Separatçıların Qarabağda faydalı qazıntı yataqlarını qanunuz istismar etməsi nəticəsində Azərbaycan dövlətinə vurulan maddi, ekoloji, mənəvi ziyanı hesablamaqla bitməz. Çünki bu zərərin həcmi, miqyası çox böyükdür. Separatçılar Qarabağ bölgəsində təbii sərvətlərimizi, faydalı qazıntı yataqlarımızı talayır. Şübhəsiz, separatçıların bu cinayəti cəzasız qalmalı deyil.
Azərbaycan dövləti xeyli müddətdir ki, onların bu qanunsuz əməllərinin qarşısını almaq üçün tədbirlər görür, müxtəlif addımlar atır.
Xarici işlər naziri Ceyhun Bayramov ilin yekunlarına dair keçirilən mətbuat konfransında Trend-in sualını cavablayarkən bildirib ki, Azərbaycan beynəlxalq ekspertləri də Qarabağda yataqların istismarına cəlb edib. “Qarabağda təbii yataqların istismarı ilə bağlı azərbaycanlı mütəxəssislərlə yanaşı, beynəlxalq ekspertlər də cəlb olunub və hesablamalar aparılır”.
C.Bayramov əlavə edib ki, bu istiqamətdə işlər aparılır və həmin o faktlar Azərbaycanın Ermənistana qarşı dövlətlərarası iddiasının tərkib hissəsidir.
Beynəlxalq ekspertlərin bu prosesə cəlb edilməsinin bizim üçün əsas faydası nə olacaq? Onların burada iştirakı bizə nə verəcək? Bu ekspertlər vasitəsilə Vardanyanın və onun dəstəsinin qanunsuz istismar əməllərinə qarşı etiraz səsimizi beynəlxalq aləmə çatdıra biləcəyikmi?
“...Hesab edirəm ki, bu doğru və yerində atılan bir addımdır”
Beynəlxalq Münasibətlərin Təhlili Mərkəzinin aparıcı məsləhətçisi, siyasi elmlər üzrə fəlsəfə doktoru Mətin Məmmədli “Bakı-Xəbər”ə şərhində bildirdi ki, xarici işlər naziri Ceyhun Bayramovun bu fikirlərinin iki tərəfi var, bu fikirlərə həm siyasi, həm də hüquqi aspektdən yanaşılmalıdır: “Hüquqi tərəf budur ki, Ermənistan, ermənilər yalnız bu gün deyil, son 30 il ərzində Qarabağ bölgəsində, eləcə də hazırda azad olan bölgələrimizdə təbii yataqlarımızın qanunsuz istismarını həyata keçirib. Bu qanunsuz istismarı həyata keçirməklə həm Azərbaycan qanunlarını, həm beynəlxalq hüquq normalarını kobud şəkildə pozub. Yəni cinayətkar bir fəaliyyət göstərib. Təbii ki, beynəlxalq ekspertləri bura dəvət etmək həm də Ermənistanın bu qanunsuz, cinayətkar fəaliyyətinə diqqəti cəlb etmək məqsədi daşıyır. Bilirsiz ki, Azərbaycan artıq Ermənistanı ölkəmizə qarşı həyata keçirdiyi insanlıq əleyhinə və bir sıra digər cinayətlərə görə beynəlxalq məhkəməyə verib. Bu məhkəmə iddiaları, sözsüz ki, davam edəcək. Bu baxımdan, həmin ekspertlərin prosesə cəlb edilməsi və bütün bu işlərə şahid olması, hesab edirəm ki, yerində atılan bir addımdır.
Eyni zamanda bu məsələnin siyasi tərəfi də var”.
M.Məmmədlinin sözlərinə görə, bu gün Ermənistan, ermənilər, dünya erməniliyi, bütövlükdə erməni diaspor və lobbi qrupları, Ermənistana himayəçilik edən bir sıra dövlətlər, dairələr ölkəmizə qarşı qarayaxma kampaniyası aparır: “Onlar ölkəmizi əsassız olaraq Qarabağdakı ermənilərin hüquqlarını pozmaqda, onları guya “humanitar blokadaya” almaqda ittiham edirlər, belə iddialar irəli sürürlər. Amma təbii ki, bu iddiaların heç bir əsası yoxdur. Beynəlxalq ekspertlərin də dəvət edilməsində məqsəd ondan ibarətdir ki, əslində Qarabağda nə baş verdiyini öz gözləri ilə görüb şahid olsunlar. Yəni Azərbaycan dövlətinin iddiaları, mövqeyi tamamilə beynəlxalq hüquq normalarına, siyasi qaydalara uyğundur. Bizim tələbimiz ondan ibarətdir ki, Azərbaycanın təbii sərvətləri, faydalı qazıntı yataqları yalnız dövlətimizin icazəsi ilə istismar edilə bilər. Azərbaycanın razılığı olmadan bu təbii sərvətlər istismar edilə bilməz. Məhz bunlara görə beynəlxalq ekspertlər dəvət olunublar ki, onlar bu məsələyə öz obyektiv qiymətlərini versinlər. Yenə də fikrimi təkrar etmək istəyirəm, hesab edirəm ki, bu doğru və yerində atılan bir addımdır, mövqedir”.
M.Məmmədlinin fikirlərindən belə qənaətə gəlirik ki, beynəlxalq ekspertlərin prosesə cəlb edilməsinin həm siyasi, həm də hüquqi baxımdan bizim üçün böyük faydaları var. Əlbəttə, bu addım uzun müddətdir ki, dünyanı dolaşan erməni yalanlarının, kampaniyaçılığının sarsılmasına da təsir göstərəcək.
İradə SARIYEVA
