Məlumdur ki, Ermənistanda siyasi hakimiyyətdə olan şəxslər üçün yalan danışmaq bir su içimi kimidir. Onlar bunu elə asanlıqla bacarırlar ki, adam məəttəl qalır. Çox zaman onların yalanlarının, təxribatlarının üstünü örtə bilsələr də, amma bəzən ört-basdır edə bilmədikləri də olur.
Ermənistan Təhlükəsizlik Şurasının katibi Armen Qriqoryan son günlər səsləndirdiyi təxribatçı bəyanat kimi. Yadınıza salaq ki, Qriqoryan “Azadlıq” radiosuna müsahibəsində ölkənin strateji müttəfiqi olan Rusiyanın Ermənistanı Azərbaycana dəhliz verməyə, Rusiya Federasiyası ilə Belarus arasında ittifaq dövlətinə qoşulmağa məcbur etdiyini bildirib. Qriqoryanın müsahibəsinin ardınca isə Rusiya Federasiyası Prezidentinin mətbuat katibi Dmitri Peskov “Ermənistan xəbərləri” – NEWS.am saytının sorğusuna cavab olaraq bildirib ki, Ermənistan Təhlükəsizlik Şurası katibinin bəyanatlarını təxribat xarakterli hesab edir.
“Belə bəyanatlar təxribat kimi qiymətləndirilə bilər. Onlar doğru deyil. Rusiya rəsmilərindən heç biri bunu deməyib və bunu heç kim vasitəsilə erməni tərəfinin diqqətinə çatdırmayıb” - deyə Peskov bildirib.
Dmitri Peskovun Ermənistanın Milli Təhlükəsizlik Şurasının katibi Armen Qriqoryanı təxribatçı adlandırmasına şərh verən siyasi ekspert Rövşən Rəsulov “Bakı-Xəbər”ə bildirdi ki, əslində Ermənistanın mövcud hakimiyyəti, iqtidarı hazırda Qərbin sıx təsirləri və təzyiqləri altındadır. O vurğuladı ki, Qərbin məqsədi əsasən Cənubi Qafqaza meyllənmək, bu coğrafiyada özünə yer etməkdən ibarətdir: “Bu məqsədlərini həyata keçirmələri üçün Ermənistan onlar üçün ən əlverişli vasitədir. Bu baxımdan, Ermənistana müəyyən imtiyazlar verəcəklərini vəd edən Qərb siyasi dairələri Paşinyan hakimiyyətindən tələb edirlər ki, bacardığları qədər Rusiyaya qarşı mənfi fikirlər, Rusiyanın öz üzərinə götürdüyü öhdəlikləri yerinə yetirməməsi ilə bağlı bəyanatlar səsləndirsinlər. Əbəs deyil ki, Sankt-Peterburqda keçirilən MDB dövlət başçılarının qeyri-rəsmi sammitində Putunlə danışığında Paşinyan aşkar şəkildə Rusiya sülhməramlılarının Qarabağda öz işlərinin öhdəsindən gələ bilmədiklərini bildirdi. Əslində bu, Paşinyanın sözləri deyil, bu məhz Qərbin Paşinyana diqtə etdiyi sözlərdir ki, Paşinyan vasitəsilə Putinə çatdırılıb. Ermənistan rəsmiləri ilk dəfə deyil ki, bu cür təxribatçı bəyanatlar səsləndirir. Qriqoryanın məlum fikirləri səsləndirməsi və Peskovun həmin fikirləri təxribat adlandırması məhz bu kimi faktorlara söykənir. Peskov bu açıqlama ilə Ermənistanın təxribatçı dövlət olduğuna işarə vurub.
Rusiya bütün rıçaqları əlində saxlamağa çalışır. Nəzərə alsaq ki, 30 ildən çoxdur Ermənistan Rusiyanın qucağında bəslənir. Yəni bugünkü Ermənistanın ayaqda qalmasının, ümumiyyətlə xəritədə mövcud olmasının əsas səbəbkarlarından biri məhz Rusiyanın himayədarlığı olub. Təbii ki, Rusiya Ermənistanın Qərb limanına doğru yan almasına boş dayanmayacaq və əlinə düşən hər fürsətdə Ermənistana qarşı öz təzyiqlərini artıracaq. Yaxın zamanlarda biz Rusiyanın Ermənistana qarşı daha sərt mövqe sərgiləyəcəyini gözləyə bilərik. Bəli, Rusiyanın hazırda Ukraynada ciddi müharibə böhranı ilə üz-üzə qalması, yəni Kremlin Qarabağda, Cənubi Qafqazda ikinci cəbhə açmasına mane olur. Lakin bununla yanaşı Rusiya yaxşı bilir ki, artıq Azərbaycan da əvvəlki Azərbaycan deyil, Cənubi Qafqazda da siyasi güc və siyasi dayanıqlıq məhz Azərbaycanın tərəfindədir”.
R.Rəsulov deyir ki, həm də Cənubi Qafqazda Türkiyə faktoru var və bu baxımdan Rusiya Cənubi Qafqazda özünü saxlamaq üçün həm Azərbaycanla, həm də Türkiyə ilə daha isti münasibətlər quracaq. R.Rəsulovun fikrincə, bununla da Ermənistana müxtəlif tərəflərdən zərbələr endirməli olacaq. R.Rəsulovun sözlərinə görə, Türkiyənin də Qərblə münasibətini nəzərə alsaq, Qərbin Cənubi Qafqazda özünə yer etməsi mümkünsüz görsənir. “Yəni Ermənistan bu dəfə Qərbin ağuşuna atılmaqla özünü daha çətin vəziyyətə salır. Biz yaxınlarda Ermənistanın daha acınacaqlı vəziyyətə düşməsinin şahidi olacağıq. Qriqoryan kimilərin bəyanatları Ermənistanı uçuruma doğru aparır” - deyə R.Rəsulov vurğuladı.
İradə SARIYEVA
