“Ermənistan danışıqlar prosesində müzakirə predmeti olan məqamlarla bağlı ictimai məkana informasiyalar sızdırır”. Bunu xarici işlər naziri Ceyhun Bayramov ilin yekunlarına dair mətbuat konfransında deyib.
XİN başçısı sözügedən məsələ ilə bağlı bir sıra məqamlara toxunub və bunları belə əsaslandırıb: “Prosesə çox mənfi təsir edən məqam yalnız sülh müqaviləsi ilə bağlı deyil. Ermənistan danışıqlar prosesində müzakirə predmeti olan məqamlarla bağlı ictimai məkana informasiyalar sızdırır. Bu sosial şəbəkələr vasitəsilə edilir. Birincisi, bunu sızdırmaq danışıqlar prosesində çox ziyanlıdır. İkincisi isə bu, qarşı tərəfin mövqeyini əks etdirmir. Bizdən fərqli olaraq, vasitəçilər Ermənistanı bu məsələdə açıq-aşkar günahlandırmır. Biz bunun çox zərərli olduğunu bildirmişik. Vasitəçilər də bunu görür”.
Görünən odur ki, Ermənistan sülh danışıqlarının effektini aşağı salmaq üçün bütün vasitələrə əl atır.
Maraqlıdır, bəs ekspertlər bunu necə dəyərləndirir? Ermənistan niyə məlumatları sızdırır?
“İnformasiyanı məqsədyönlü sızdırmaqla cəmiyyəti süni şəkildə sülh sazişinə qarşı kökləyirlər”
Sözügedən məsələyə aydınlıq gətirən Böyük Azərbaycan Partiyasının sədri Elşad Musayevin fikrincə, Ermənistanın danışıqların məzmunu ilə bağlı məqamları sızdırmasında bir neçə məqsədi var: “Həqiqətən də belə bir məlumat var. Burada müxtəlif faktorlar ola bilər. Bu, ilk növbədə ənənəvi erməni hiyləsi ilə bağlıdır. Məsələnin mahiyyəti ondan ibarətdir ki, Ermənistan üzərinə götürdüyü öhdəlikləri yerinə yetirmir. Götürdüyü öhdəlikləri nəyə görə yerinə yetirmədiyi ilə bağlı buna don geyindirməyə çalışır. Bunu da ictimai rəyi hazırlamaq formasında həyata keçirməyə cəhd edir. İnformasiyanı məqsədyönlü şəkildə sızdırmaqla cəmiyyəti süni şəkildə sülh sazişinə qarşı kökləyirlər. Bu, əslində Ermənistanın yeni hiyləgər taktikası deyil. Dəfələrlə buna bənzər hallar olub. Söhbət müharibədən əvvəl müxtəlif dövrlərdə gedən danışıqlardan gedir. Dəfələrlə Ermənistan məqsədyönlü şəkildə informasiyanı sızdırmaqla, ölkədə süni etiraz aksiyaları təşkil edib. Yəni özlərini sığortalamaq üçün dünyaya gösytərirlər ki, baxın, bizlik bir şey yoxdur, cəmiyyət bunu istəmir. Əslində isə bu, bəhanədir. Ermənistan hakimiyyəti sülh istəmədiyi üçün belə vəziyyət yaradır. Bir dəfə Paşinyanın Moskva səfəri ərəfəsində Ermənistanda kütləvi aksiyalar keçirildi. Onda mən bəyan etdim ki, işin içində Nikol Paşinyan var. Çünki etiraz aksiyalarının keçirilməsi Paşinyana sərf edirdi. Vasitəçilərin Ermənistanın informasiyaları sızdırmasını görməzdən gəlməsi təsadüfi deyil. Bunun səbəbi onunla əlaqədardır ki, vasitəçilər zaman-zaman Ermənistanın tərəfində olublar. Ermənilərin törətdikləri vandalizm aktlarını görməzdən gəliblər. Ona görə də Ermənistan tərəfinin bu hoqqabazlığına, şıltaqlıqlarına hansısa irad bildirmirlər. Azərbaycan məlumatları sızdırsaydı, o zaman dərhal bizi topa tutardılar. Ermənistana gəldikdə isə, bunu məqsədyönlü şəkildə görməzdən gəlirlər, buna göz yumurlar. Bütün bunlara baxmayaraq, belə halların üzərinə getməliyik və vasitəçilərə bu iradı bildirməliyik”.
Partiya sədri onu da əlavə etdi ki, Ermənistan yalnız güclə hesablaşır.
Vidadi ORDAHALLI
