Ermənilər informasiya müharibəsində yenə də fəallaşıb. Harada, hansı şəraitdə və kim tərəfindən çəkildiyi bəlli olmayan videoya görə Azərbaycana qarşı misli görünməmiş informasiya hücumu edirlər.
Sosial şəbəkələrin erməni seqmentində paylaşılan erməni əsgərlərinin guya edam edilməsinin videosu bir tamaşadır və bunu ermənilər özləri qurublar. Hazırda Ermənistanın havadarı olan Fransanın əksər mediasında bu tamaşa - video paylaşılır və onun üzərindən Azərbaycana qarşı kampaniya başladılıb. Lakin qarşı tərəfin Azərbaycan əsgərləri olmasına dair heç bir dəlil yoxdur (dəbilqələr və çəkiliş keyfiyyətinin aşağı olması səbəbindən heç bir üz görünmür)
Görünən budur ki, müharibə bitsə də, ermənilər informasiya müharibəsini davam etdirir. Videonun yayılmasının məhz BMT-nin təsis etdiyi işgəncələr əleyinə beynəlxalq mübarizə gününə təsadüf etməsi bunun təşkil edilmiş bir provokasiya olduğunu sübut edir.
Bəllidir ki, Ermənistan xüsusi xidmət orqanları tərəfindən hazırlanan bu provokasiyada bir neçə məqsəd güdülə bilər. Birincisi, Ermənistan müharibədən sonra dünya ictimai rəyində rastlaşdığı uğursuzluqları bununla kompensasiya edir. İkincisi, Azərbaycanın terrorçu kimi həbs etdiyi hərbçilərinin tez bir zamanda geri təhvil verilməsini təmin etmək istəyir.
Azərbaycan XİN Ermənistanın hərbi cinayətlərlə bağlı səsləndirdiyi cəfəng bəyanatına cavab verib.
Məlumatda aşağıdakılar bildirilir: "Vurğulayırıq ki, Ermənistandan fərqli olaraq, Azərbaycan öz beynəlxalq öhdəliklərinə ciddi yanaşır və hərbi əməliyyatlar zamanı törədilən cinayətlərlə bağlı iddialar müvafiq dövlət qurumları tərəfindən araşdırılır.
Belə ki, 17 sentyabr 2022-ci ildə Azərbaycan Respublikasının Hərbi Prokurorluğu sosial şəbəkələrdə yayılan videoların həqiqi olub-olmaması, habelə videolardakı görüntülərin çəkildiyi zaman və məkan, onlarda əks olunan hərbi qulluqçuların şəxsiyyəti, eləcə də obyektiv həqiqətin müəyyən edilməsi üçün hərtərəfli araşdırmalara başlanıldığını bəyan edib.
Xatırladırıq ki, Ermənistan silahlı qüvvələri tərəfindən hələ birinci Qarabağ müharibəsindən etibarən nəinki azərbaycanlı hərbçilərə, eləcə də mülki şəxslərə qarşı misli görünməmiş qırğınlar törədilib, yalnız bir gecədə 1992-ci ilin 26 fevral tarixində Xocalı şəhərində 613 mülki şəxs xüsusi qəddarlıqla qətlə yetirilib, bugünədək 4000-ə yaxın azərbaycanlının taleyi barədə heç bir məlumat verilməyib.
2020-ci oktyabrında Azərbaycanın Gəncə, Bərdə, Mingəçevir şəhərlərinin mülki əhalisini raket hücumuna tutaraq insanlıq əleyhinə cinayətlər törədilib.
Ermənistanın səbəbkarı olduğu mina təhlükəsi bu gün bölgədə insanların həyatına ciddi hədədir. 2020-ci ilin noyabrından bugünədək əksəriyyəti mülki şəxs olmaqla 250-dək insan mina qurbanı olub. Azərbaycan ərazilərində aşkarlanan minaların 2021-ci ildə Ermənistanda istehsal olunması faktı isə Ermənistanın bir tərəfdən mina xəritələrini hələ də tam olaraq Azərbaycana verməyərək, digər tərəfdən yeni minalar basdırmaqla azərbaycanlılara qarşı hərbi cinayətlərini davam etdirdiyinin sübutudur.
Ermənistan hökuməti bugünədək törədilən hərbi cinsyətlərn qarşısının alınması və ya törədilmiş cinayətlərə görə aidiyyəti şəxslərin məsuliyyətə cəlb edilməsi istiqamətində heç bir əməli tədbir görməyib.
Ermənistanın əsassız iddialar yayaraq beynəlxalq ictimaiyyəti yanıltmaq və öz məsuliyyətini gizlətmək cəhdlərini qətiyyətlə qınayırıq.
Ermənistandan beynəlxalq öhdəliklərinə əməl etməyi və çoxsaylı hərbi cinayətlərə görə məsuliyyət daşıyan şəxslərin qanun qarşısında cavab verməsini tələb edirik”.
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə bildirdi ki, son 30 il və bundan qabaqkı tarix boyunca ermənilərin bizə qarşı hansı qəddarlıqları, hətta soyqırımları törətdikləri faktlarla öz təsdiqini tapıb: “Ermənilərin müharibə cinayətləri göz qabağındadır. Birinci Qarabağ müharibəsində Xocalıda, Malıbəylidə mülki əhaliyə qarşı törədilənlər əsl qətliamdır. İşğaldan azad edilən rayonlara gedəndə biz ermənilərin tarixi abidələrə qarşı da vandallıq etdiyinin şahidi oluruq. Müharibənin onlara bəxş etdiyi acı nəticələrlə barışmaq istəmirlər. Ona görə də son videodakı kimi səhnələr qurub, ictimai rəyi məşğul edirlər. Bu hadisə müharibə vaxtı olubsa, niyə iki il sonra ortaya çıxır? Deməli, təşkil edilmiş provokasiyadır. Azərbaycan əsgəri əli silahlı ermənilərdən başqa kimlərəsə güllə atmayıb. Ancaq onların necə müharibə apardığını gördük. Gəncədə, Bərdədə mülki əhalini yatmış yerdə raket atəşinə tutdular. Uşaqları, qadınları, qocaları qətl etdilər. Azərbaycan əsir götürdüyü erməni hərbçilərin sayı barədə dəqiq məlumat verib. Onların qaytarılması prosesi reallaşanda da hamısının sağlam olduğu göründü. Sərhəddəki son toqquşmada yaralı erməni əsgərinə bizimkilərin necə ilk tibbi yardım etdiyinin görüntüləri bütün sosial şəbəkələrdə yayıldı. Bütün bunlara baxmayaraq, Azərbaycan prokurorluğu videonu araşdıracağını rəsmən bəyan etdi. Ermənilərdən belə davranış görmüşükmü? Ermənilər bu cür addımları ilə öz diplomatik uğursuzluqlarını kompensasiya edirlər. Eyni zamanda, diqqəti Azərbaycanda olan erməni terrorçularına yönəltmək istəyirlər ki, bizim müqavimətimizi zəiflədib onların heç bir şərt olmadan geri təhvil verilməsini təmin edək. Belə təxribatçı addımlarla nə bizim dövlətin, nə də Ordumuzun adına xələl gətirə bilərlər. Çünki həmin videoda atəş açanların məhz Azərbaycan əsgəri olduğunu sübut edən heç bir dəlil və sübut yoxdur. Müasir texnologiyaların imkanları ilə bənzər kadrları səhnələşdirib çəkmək də mümkündür”.
Məhəmmədəli QƏRİBLİ
