Bir insan üçün doğma Vətənindən, yurd-yuvasından, ev-eşiyindən, el-obasından əziz heç nə ola bilməz. Odur ki, soydaşlarımızın öz doğma yurdlarına qayıtmaq hisslərinə təbii yanaşmaq lazımdır. Bu həm də onların beynəlxalq hüquq çərçivəsində, BMT sənədləri ilə təsbit olunan hüquqlarıdır.
Bu gün işğaldan azad edilən ərazilərimizdə baş verən müsbət hadisələrin, aparılan tikinti-quruculuq, bərpa işlərinin, keçmiş köçkünlərin öz yurd-yuvalarına qayıdışının şahidi oluruq. Böyük Qayıdış siyasəti artıq icra olunur və keçmiş məcburi köçkünlərin tədricən öz evlərinə qayıdışı baş verir. Artıq necə ocaqdan tüstü çıxır, artıq neçə evin işığı yanır, neçə könüldə toy-bayramdır. İşğaldan azad edilən ərazilərimizə köçlə, geri qayıdışla paralel olaraq başqa bir geri qayıdışa da şahid olmağa hazırlaşırıq. Böyük Qayıdış, böyük köç, böyük geri dönüş başlayıb. Qarabağa və azad edilən ərazilərimizə qayıdış prosesi ilə yanaşı Qərbi Azərbaycana qayıdış prosesinə də hazırlıq gedir, artıq bu istiqamətdə işlərə start verilib.
Qərbi Azərbaycana qayıdış Böyük Qayıdışın tərkib hissəsinə çevirilir.
Dövlət tərəfindən hər cür qayğı və diqqətlə, inzibati bina ilə təmin olunan Qərbi Azərbaycan İcması bu istiqamətdə proseslərə başlayıb. Əlbəttə, Qərbi Azərbaycana dinc qayıdış prosesinə başlanmasına xalq olaraq çox sevinirik. Ümid edirik ki, 1988-1991-ci illərdə və ondan əvvəlki dövrlərdə Qərbi Azərbaycandan didərgin düşən soydaşlarımız öz doğma evlərinə dönəcəklər.
“Mən əminəm ki, bu gün gələcək…”
Prezident İlham Əliyev Qərbi Azərbaycandan olan bir qrup ziyalı ilə görüşündə onların mütləq öz doğma yurdlarına qayıdacaqlarına əminlik ifadə etdi.
Azərbaycan Prezidenti çıxışında böyük əminliklə vurğuladı: “Gün gələcək, Qərbi Azərbaycandan olan soydaşlarımız, onların yaxınları, uşaqları, nəvələri tarixi diyarımız olan Qərbi Azərbaycana qayıdacaqlar. Mən əminəm ki, bu gün gələcək və əminəm ki, Qərbi azərbaycanlılar böyük coşqu və həvəslə öz doğma torpaqlarına qayıdıb orada yaşayacaqlar…Bunu deməyə əsas verən bir çox amillər var. Onlardan yəqin ki, ən önəmlisi xalqımızın tarixi yaddaşıdır. Bu gün Zəngilan rayonunun Ağalı kəndinin nümunəsi bunu deməyə əsas verir. Bu gün Zəngilan rayonunun Ağalı kəndində yaşayan insanların böyük əksəriyyəti, eyni zamanda, uşaqlar, gənclər onlar üçün doğma olan o torpaqları heç vaxt görməmişlər. Torpaq həsrəti və Vətən sevgisi onları oraya getməyə vadar etdi. Onların arasında hətta Bakıdan, Sumqayıtdan gedənlər də az deyil. Yəni bu, xalqımızın xüsusiyyətidir, torpaq həmişə çəkir. Əminəm ki, Qərbi azərbaycanlılar da bu fikirlə, bu arzu ilə yaşayırlar”.
“Azərbaycanlılar mütləq öz dədə-baba torpaqlarına qayıdacaqlar”
“Müasir İnkişaf” Birliyinin sədri, siyasi şərhçi Mübariz Göyüşlü “Bakı-Xəbər”ə bildirdi ki, biz Azərbaycan xalqı, Azərbaycan dövləti üçün kifayət qədər önəmli, məsul zamanlardan, günlərdən keçirik. Müzəffər Ali Baş Komandan İlham Əliyevin rəhbərliyi altında tarixi anları yaşadığımızı və bu uğurlara şahidlik etdiyimizi, onun iştirakçısı olduğunuzu deyən M. Göyüşlü qeyd edir ki, əvvəla, İkinci Qarabağ Müharibəsində torpaqlarımızı işğaldan azad edib 30 illik erməni işğalına, əsarətinə son qoyduq. “Əsrlərlə, minillərlə yaşayacaq tarixi bir hadisəni gerçəyə çevirdik. Dövlət başçısının bəyan etdiyi kimi, artıq Qarabağ münaqişəsi, müharibəsi tarixdə qalıb. Bundan sonra əlbəttə, bəyan ediliyi kimi, Azərbaycan yeni hədəflərə doğru istiqamətlənməkdədir, irəliləməkdədir. Bu da Qərbi Azərbaycan məsələsinin aktuallığı ilə bağlıdır. Bir neçə gün bundan əvvəl cənab Prezidentin Qərbi Azərbaycan İcmasının yeni istifadəyə verilən inzibati binasında bir qrup Qərbi Azərbaycandan olan ziyalılarla görüşdə səsləndirdiyi fikirlərdə artıq Qərbi Azərbaycana qayıdışın konseptual əsaslarının əks olunduğunu gördük. Bunun ideoloji, konseptual məqamları ölkə başçısının çıxışlarında əks olunmuşdu. Artıq bilidiyi kimi, Prezidentin tapşırığına əsasən Qərbi Azərbaycana qayıdış konsepsiyasının hazırlanmasına başlanılıb. Azərbaycanlılar mütləq öz dədə-baba torpaqlarına qayıdacaqlar. Biz ordakı evlərimizə, orada bizə məxsus olan hər bir şeyə qovuşmaq üçün Ermənistan adlandırılan Qərbi Azərbaycan ərazisinə dönəcəyik. Təbii, orada bizim maddi-mədəni irsimiz, abidələrimiz olub. Təbii ki, o abidələrin, tarixi irsin salamat qalması bizdə şübhə oyadır. Amma bütün hallarda biz ora gedəcəyik”.
“Qərbi Azərbaycana qayıdışla bağlı məsələ hazırda dövlətimizin əsas hədəflərindən biridir”
M.Göyüşlü bildirdi ki, Göyçə, Zəngəzur, Dərələyəz, Vedibasar, İrəvan və digər tarixi yurdlarımız öz doğma sakinlərini, əsl sahiblərini gözləyir. M. Göyüşlünün sözlərinə görə, biz böyük güclərin ermənilər vasitəsilə soydaşlarımıza qarşı həyata keçirdiyi mənfur planları da pozmaqda davam edəcəyik. O, vurğuladı ki, biz o torpaqlara tankla, topla yox, məhz dinc yolla, beynəlxalq qanunların bizə verdiyi hüquqlara gedəcəyik. “Azərbaycanlıların niyyəti bəllidir, biz dinc yolla öz tarixi torpaqlarımıza qayıtmaq istəyirik. Məqsədimiz odur ki, beynəlxalq konvensiyaların bizə verdiyi imkanlardan istifadə edib öz haqqımıza qovuşaq. Çox təəssüf ki, Qərbi Azərbaycan hazırda beynəlxalq səviyyədə monoetnik, təkmillətli ermənilərin yaşadığı ərazi kimi tanınır, halbuki, ermənilər ora sonradan köçürülüb gətirilib. Bu ərazi Azərbaycan xalqının tarixi torpağıdır və bizim ora qayıdışımız təmin edilməlidir. Qərbi Azərbaycana qayıdışla bağlı məsələ hazırda dövlətimizin əsas hədəflərindən biridir. Bu baxımdan hesab edirəm ki, Qərbi Azərbaycana qayıdış prosesinin başladılması Böyük Qayıdışın tərkib hissəsinə çevrilib”-deyə M.Göyüşlü qeyd etdi.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
