Son günlərdə Naxçıvanda bir sıra islahatlar aparılır. Bunun davamı olaraq Muxtar Respublika ilə bağlı yeni qərarların imzalanacağı da gözlənilir.
Artıq sosial şəbəkələrdə və bir sıra saytlarda Naxçıvan Muxtar Respublikası Daxili İşlər Nazirliyinin ləğv ediləcəyi ilə bağlı məlumatlar yayılıb və bununla bağlı müvafiq tapşırıqların verildiyi bildirilir. Belə ki, Naxçıvan DİN-in əvəzinə Azərbaycan DİN-in tabeliyində Naxçıvan Baş Polis İdarəsi yaradılacaq.
İdarəyə kimin rəis təyin olunacağına da aydınlıq gəlib. Əldə etdiyimiz məlumata görə, bu postun Suraxanı rayon Polis İdarəsinin rəisi, polis polkovniki Süleyman Nemətova həvalə olunacağı gözlənilir.
Qeyd edək kii, Süleyman Nemətov Suraxanıdan əvvəl Sumqayıtda polis rəisinin müavini, Qubada isə rəis kimi fəaliyyət göstərib.
Xatırladaq ki, son bir ayda Naxçıvanın həm Dövlət Təhlükəsizliyi Xidməti (DTX), həm də Dövlət Gömrük Komitəsi ləğv edilərək müvafiq olaraq Dövlət Təhlükəsizliyi Xidmətinin Naxçıvan Baş İdarəsi və Naxçıvan Baş Gömrük İdarəsi yaradılıb.
Naxçıvan DİN-lə bağlı belə bir islahatın aparılması nə dərəcədə vacibdir?
Ehtiyatda olan polis polkovniki Şəmsəddin Əliyev “Bakı-Xəbər”ə açıqlamasında bildirdi ki, Naxçıvan MR-də bəzi qurumlara bu şəkildə müstəqiliyin verilməsi doğru deyil: “ Bu, ölkənin Konstitusiyasındakı unitarlıq prinsiplərinə ziddir. Sanki fedarasiya modeli tətbiq edilirdi. Nazirliklərin eyni səlahiyyətli dublikatının düzəldilməsi doğru addım olmayıb. Aparılan son islahatları təqdir edirəm. Bəzi mühüm qurumların mərkəzi icra hakimiyyətinə tabe etdirilməsi çox doğrudur. Daxili İşlər nazirliyi ilə bağlı atılacaq bu addım da zəruridir. Eyni zamanda, normativ hüquqi addımların qəbul olunması, onların tələblərinin yerinə yetirilməsində çevik mexanizmə keçidi təmin edəcək. Baş İdarə olarsa, onların hesabatlığı mərkəzlə olacaq. Bu şəkildə islahatların həyata keçirilməsinin ölkə üçün yalnız faydası olacaq”.
Ekspertin sözlərinə görə, Naxçıvanın statusu ləğv edilməsə də, idarəetmədə əhəmiyyətli dəyişikliyə artıq başlanılıb: “Gömrük Komitəsi və DTX ləğv edilib, onların bazasında mərkəzə tabe olan baş idarələr yaradılıb. Prosesin davamında Naxçıvanı “ayrıca dövlətə” çevirən bütün strukturların, nazirlik və komitələrin ləğvi qaçılmazdır. Bütün nazirliklər, komitələr, xidmətlər ləğv edilərək, Bakıya tabe baş idarələr və yerli qurumlarla əvəzlənəcək. Nəticədə Naxçıvanda məmur ordusu əhəmiyyətli dərəcədə ixtisar ediləcək ki, bu da büdcənin israfının qarşısını alacaq.
Yada salaq ki, yalnız DTX-nin ləğvi nəticəsində Naxçıvana ayrılan dotasiyanın məbləği 31 milyon manat azaldılmışdı.
Qurumların ləğvinin korrupsiya, rüşvətin azaldılması, süründürməçiliyin aradan qaldırılması, biznes və şəxsi təsərrüfatın inkişafına da səbəb olacağı gözlənilir”.
DTX, Naxçıvan Gömrük Komitəsinin (artıq ləğv edilib) Gömrük tariflərinin tənzimlənməsi və ödənişlər şöbəsinin rəisi Mənsur Əsgərovun 132 milyon, Naxçıvanın maliyyə naziri Rafael Əliyevin 144 milyon, Naxçıvan Şəhərsalma və Arxitektura Komitəsinin rəhbəri Hicran Rüstəmovun isə 212 milyon 361 min manat mənimsədiyi faktını üzə çıxarmışdı. Yalnız 3 qurumda ümumilikdə 488 milyon 361 min manat vəsait oğurlanıb ki, bu da Bakıdan Naxçıvana ayrılan illik dotasiyadan çoxdur və az qala Naxçıvanın 2021-ci il büdcəsinə bərabərdir.
Beləliklə, DTX-nin Naxçıvanda başladığı antikorrupsiya əməliyyatının ilk dalğası uğurla başa çatdı.
Növbəti dalğalarda struktur islahatlarının dərinləşməsinə və dövlətdən oğurlanan vəsaitlərin geri qaytarılmasına şahidlik edə bilərik.
Məhəmmədəli QƏRİBLİ
