ATƏT-ə sədrlik edən Polşanın xarici işlər naziri Zbiqnev Rau Fransanın xarici işlər naziri Ketrin Kolonna ilə təşkilatın missiyasının Ermənistan-Azərbaycan sərhədindəki münaqişə zonasına göndərilməsi imkanlarını müzakirə edib.
Bu barədə Polşa Xarici İşlər Nazirliyi məlumat yayıb:
“Ermənistan və Azərbaycan sərhədində son hadisələr və bu regiona ATƏT-in missiyasının göndərilməsinin potensial imkanları müzakirə edilib”.
Xatırladaq ki, sentyabrın 12-də gecə saatlarında Ermənistan silahlı qüvvələrinin bölmələri Azərbaycan-Ermənistan dövlət sərhədinin Daşkəsən, Kəlbəcər və Laçın istiqamətlərində genişmiqyaslı təxribat törədib. Ermənistan silahlı qüvvələrinin diversiya qrupları sutkanın qaranlıq vaxtında ərazinin dağlıq relyefi və mövcud dərə boşluqlarını istifadə edərək müxtəlif istiqamətlərdə Azərbaycan Ordusunun bölmələrinin mövqeləri arasındakı ərazilərin və təminat yollarının minalanmasını həyata keçirib.
Bu missiyanın regiona gəlişi nə vəd edir, proseslərdə hansı rolu oynaya bilər?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, ATƏT-in müşahidə qrupunun regiona gəlməsi məsələsi keçən ilin may ayından Ermənistan tərəfindən qaldırılıb: “Hətta şərt olaraq irəli sürülmüşdü ki, hər iki tərəfin ordusu sinxron şəkildə geri çəkilir və arada ATƏT-in, yaxud KTMT-nin müşahidə qrupu yerləşir. Ermənistan o vaxt məsələ qoymuşdu ki, əgər bu şərt qəbul olunmasa delimitasiya işləri başlanmayacaq. Ancaq sonradan o şərtdən imtina etmək məcburiyyətində qaldı və komissiya yarandı. Düzdür, ləngitmək üçün əlindən gələni etdi. Bu gün də bu proses davam edir. Lakin sonuncu sentyabr hadisələrindən sonra dünyada müəyyən qədər ermənilərin xeyrinə yaranmış ictimai rəydən istifadə edib yenə bu məsələni qaldırdılar və ola bilər ki, ATƏT-in missiyası erməni və Azərbaycan ordularının arasında yerləşməyə cəhd göstərsin. Rusiya buna qəti şəkildə etiraz elədi və şübhə yoxdur ki, Ermənistanı cəzalandırmaq üçün müəyyən addımlar atıla bilər. Missiya hansısa bir işi görə bilərmi? Elə bir real iş görə biləcəyinə inanmıram. Azərbaycanın artıq öz məqsədlərinə uyğun sülh sazişinin imzalanması sürətlənib. Delimitasiya məsələlərində artıq ermənilərin ləngimə imkanları kifayət qədər məhduddur. Ona görə də, missiyanın gəlişi heç nəyi dəyişə bilməz. Rusiya-Ermənistan münasibətlərini kifayət qədər poza bilər. Onsuz da münasibətlər yaxşı səviyyədə deyil və Paşinyanın sonuncu bəyənatları da göstərdi ki, artıq açıq şəkildə Rusiyadan narazılığını dilə gətirməyə cəsarət edir. Həm KTMT-nin olmaması barədə bəyanat verdi, həm müttəfiqimiz pulumuzu alıb, silahımızı vermir dedi. Düzdür, sonradan iddia etdi ki, Rusiyanı nəzərdə tutmayıb. Ancaq Ermənistanın başqa silah satan müttəfiqinin olmadığı bəllidir. Ona görə də bu missiyanın gəlişi Rusiya-Ermənistan münasibətlərini bir az da sərinləşdirəcək. Bu da bizim xeyrimizədir. Arabir ola bilsin ki, ermənilərin xeyrinə hansısa bəyənatlar da verə bilərlər. Bundan o tərəfə keçə bilməz. Ermənilərin bu missiyanın gəlişi ilə bağlı ümid etdiyi ciddi nəticələr ortaya çıxa bilməz və çıxmayacaq”.
Məhəmmədəli QƏRİBLİ
