Yayılan məlumatlara görə, Rusiya Ukraynada yaranmış vəziyyətlə əlaqədar olaraq əsgərlərinə dəstək olmaq üçün Suriyadakı qoşunlarını bu ölkədən çıxarır.
Belə ki, bir neçə hərbi hissə Suriyadakı bazalardan Ukraynaya göndərilmək üçün Aralıq dənizindəki 3 hava limanına köçürülüb. Suriyada tərk edilmiş bazaların İran İnqilab Keşikçiləri Ordusu (SEPAH) və Livan “Hizbullah”ına təhvil verildiyi bildirilir. Bu bazalar Hmeymim, Qamışlı, Deyr əz-Zor və T4-dür. Digər tərəfdən, Rusiyanın Suriyadan qoşunlarının bir hissəsini çıxarması və Suriya lideri Bəşər Əsədin İranın ali lideri Əli Xamnəi ilə görüşü İsraildə narahatlıq yaradıb. İsrail mediası bildirir ki, Rusiya qüvvələri Suriyadakı hərbi mövcudluğunu və təsirini azaltdıqca, İran bu yeri dolduracaq. Bu isə İsraildə narahatlıq doğurur. Regional müşahidəçilər rus qoşunlarının çıxarılmasını Rusiya Federasiyasının Ukraynaya qarşı müharibədəki çətinlikləri ilə əlaqələndirir. Suriyadakı mövcudluq Rusiya üçün İsrailə təsir alətinə çevrilib. İsrail təyyarələri Hizbullah bazalarına raket zərbələri endirdikdə, Rusiyanın hava hücumundan müdafiə sistemləri müntəzəm olaraq buna göz yumurdu. Buna cavab olaraq İsrail anti-Rusiya sanksiyaları və ya Ukraynaya silah tədarükü ilə bağlı çox ehtiyatlı davranıb. Ancaq Lavrovun məlum qalmaqallı açıqlamasından sonra iki ölkə arasında münasibətlər kəskinləşib.
Rusiya odusunun Suriyanı tərk etməsi ilə bağlı deyilənlər nə dərəcədə doğru ola bilər? Orada nə baş verir?
“Kreml itkilərin yerini doldurmaq üçün müxtəlif yerlərdə dislokasiya olunan qüvvələri Ukraynaya yönəldir”
Məsələyə münasibət bildirən AMİP funksioneri Əli Orucovun fikrincə, deyilənlərdə müəyyən həqiqət var. O bunu belə əsaslandırdı: “Məsələ ondadır ki, Rusiya nə qədər gizlətsə də Ukraynada ciddi əsgəri itkilər verir. Moskva qarşısına qoyduğu hədəflərə çata bilmədi və 78 gündür müharibə davam edir. İtkilərin yerini doldurmaq üçün Rusiya müxtəlif yerlərdə dislokasiya olunan qüvvələri Ukraynaya yönəldir. Hətta bir müddət əvvəl belə məlumatlar yayıldı ki, Qarabağdakı sülhməramlıların müəyyən hissəsi Ukraynaya göndərilib. Rusiya 2015-ci ilin payızında Suriyada gedən proseslərə birbaşa müdaxilə etdi. Suriya felən bir neçə yerə bölünsə də, iki ildir orada nisbi sabitlikdir. Əsəd rejimi ölkənin böyük hissəsinə nəzarəti bərpa edib. Bu işdə Rusiya və İranın ciddi yardımı oldu. Ancaq onu da nəzərə almaq lazımdır ki, indiki şəraitdə Rusiyaya Suriyada böyük ordu birləşmələri saxlamaq sərfəli deyil. Bunun üçün böyük maliyyə vəsaitlərinə ehtiyac var. Sanksiyalar altında olan Rusiyanın bunun öhtəsindən gəlməsi real deyil. Nəzərə almaq lazımdır ki, sanksiyalar hələ bundan sonra öz təsirini göstərəcək. O üzdən, Rusiya müəyyən qüvvələrini Suriyadan çıxarmaqla həm onları Ukraynaya yönəldir, həm də bu minvalla xərclərini azaldır. İstənilən halda Rusiya tamamilə qüvvələrini Suriyadan çıxarmayacaq. Əsasən də Tartusdakı hərbi dəniz bazalarını əlində saxlayacaq. Bazaların müəyyən qismini İrana verəcəyi real görünür. Çünki İran Suriyada Rusiya ilə ortaq mövqedən çıxış edir”.
Bu baxımdan partiya funksioneri hesab edir ki, deyilənlər Rusiyanın çətin durumda olmağından xəbər verir.
Vidadi ORAHALLI
