Oktyabrın 2-də Cenevrədə Azərbaycan və Ermənistan xarici işlər nazirləri arasında ikitərəfli görüş keçirilib. Görüş avqustun 31-də Brüsseldə Azərbaycan Prezidenti İlham Əliyev və Ermənistan Baş naziri Nikol Paşinyan arasında Avropa İttifaqı Şurasının prezidenti Şarl Mişelin iştirakı ilə keçirilmiş görüşün nəticəsində xarici işlər nazirlərinə sülh müqaviləsinin mətninin hazırlanması barədə verilmiş tapşırığa uyğun olaraq təşkil edilib.
Azərbaycan Xarici İşlər Nazirliyinin Mətbuat xidməti idarəsinin bəyanatında deyilir ki, nazir Ceyhun Bayramov səylərin post-münaqişə dövründə Azərbaycan və Ermənistan arasında dövlətlərarası münasibətlərin tənzimlənməsinə və sülh müqaviləsinin imzalanmasına yönəldilməsinin əhəmiyyətli olduğunu vurğulayıb:
“Nazir bu xüsusda, tərəfimizdən təklif olunmuş beş baza prinsipləri əsasında müqavilənin elementlərini detallı şəkildə Ermənistan tərəfinin diqqətinə çatdırıb. Görüş zamanı, delimitasiya olunmamış sərhəddə baş vermiş gərginliyi nəzərə alaraq, delimitasiya üzrə ikitərəfli komissiyanın növbəti iclasının əvvəlcədən razılaşdırıldığı kimi cari ilin noyabr ayında deyil, oktyabr ayında keçirilməsi Azərbaycan tərəfindən təklif olunub”.
Bildirilir ki, nazir Bayramov Azərbaycan, Ermənistan və Rusiya liderləri tərəfindən imzalanmış üçtərəfli bəyanatlara və liderlər arasında əldə edilmiş razılıqlara uyğun olaraq Ermənistan silahlı qüvvələrinin Azərbaycan ərazisindən tam çıxarılmasının, Baş nazirlərin müavinlərinin rəhbərliyi ilə üçtərəfli komissiya çərçivəsində əldə olunmuş ilkin razılaşmalar əsasında nəqliyyat-kommunikasiya xətlərinin qısa müddətdə açılmasının, delimitasiya üzrə işdə irəliləyiş əldə edilməsinin zəruriliyini vurğulayıb.
Ermənistan Xarici İşlər Nazirliyi bildirir ki, tərəflər Ermənistan və Azərbaycan arasında sülh müqaviləsi, Dağlıq Qarabağ ermənilərinin hüquq və təhlükəsizlik təminatlarının təmin edilməsi, o cümlədən Xankəndi və Bakı arasında müzakirə mexanizminin yaradılması ilə bağlı fikir mübadiləsi aparıblar. Ölkələrin suverenliyi və yurisdiksiyası altında regional nəqliyyat marşrutlarının blokdan çıxarılmasına dair qarşılıqlı anlaşma müsbət qiymətləndirilib”.
Maraqlıdır ki, görüşdə “Bakı-Xankəndi müzakirə mexanizmi” ətrafında danışğın aparıldığı bildirilir. Bu nə anlama gəlir?
Politoloq Yeganə Hacıyeva “Bakı-Xəbər”ə açıqlamasında bildirdi ki, Bakı və Xankəndi müzakirəsindən əvvəl həmin görüşdə ətrafında real danışıqların aparıldığı mövzular barədə danışmaq lazımdır: “Həmişə olduğu kimi, bunlarla Ermənistan XİN-in elan etdiyi mövzular arasında ziddiyyətlər mövcuddur. Xalqların yaxınlaşması istiqamətində aparılan danışıqlara “Bakı-Xankəndi müzakirəsi” adını vermək sırf erməni maraqlarına və daxili auditoriyaya təqdim olunması cəhdidir. Rəsmi Bakının Qarabağdakı öz vətəndaşları ilə təmaslarının olması hər zaman müzakirə mövzusu olub. Bu müzakirə mövzularında Azərbaycan hər zaman hüququn verdiyi imkanlardan istifadə etməklə, erməni əsilli vətəndaşlarımıza tətbiq ediləciyə ilə bağlı yanaşmalar ortaya qoyub. Biz bunu öz daxili işimiz hesab etmişik. İstənilən kənar təsir cəhdlərində həmin vətəndaşlarımızın da konstitusion haqlarının olduğunu bəyan etmişik. Bunun Xankəndi-Bakı müzakirəsi kimi göstərilməsi manipulyasiya cəhdindən başqa nəsə deyil. Bu mərhələ üçün vacib olan sərhədlərin demarkasiyası və delimitasiyası daha vacibdir. Bu və digər humanitar məsələlər ətrafında müzakirələr aparılıb. Bunların içində Azərbaycan öz erməni əsilli vətəndaşlarının taleyi barədə nəyisə qeyd edibsə, buna başqa ad vermək doğru deyil. Xankəndi Azərbaycanın ərazisinə aid olan bir subyektdir. Azərbaycan dövləti imkan verməz ki, onun hansısa şəhəri rəsmi hakimiyyətlə qarşı tərəf kimi müzakirə aparsın”.
Məhəmmədəli QƏRİBLİ
