ABŞ Dövlət Departamentinin sözçüsü Ned Prays brifinqdə deyib ki, ABŞ Bakı və İrəvanı münasibətləri normallaşdırmağa və hərtərəfli sülh sazişi bağlamağa çağırır:
“ABŞ tərəflərə kömək etməyə hazırdır. Həll olunmamış məsələləri çözmək lazımdır”.
Əslində, ABŞ-ın sülh sazişi ilə bağlı çağrışı konkret olaraq Ermənistana ünvanlanmalıdır. Çünki Azərbaycan bu məsələdə olduqca konstruktiv mövqe sərgiləyir. Ermənistan Azərbaycanın danışıqlar üçün irəli sürdüyü 5 prinsipi qəbul etdiyini artıq bəyan edib. Lakin bəzi hallarda nümayiş etdirdiyi destruktiv yanaşmalar rəsmi İrəvanın Azərbaycanın ərazi bütövlüyünü tanımağa hazır olmadığını, danışıqlar prosesinin pozulmasına çalışdığını göstərir. Bunun əsas səbəblərindən biri də daxildəki revanşist və ultra-millətçi qüvvələrin, habelə xaricdəki diaspor qurumlarının Paşinyan hakimiyyətinə təzyiq cəhdləridir.
Bunun üçün də, ABŞ-ın sülh sazişi ilə bağlı məsuliyyəti eyniləşdirmək cəhdini nə dərəcədə obyektiv saymaq olar?
Politoloq Rəşad Bayramov “Bakı-Xəbər”ə açıqlamasında bildirdi ki, proseslərin təhlili Ermənistan rəhbərliyi uğursuz siyasi manevrlərlə danışıqlar prosesinin Rusiya ilə Qərb arasında geosiyasi rəqabət mövzusuna çevrilməyə çalışdığını göstərir: “ Rusiya və Avropa İttifaqının danışıqlar prosesinin gündəliyində dayanan məsələlərə münasibətdə eyni mövqedən çıxış etməsi isə rəsmi İrəvanı ciddi şəkildə narahat edir. Odur ki, Paşinyan və komandası müxtəlif ziddiyyətli açıqlamalar verməklə, müəyyən suallar doğuran addımlar atmaqla öhdəliklərdən yayınmaq istəsə də, gec-tez bunun heç bir faydası olmadığını anlamalı olacaqlar.
Azərbaycan postmüharibə dövründə yürütdüyü çevik xarici siyasət və diplomatiya nəticəsində regionda sabitliyə və genişmiqyaslı iqtisadi əməkdaşlığa xidmət edən sülh gündəliyinin həm Rusiya, həm də Avropa İttifaqı tərəfindən qəbuluna nail olub. Moskva və Brüsseldə Bakının sülh prosesində tam səmimi mövqe tutduğuna heç bir şübhə yoxdur. İrəvandan fərqli olaraq, Bakı danışıqların hansısa qlobal güc mərkəzinin inhisarına alınmasına, sülhyaratma prosesində üstün tərəf kimi çıxış etməsinə maraqlı deyil və bunu yolverilməz hesab edir. İki ölkə arasında danışıqlar prosesi həm Brüssel, həm də Moskvanın vasitəçiliyi əsasında aparılsa da, proses ümumən rəsmi Bakının önə çəkdiyi prinsip və meyarlara söykənir. Ermənistan və Azərbaycanın biri-birinin ərazi bütövlüyünün qarşılıqlı şəkildə tanınması, sərhədlərin delimitasiya və demarkasiyası, kommunikasiyaların açılması və iqtisadi əlaqələrin bərpası. Ermənistanın rəhbəri Nikol Paşinyan Brüseldəki ümidverici görüşdən sonra Rusiyada rəsmi səfərdə oldu. O, Moskvadan qayıtdıqdan sonra Brüssel razılaşmalarının taleyi ilə bağlı suallar doğuran ziddiyyətli açıqlamalar verdi. ABŞ bütün bunların yaxşı fərqindədir. Buna görə də, ABŞ sülh sazişi ilə bağlı konstruktiv çağrışı hər iki tərəfə deyil, məhz Ermənistana ünvanlamalıdır”.
Məhəmmədəli QƏRİBLİ
