QHT təmsilçilərinin Laçın yolunda təşkil etdikləri aksiya mühüm əhəmiyyətə malikdir. Onların əsas tələbi təbii sərvətlərimizin talanmasına son verilməsi və ekoloqların monitorinqinə şərait yaradılması olsa da, bu aksiya daha geniş spektrli məsələləri əhatə edir və çox şeyə aydınlıq gətirə bilər.
Etirazçıların əsas tələbi hələlik yerinə yetirilməsə də, müəyyən nəticələr artıq var. KİV-də Ermənistan Baş nazirinin əmri ilə Qarabağ ərazisində qalan ağır hərbi texnikanın çıxardılmasına başlanıldığı barədə məlumatlar yayılır. Bu addımın Rusiya prezidenti ilə telefon danışıqlarından sonra atılması da çox şeyi aydınlaşdırır.
Məlumdur ki, bu gün Ermənistan rəhbərliyi Rusiyanın ətəyindən yapışaraq onun vasitəsi ilə öz məqsədlərinə nail olmaq istəyir. Hətta Soçi danışıqları ərəfəsində Paşinyan Putinə müraciət edərək, Rusiya rəhbərliyinin öz mövqeyində axıra qədər möhkəm dayanmasını xahiş etmişdi. Ancaq həmin danışıqlar onun ümidlərini doğrultmadı və Putin ermənilərin istəklərinin heç birini reallaşdıra bilmədi.
N.Paşinyan növbəti zərbəni KTMT-nin İrəvan sammitində aldı və ermənilərin çox ümid etdikləri tədbir nəticəsiz başa çatdı.
Ekoloqlarımızın bu etiraz tədbiri Rusiya üçün növbəti, bəlkə də həlledici sınaq olacaq. Rusiya rəhbərliyi ermənilərin ümid etdiyi kimi davranıb Azərbaycanı qarşısına almağa cəsarət edəcəkmi? Monitorinqə imkan verilməməsi, QHT nümayəndələrinə qarşı zorakılıq edilməsi və özlərinin bağladıqları yolu guya güc nümayiş etdirərək açmaq cəhdi Azərbaycan-Rusiya münasibətlərinin tamamilə pozulması olacaq. Bundan sonra Rusiya sülhməramlılarının regionda qalması da, Rusiyanın vasitəçilik istəkləri də, “müttəfiqliyimiz” də mümkünsüz olacaq. Təbii ki, bu, Rusiya-Türkiyə münasibətlərinə də öz ağır təsirini göstərəcək.
Hər halda ümid edirəm ki, onsuz da ağır vəziyyətdə olan Rusiya rəhbərliyi ağıllı davranaraq daha düzgün yol seçməyə çalışacaq. Monitorinqə imkan verəcək, Ermənistan silahlılarının ərazimizdən çıxarılması və Qarabağ ermənilərinin silahlı dəstələrinin tərksilah olunması istiqamətində real addımlar atacaq, “Moskvalı provokator” R.Vardanyanı təcili Qarabağdan çıxaracaq və Azərbaycanın tələblərinin nəzərə alındığı sülh sazişi üzərində iş sürətlənəcək.
Bir daha təkrar etmək istəyirəm ki, bu düzgün addımlar o halda atılacaq ki, Rusiya rəhbərliyi ağıllı adamlar kimi davranmaq yolu seçəcək. Seçəcəkmi? Prezident Putin, nəhayət, ağlını başına yığacaqmı?
Bu məqamda bir sualı da özümüzə vermək məcburiyyətindəyik: Rusiya hakimiyyətinin 2022-ci il başlayandan indiyə qədər ağıllı adamlar kimi davrandığını xatırlayan varmı?
Abutalıb SƏMƏDOV
