“Şərq Tərəfdaşlığı” ölkələrinin xarici işlər nazirlərinin görüşünün yekunları üzrə keçirilən brifinqdə Avropa İttifaqının (Aİ) xarici siyasət və təhlükəsizlik məsələləri üzrə ali nümayəndəsi Cozep Borrel bəyan etdi ki, missiyanın işi əvvəldən göstərilən vaxtda başa çatacaq: “Ermənistan-Azərbaycan sərhədindəki Aİ missiyasının fəaliyyəti dekabrın 19-da başa çatacaq”.
Onun sözlərinə görə, oktyabrda yaradılmış missiya effektivliyini göstərib: “Lakin missiya həm Ermənistan, həm də Azərbaycanla razılaşmalara uyğun olaraq dekabrın 19-da öz işini başa çatdıracaq”.
O da məlumdur ki, Azərbaycan əzəldən Aİ missiyasının sərhədə göndərilməsinə qarşı olub. Oktyabr ayında bununla bağlı qərar veriləndə Azərbaycan həmin missiyanın bizim sərhəd daxilində monitorinq aparmasına razılıq vermədi. Dekabrın 19-da missiyanın fəaliyyəti başa çatır. Borrel iddia edir ki, missiya effektivliyini göstərib.
Maraqlıdır, missiyanın effektivliyi nədən ibarətdir? İkincisi, biz hesab edirik ki, sözügedən missiyanın effektivlikdən çox ziyanı oldu. Missiyanın bölgədə hansı ziyanlı rolu oldu? Ekspertlər bunu necə dəyərləndirir?
“Monitorinq missiyası ətrafında Ermənistan beynəlxalq müstəvidə Azərbaycana qarşı güclü təbliğat aparır”
Məsələyə münasibət bildirən AMİP funksioneri Əli Orucovun fikrincə, Aİ missiyasının monitorinqinin effektivliyi barədə deyilənlər mübahisəlidir: “Ona görə mübahisəlidir ki, monitorinq yalnız Ermənistan ərazisində aparılıb. Monitorinqin hansı parametrlər üzrə aparılması, obyektivliyin nə dərəcədə təmin olunması bəlli deyil. Çünki missiya gələndən Ermənistan onun fəaliyyətini yönləndirməyə çalışır, əvvəlcədən bəyan edirlər ki, bizim istəklərimizi ifadə edən hesabat hazırlanmalıdır. Bununla bağlı müxtəlif çağırışlar səsləndi. Həm rəsmi, həm də qeyri-rəsmi səviyyədə. Belə olan halda Borrel hansı effektivlikdən dəm vurur? İndidən təxmin edilir ki, monitorinqlə bağlı hazırlanacaq hesabat qərəzli və birtərəfli olacaq. Bunun ziyanlı tərəfinə gəldikdə isə, məsələnin təbliğat tərəfi diqqəti cəlb edir. Monitorinq missiyası ətrafında Ermənistan beynəlxalq müstəvidə Azərbaycana qarşı güclü təbliğat aparır. Belə saxta rəy yaradırlar ki, guya Azərbaycan təcavüzkar tərəf olduğu üçün sözügedən missiya fəaliyyətə başlayıb. Hesab edirəm ki, bunun təbliğat nöqteyi-nəzərindən bizə zərəri böyük oldu. Çünki erməni lobbisi, media resursları monitorinq missiyası üzərindən monipulyasiya ilə məşğul olurlar. Hazırda da bu siyasət davam edir. İstər-istəməz barəmizdə müəyyən yanlış fikir formalaşdırılır. Əfsuslar olsun ki, Avroittifaq Ermənistanın monitorinqlə bağlı tələblərinə birtərəfli yanaşdı”.
Vidadi ORDAHALLI
