“Landmark” Plaza nə səfirlik, nə də Avropa İttifaqının Bakıdakı nümayəndəliyi ilə sözügedən filmin təqdimatı üçün razılığa gəlib”. Bu barədə “Landmark”dan mətbuatın sorğusuna cavab olaraq bildirilib.
Plazadan bildirilib ki, səfirliyin yaydığı məlumat həqiqəti əks etdirmir: “Bizdə belə bir təqdimat baş tutmayacaq. Ümumiyyətlə, hər hansı bir tədbir keçirildikdə əvvəlcədən mövzu barədə məlumat əldə edirik. Əgər tələblər uyğun gəlmirsə, razılaşma olmur. “Odda-İki bacı” filmi barədə bizə müraciət belə edilməyib”.
“Cinema Plus” kinoteatrlar şəbəkəsinin müşahidə şurasının sədri Zaur Darabzadə isə “Azərbaycanda kütləvi yayımlanan filmlər Mədəniyyət Nazirliyindən yayım vəsiqəsi almalıdır”-deyib.
O qeyd edib ki, hər hansısa filmin yayım vəsiqəsi yoxdursa, onu nümayiş etdirmək qadağandır:
“Qeyd olunan “Odda - İki bacı” filminin yayım vəsiqəsi yoxdur. Türk qardaşlığına zərər verən filmlərin yayımına qarşıyıq”.
Qeyd edək ki, noyabrın 30-da Almaniyanın Azərbaycandakı səfirliyi Avropa İttifaqı ilə birlikdə hazırladıqları “Odda - İki bacı” filminin nümayişinin “Landmark” Plazada təqdim edilə biləcəyinə dair məlumat yaymışdı. Sonra isə rəsmi şəkildə açıqlandı ki, Aİ-nin Azərbaycandakı nümayəndəliyindən bildirilib ki, Avropa Film Festivalı çərçivəsində "Odda - İki bacı" filminin dekabrın 5-nə planlaşdırılan nümayişi ləğv edilib.
Bildirək ki, filmdə PKK terrorçu qruplaşmasının təbliğinə yer verildiyi üçün səfirliyin bu addımı cəmiyyətdə birmənalı qarşılanmayıb. Belə ki, hadisədən xəbər tutan vətəndaşlar Almaniya və Yunanıstan istehsalı olan filmin nümayişinə qarşı çıxaraq “Landmark” Plazanın qarşısında toplaşıb etiraz aksiyası keçiriblər.
Onlar əllərində tutduqları plakatlarla Türkiyəyə dəstək nümayiş etdirib, "Terrora son!", "Yaşasın Azərbaycan, Türkiyə!" şüarlarını səsləndiriblər.
Onu da qeyd edək ki, anti-Türkiyə mövzusunda lentə alınmış bu filmi nümayiş etdirməkdən Bakı kinoteatrları imtina edib.
Məlumatlara görə, Almaniyanın Azərbaycandakı səfirliyi Facebook səhifəsində bu barədə qeyd verib: “Təəssüf ki, film haqqında yanlış təəssürat yaranıb. Filmdə uzun illərdir bir-birindən ayrı düşmüş iki miqrasiya keçmişi olan bacının şəxsi hekayəsindən bəhs edilir. Almaniyada insanların təxminən dörddə-biri miqrasiya keçmişinə malikdir, öz ailələrinin mənşəyi və şəxsiyyət sualları ilə maraqlanırlar. Bu səbəbdən də filmin alman cəmiyyəti üçün xüsusi aktuallığı var. Filmin məqsədi məhz bu idi və buna görə də Azərbaycanda nümayişi planlaşdırılırdı. Landmark kinoteatrı son həftələr Aİ Film Festivalı çərçivəsində dəfələrlə filmlər nümayiş etdirib və buna görə də “Odda-İki bacı” filminin nümayişi üçün də nəzərdə tutulmuşdu. Nəzərinizə çatdırmaq istəyirik ki, Landmark kinoteatrı bu film nümayişinin təşkilatçısı deyil”.
Gördüyünüz kimi, “Landmark” Almaniya səfirliyinin yaydığı məlumatı təkzib edib. Buradan açıq görsənir ki, Almaniya səfirliyi özünün PKK təbliğatına və anti-Türkiyə kampaniyasına Azərbaycan şirkətini də qatmaq istəyib, amma alınmayıb. Əlbəttə, Azərbaycanda heç bir təşkilat, heç bir şəxs qardaş Türkiyənin əleyhinə olan istənilən təxribatın həyata keçirilməsinə imkan verməz, necə ki, vermədi və heç zaman da verməyəcək.
“Onlar “Odda - İki bacı” anti-Türkiyə filmini Azərbaycanda nümayiş etdirməyə cəhd etməklə iki qardaş ölkə arasında nifaq toxumu səpmək istəyiblər”
Analitik-ekspert, yazıçı – kultroloq Aydın Xan Əbilov “Bakı-Xəbər”ə şərhində bildirdi ki, Azərbaycan və Türkiyə iki qardaş ölkədir. “Biz artıq mənəvi cəhətdən birləşmiş böyük Turanın, belə demək mümkünsə, kiçik variantıyıq. Əlbəttə, belə birliyə qısqanclıqların olması təbiidir. Azərbaycan və Türkiyə birliyinə həm Cənub, həm Şimalı qonşularımızdan, həm də Qərbdən, Avropadan gələn qısqancılığı görürük. Bunu təbii qarşılamlıyıq. Artıq kreativ variantlarda, formalarda bu qısqanclıqlarını biruzə verirlər. Onlardan birini də Almaniya və Avropa Birliyinin birgə hazırladığı sözügedən filmlə bağlı məsələdə gördük. Onlar “Odda - İki bacı” anti-Türkiyə filmini Azərbaycanda nümayiş etdirməyə cəhd etməklə iki qardaş ölkə arasında nifaq toxumu səpmək istəyiblər. Amma gördüyünüz kimi səfirliyin bu təxribatı baş tutmadı, istəklərinə nail ola bilmədilər”.
A.X.Əbilov qeyd etdi ki, son 50 ildə Almaniyaya həm Türkiyədən, həm İraqdan, həm Suriyadan axın edən kürd əsilli diaspor var, o diaspor artıq iqtisadi cəhətdən möhkəmlənib: “Bunlar qardaş Türkiyəyə və Azərbaycana qarşı müəyyən təxribatlarla məşğuldurlar. Bunların hədəfi Türkiyə əleyhinə çəkdikləri və PKK-nı tərənnüm etdirdikləri filmi nəinki Azərbaycanda, hətta Türkiyədə də belə müxtəlif festivallar çərçivəsində nümayiş etdirmək olub. Lakin ictimaiyyətin ayıqlığı nəticəsində Azərbaycanda bu təxribat baş tutmadı. Azərbaycan cəmiyyəti, kinosevərləri, mediası bu məsələyə çox sərt reaksiya verdi, bu təxribatı planlayanlar xalqın etirazı qarşsında geri çəkildilər. İndi də Almaniya Səfirliyi açıqlama yayıb ki, filmin nümayişi ləğv olunub. “Landmark” da məsələ ilə bağlı açıqlama yayıb Almaniya səfirliyinin açıqlamasını inkar edib, bunun həqiqətə uyğun olmadığını deyib. Mədəniyyət Nazirliyinin də açıqlaması oldu. Fikrimcə, Mədəniyyət Nazirliyi bununla bağlı sərt qərar da qəbul etməlidir. Kinolara lisenziya verən, filmlərin Azərbaycan ərazisində nümayişinə rəsmi icazə verən Mədəniyyət Nazirliyinin aidiyyəti qurumu bununla bağlı rəsmi surətdə bu filmin Azərbaycanda nümayişini təşkil edənlərə etirazını bildirməlidir. Almaniya səfirliyinə rəsmi etiraz notası da verilməlidir ki, bir də belə səhvlərə yol verilməsin”-deyə A.X.Əbilov qeyd etdi.
İradə SARIYEVA
