Rusiya Prezidenti Vladimir Putin dekabrın 26-da MDB dövlət başçılarının Sankt-Peterburqda keçirilən qeyri-rəsmi sammiti çərçivəsində Azərbaycan Prezidenti İlham Əliyevin də iştirakı ilə üçtərəfli görüş keçirdiklərini bildirib.
V.Putin Sankt-Peterburqda Müstəqil Dövlətlər Birliyinə üzv dövlətlərin dövlət başçılarının qeyri-rəsmi sammiti çərçivəsində Ermənistanın baş naziri Nikol Paşinyanla görüşüb.
Qarabağ məsələsi ilə bağlı Azərbaycan prezidenti Əliyev və Ermənistanın baş naziri Paşinyanla üçtərəfli görüş keçirdiklərini qeyd edən Putin deyib:
“Biz dünən sizinlə başladıq və üçtərəfli görüş keçirməyə nail olduq. Təbii ki, əsas məsələ bütövlükdə Cənubi Qafqazdakı vəziyyətin, Azərbaycan-Ermənistan münasibətlərinin, Qarabağla bağlı hər şeyin həllidir. Razılaşdığımız kimi, bütün bu məsələləri ətraflı müzakirə edəcəyik”.
Paşinyan isə Laçın dəhlizindəki vəziyyətə də toxunub və bildirib ki, dəhliz hazırda Rusiya sülhməramlılarının nəzarətində deyil. Paşinyan bu vəziyyəti və hansı variantların olduğunu Putinlə müzakirə etmək istədiyini bildirib.
Görünən budur ki, Putin Ermənistan rəhbərliyinin konfidensiallığı qorumadığına əmin olduğu üçün belə addım atıb. Görüşdən əvvəl Azərbaycan XİN rəhbəri Ceyhun Bayramov da deyib ki, Ermənistan konfidensiallığa riayət etmir.
Üçtərəfli görüşün və nəticənin gizli saxlanması bu amillə bağlı ola bilərmi?
Politoloq Turab Rzayev “Bakı-Xəbər”ə bildirdi ki, adətən Rusiyada keçirilən görüşdə heç bir real nəticə əldə edilmir: “Çünki Azərbaycan və Ermənistan tərəfin maraqları üst-üstə düşmür. Azərbaycan üçün “qırmızı xətlər” var. Bunlar Azərbaycanın ərazi bütövlüyü, Qarabağın qalan yerlərində Azərbaycanın yurisdiksiyasının tam qəbuludur. Ermənistan da maksimum öz tələblərini yerinə yetirməyə çalışır. Xüsusilə də muxtariyyət məsələsini önə çəkir. Azərbaycan bunu tamamilə rədd edir. Rusiya da çalışır ki, sülhməramlıların qalma müddətini uzatsın. Biz bunu da qəbul etmirik. Ölkə rəhbərliyi bununla bağlı da fikrini konkret ifadə edib. Tərəflərin mövqeləri üst-üstə düşmədiyinə görə, yekunla bağlı daha çox umumi açıqlamalar verməklə kifayətlənirlər. Bundan əvvəlki görüşlərin yekun bəyanatlarında Rusiyayanın sülhə verdiyi töhfə dəstəklənir. Ortada ciddi və faydalı heç nə nəzərə çarpmır. Buna görə də Azərbaycan tərəfi açıq şəkildə belə məzmunsuz bəyanatların yayılmasına qarşıdır. Paşinyan daha çox Makronun vasitəçiliyi ilə görüşlərin keçirilməsində israrlıdır. Rusiya isə öz sülhyaratma mövqeyini qabartmaq istəyir. Xüsusilə də Ukraynada zədələdiyi imicini bərpa etmək üçün. Görüşün konfidensial olması həm də Ermənistanın daim mahiyyəti təhrif etməsi ilə bağlı ola bilər. Çünki Ermənistan dəfələrlə belə addımlar atıb. Ortada hansısa real nəticə olsaydı, görüşün keçirilməsi və detalları barədə məlumat mediaya sızardı”.
Qeyd edək ki, Sammitdən əvvəl Rusiya prezidentinin mətbuat katibi Peskov da üçtərəfli görüş planlaşdırılmadığını bildirib.
Məhəmmədəli QƏRİBLİ
