətiyyətlə bildirirəm ki, Fransanın anti-Azərbaycan və Ermənistanı müdafiə etmək cəhdləri heç bir nəticə verməyəcək. Nə Azərbaycan əvvəlki Azərbaycandır, nə də Türkiyə illər öncəki zəif dövlət. Fransa birdəfəlik anlamalıdır ki, Azərbaycan qalib dövlətdir, qalib xalqdır, biz öz torpaqlarımızı qanımız-canımız bahasına azad etmişik. Bundan sonra da heç bir təhdid bizi yolumuzdan ayıra bilməz. Mənim qənaətim bundan ibarətdir ki, Fransa dövləti Rusiyanın təzyiqləri qarşısında tab gətirə bilmədiyinə görə, daxilində siyasi prosesləri nisbətən özünə təhlükə hiss etmədiyi ərazilərə Cənubi Qafqazı yönləndirməklə kompensasiya etməyə çalışır. Diqqət etsək görərik ki, Ukraynanın müdafiə olunmasında Fransa qeyri-müəyyənlik nümayiş etdirir. Bu kimi yayınmalar dünya ictimaiyyətinin diqqətindən yayına bilməz. Belə demək mümkünsə, Fransa beynəlxalq qınağı yayındıraraq diqqəti Cənubi Qafqaza fokyslaşdırmaq niyyətindədir. Beləliklə, dünya dövlətlərinin əlində oyuncaq, kukla rolunda çıxış edən ermənilər Fransanın əsl mahiyyətini dərk etmirlər. Erməni şovinistləri elə zənn edirlər ki, Fransa ermənilərə kömək etmək niyyətindədir. Fransa bu niyyətin arxasında öz dövlət maraqlarını qorumaqla məşğuldur. Erməni xalqının ayıq nümayəndələri artıq dərk etməlidir ki, ermənilər revanşist hərəkət etməyə cəhd edərlərsə, 2020-ci ildə olduğu kimi, Azərbaycan Ordusunun daha təsirli zərbəsini alacaqlar. O vaxt olduğu kimi, bu dəfə də onlara heç kim sahib çıxmayacaq. Odur ki, yaxşı olardı, Ermənistan fransız bacılarının təxribatlarına getməsin. O zaman onlar üçün daha yaxşı ola bilər”.
Sədr müavini onu da əlavə etdi ki, Fransa bu kimi addımlarla Qarabağla bağlı əvvəlki status-kvonu bərpa edə bilməyəcək.
Vidadi ORDAHALLI
