ABŞ Konqresinin Erməni Məsələləri üzrə Komissiyasının həmsədri Frenk Palloni “Amerikanın Səsi” radiosuna müsahibəsində bildirib ki, Ermənistan vətəndaşları son bir neçə həftə ərzində Rusiya tərəfindən tərk edildiyini hiss ediblər:
“Onlar Təhlükəsizlik Müqaviləsindən istifadə etməyə çalışdılar, lakin görünür, Rusiya tərəfi yardım göstərmədi. Onlar ümid edirdilər ki, Rusiya Azərbaycanın bu təcavüzünün qarşısını alacaq, amma bu baş vermədi. Fikrimcə, Ermənistan hökuməti özünü Rusiya tərəfindən tərk edilmiş hiss edir və ABŞ-ın daha çox dəstək verə biləcəyinə ümid edir və biz bunu etməyə çalışırıq”.
F.Palloni onu da vurğulayıb ki, Rusiya Ukrayna ilə o qədər məşğuldur ki, hazırda Ermənistana kömək etmək arzusu və imkanı yoxdur. Daha sonra F.Pallonu bir az da irəli gedərək qeyd edib ki, Azərbaycan Ermənistan ərazisinin müəyyən hissəsini ələ keçirib və yeni hücumlarla hədələməkdə davam edir: “Azərbaycanın aqressiyasının qarşısını yalnız ABŞ ala bilər”.
Burada maraqlı olan məqam odur ki, Ermənistan rəsmi olaraq konqresmenin bu fikirlərinə reaksiya verməyib. Çünki əgər doğrudan da Rusiya ilə özünü dost hesab edirsə, Ermənistan F.Palloninin fikirlərinə ən az reaksiya verə bilərdi ki, Rusiya bizi atmayıb və s. Hansısa erməni rəsmisinin buna münasibət bildirməsi elə də çətin bir iş deyildi. Görünən odur ki, reaksiyanın olmaması bir daha Ermənistanın ikibaşlı oyun oynadığını ifadə edir. Yəni əslində Palloninin belə bəyanatlarında Ermənistan özü də iştirak edir.
“Palloni kimi konqresmenlərin çıxışları da bu işin tərkib hissəsidir”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov Ermənistanın Palloninin fikirlərini görməzdən gəlməsinə bir neçə aspektdən yanaşdı: “Əvvəla, F.Palloni ABŞ Konqresində erməni məsələsi ilə bağlı komissiyanın sədridir və onun ermənipərəst mövqedən çıxış etməsində təəccüblü heç nə yoxdur. Lakin konqresmen olaraq Palloninin bəyanatı ABŞ-ın Azərbaycana dair müəyyən etdiyi strateji kursa qarşı çıxması deməkdir. Bu səpkili çıxışlara Cənubi Qafqazda ABŞ-ın görmək istədiyi sülh və sabitliyin bərqərar edilməsinə deyil, əksinə, onun təhdidinə, sabitliyin pozulmasına xidmət edəcək mexanizmlərin işə düşməsinə xidmət edir. Düşünürük ki, bu kurs Azərbaycanla enerji təhlükəsizliyi sahəsində əməkdaşlğa, bir qayda olaraq, böyuk önəmlə yanaşan və dövlətimizin beynəlxalq terrorizmə qarşı mübarizəyə dəstək verən mövqeyinə yuksək dəyər verən rəsmi Vaşinqtonun mövqeyi deyil. Lakin o da bəllidir ki, ABŞ regionda Azərbaycan ordusunun qələbəsindən sonra yaranmış yeni geosiyasi reallıqlardan məmnun deyil. Ukraynada vaxtilə ABŞ strateqləri tərəfindən cızılmış yeni dünya nizami ilə ssenarini realizə etməyə çalışdığı kimi Cənubi Qafqazda da eyni layihənin həyata keçirilməsinə çalışır. Ermənistan iqtidarının söz və əməlləri arasindaki ziddiyyətli çağırış və mövqelərə görə məhz rəsmi Vaşinqton məsuliyyət daşıyır. Rusiya ətrafında “Anakonda” əməliyyatının həyata keçirilməsinə çalışan ABŞ təmsil olunduğumuz regionda, habelə MDB və bütünlükdə keçmiş kommunist məkanında Moskva ilə qarşıdurmanı gücləndirir. Cənubi Qafqazda demokratiyaya yardım adı altında ABŞ-ın əvvəlcə Gürcüstanı, bu gün isə Ermənistanı Rusiya ilə qarşıdurmaya sürükləməsi bütünlüklə MDB məkanında özünün təsir dairəsini böyütmək istəyir. Rusiyanın nufuz dairəsini daraltmaq, onun satış bazarları və geostrateji əhəmiyyət kəsb edən bölgələr üzərində nəzarətini gücləndirmək istəklərindən irəli gəlir. ABŞ Azərbaycanın təkbaşına Ermənistanla demarkasiya siyasətini aparmaq istəklərinə qarşı rəsmən çıxmasa da, arxada Azərbaycanı durdurmaq, ona mane olmaq üçün ardıcıl şəkildə bölgədə sabitliyin təmin olunması ilə bağlı proseslərə qurşaqdan aşagı zərbələr endirir. Məhz ABŞ-da Dövlət Departamenti və Pentaqon rəsmiləri ilə keçirilən göruşlərdən sonra Ermənistanın hərəkətlərində müharibə ritorikasının artması müşahidə olunur. Zamanında Paşinyanı Ermənistanda hakimiyyətə gətirməklə ABŞ özünün qrant diplomatiyası vasitəsilə qonşu ölkədəki ictimai rəyi öz xeyrinə dəyişmək və anti-Rusiya ovqatını gücləndirmək üçün planlı şəkildə iş aparir. Palloni kimi konqresmenlərin çıxışları da bu işin tərkib hissəsidir”
Politoloqun fikrincə, Paşinyan hələ müxalifətdə olarkən Ermənistanın Avrasiya İqtisadi İttifaqından və KTMT-dən çıxması təşəbbüsü ilə çıxış edib: “Paşinyan indi məhz ABŞ-ın təhriki ilə sözdən əmələ keçməyi düşünür. Onun bu günlərdə İrəvanda İctimai kanala verdiyi müsahibədə 2023-cü ilin fevralınadək Ermənistanın KTMT-dən çıxa biləcəyi ilə bağlı mövqeyində ABŞ dəsti-xəttini görməmək mümkün deyil. Özü də Rusiyanı təhdid etmək, şantaj etmək ritorikası ilə. Paşinyan Rusiya-Ermənistan qarşısında müttəfiqlik borcunu yerinə yetirməzsə, rəsmi İrəvanın belə bir addım atacağını bəyan edir. Sırf təxribat xarakterli bu bəyanatda bölgədə suyu bulandırmaq və bulaniq suda yankilərin balıq tutmaq sevdasi anlaşılandir. Əvvəla, bu ilk növbədə rəsmi Bakını həyata keçirdiyi siyasətə qarşı bir demarşdır. Zira bu ilin fevralında Rusiya ilə münasibətləri müttəfiqlik səviyyəsinə gətirən Azərbaycan müasir dövrun qlobal çağırışlarından birinə cavab verməklə özünün bir qütbdən dünyanı idarə etmək istəyənlərin yanında olmadığını bəyan etdi. Digər tərəfdən, Paşinyan və onu bu səpkili bəyənatlar verməyə sövq edən ABŞ analitikləri bütün bunların 2008-ci ildə Gürcüstana neçəyə başa gəldiyini unudublar. Tarixdən ibrət almaq istəməyənlərə isə Rusiya keçən həftə Ukrayna ərazisinin 22,4 faizini ilhaq etməklə bir daha dərs keçdi”.
Politoloq onu da əlavə etdi ki, Paşinyan özu bunun nə oldugunu 44 günlük müharibənin sonlarında anlamalı idi, amma görünür, hələ də anlamayıb.
Vidadi ORDAHALLI
