Ermənistanın baş naziri Nikol Paşinyan artıq Ermənistanı və erməni xalqını təmsil etmir. Belə bir açıqlama ilə Ermənistanın müxalifət liderlərindən İşxan Saqatelyan çıxış edib. O, İrəvanda keçirilən mitinqdə xarici dövlətlərin səfirləri və beynəlxalq təşkilatların nümayəndələri qarşısında çıxış edərkən bildirib ki, Paşinyan artıq Ermənistanı təmsil etmir.
Müxalifətçinin qeyd etdiyinə görə, Ermənistanda siyasi böhran yaranıb və onun həlli Paşinyanın və komandasının istefasını tələb edir. Bu tələb, Saqatelyanın fikrincə, hazırkı rəhbərliyin təhlükəsizlik, iqtisadiyyat, milli maraqların müdafiəsi kimi sahələrdə kursunun uğursuzluğu ilə bağlıdır. Siyasətçi xarici diplomatları Ermənistan müxalifətinin mesajını öz ölkələrinin rəhbərliyinə çatdırmağa çağırıb. O, Ermənistanın dövlət strukturlarının əməkdaşlarını da etiraz hərəkatına qoşulmağa, rəhbərliyin hədələrinə məhəl qoymamağa və vətəndaş itaətsizliyi aksiyaları təşkil etməyə çağırıb. Bütün bunlar bir daha təsdiq edir ki, erməni müxalifəti, zorakı yolla olsa belə, hakimiyyəti devirməkdə israrlıdır və artıq bu fonda beynəlxalq miqyasda görüntü yaratmağa çalışır. Erməni ekspert Arbak Xaçatryan isə bütün bunları təhlükəli hal hesab edir: “Məhz geosiyasi reallıqlar kontekstində Ermənistanda baş verənlər çox təhlükəlidir. Çünki daxili oyun gözlənilməz ola bilər, hətta Ukrayna “qaynar nöqtəsi”nin ölkəmizə keçəcəyini də istisna etmirəm”. Erməni ekspert vurğulayıb ki, Ermənistandakı nümayişlərin Kremldən idarə edilməsini də istisna etmir. Digər erməni politoloq Levon Şirinyan da məsələyə eyni prizmadan yanaşır: “Xalq Nikol Paşinyandan, məndən, sizdən nə qədər narazı olsa da, quldurların tapşırıq yerinə yetirmək məqsədilə gəldiklərini görür. Quldurlar indiki erməni müxalifətidir”. Onun sözlərinə görə, Ermənistanda insanlar baş verənlərin yalnız Rusiyaya sərəfəli olan çevriliş cəhdi olduğunu başa düşürlər: “Müxaliflər ümid edirlər ki, bölgələrə gedəcəklər, orada dəstək alacaqlar, hücumu davam etdirəcəklər. Amma bölgələr onları dəstəkləməyəcək, bölgələrdə daha da biabır olacaqlar”. Erməni politoloq vurğulayıb ki, qondarma müxalifətin Moskvadan ölkəni qeyri-sabit vəziyyətdə saxlamaq əmri var. Bunlar fonunda “armenianreport” portalı yazır ki, indi müxalifət azsaylı tərəfdarlarını açıq-aşkar nalayiq və aqressiv davranan yürüşlərə və itaətsizlik aksiyalarına aparır: “Hakimiyyət hələ də demokratiya oynamağa çalışır və ən ekstremal tədbirlərə əl atmır, yalnız İrəvan prospektlərini və insanların gur olduğu küçələri etirazçılardan təmizləyir.
Təbii ki, hakimiyyətin davranışına ABŞ Dövlət Departamentinin sözçüsü Ned Praysın brifinqdə Ermənistan hökumətini təmkinli olmağa, yürüş iştirakçılarına isə öz fikirlərini sülh yolu ilə bildirməyə və zorakılıqdan çəkinməyə çağıran son bəyanatı da təsir edir. Lakin sonuncular, hətta daha çox bu hərəkətlərin arxasında duranlar - Köçəryan, Sarkisyan və Vanetsyan Ermənistanda qanunun aliliyinə və demokratiyaya çoxdan tüpürüblər. Üstəlik, bu prinsiplər onlara həmişə naməlum olub. Sonra da hakimiyyətdə olanda, hətta indi daha çox tərəfdarları ilə polis arasında toqquşmalara səbəb olanda belə. Eyni zamanda onların timsalında yürüşlərin təşkilatçıları insanları qəsdən polislə toqquşmalara sövq edirlər ki, qarşıdiurma olsun, vəziyyət nəzarətdən çıxsın. Köçəryanın və Sarkisyanın mediasının manşetləri elə indi də bu fonda aşağıdakıları qışqırır: “Polis yürüş iştirakçılarına qarşı qeyri-mütənasib güc tətbiq edir! Polis məhbusların qollarını bükür”. Mübahisə olunmur ki, bəzi hallarda polis həqiqətən də iğtişaşçılara qarşı güc tətbiq edir. Amma birincisi, yalnız ictimai asayişi pozan ən fəallara qarşı, ikincisi, çətin ki, Nikol Paşinyan şəxsən hüquq-mühafizə orqanlarına öz vətəndaşlarına qarşı xüsusilə qəddar davranmağı əmr etsin. Amma bu gün “hakimiyyətin və polisin özbaşınalığı” barədə qışqıranlar, görünür, özlərinin hakimiyyətdə olarkən daha qəddar addımlar atdıqlarını unudublar. Onlar az qala öz xalqını zirehli texnika ilə əzəcəkdi. 2004-cü ilin aprelində polis və qoşunların İrəvanda müxalifətin etiraz aksiyasını necə vəhşicəsinə dağıtdığını xatırlayaq. Daha sonra insanlar işsizliyin artması və sosial vəziyyətin pisləşməsi ilə əlaqədar prezident Robert Köçəryana etimad üçün referendum keçirilməsini tələb ediblər. Lakin nümayiş polis tərəfindən vəhşicəsinə dağıdılıb. İnsanları dəyənəklə döyürdülər, sümüklərini, çənələrini, dişlərini sındırırdılar. 2008-ci ilin martında baş verən faciəli hadisələri, Robert Sedrakoviç və Serj Azatoviçi unutmusunuz? Amma sonra sizin göstərişinizlə etirazlar zorakılıqla dağıdıldı, nəticədə 10 nəfər həlak oldu, 250-dən çox insan yaralandı. Sarkisyan 2015-ci il iyunun 23-də İrəvanın mərkəzi prospektini etirazçılardan təmizləməyə göstəriş verib. Bu hadisə zamanı 237 nəfər saxlanılıb, 8 mülki şəxs xəstəxanaya yerləşdirilib. Yada salaq, elektrik enerjisinin bahalaşmasına etiraz edənlərin dağıdılması hansı amansızlıqla həyata keçirilib. Bir il keçdi və “Sasna Tsrer” qrupu bir polis alayını ələ keçirdi. 2016-cı il iyulun 30-da insanlar üsyançılara dəstək üçün kortəbii aksiyalar keçiriblər. Həmin vaxt “Sarı Taq” məhəlləsində polis xüsusi təyinatlıları müxalifət düşüncəli vətəndaşlara qarşı qırğın törədib. Polis yaşayış binalarına soxulub, günahsız yerli sakinləri şikəst edib, yeri gəlmişkən, aksiyada iştirak etməyən və təsadüfən buradan keçən bir oğlanın hətta gözünü çıxarıblar. Əgər indi hakimiyyətdə Köçəryan və ya Sarkisyan olsaydı, vətəndaş itaətsizliyi aksiyalarının elə ilk günündə polis gözyaşardıcı qazın və xüsusi təlim keçmiş itlərin köməyi ilə onların iştirakçılarını dağıdardı. Köçəryanın və Sarkisyanın qəddarlığı, hakimiyyətdən yapışması və onun naminə öz soydaşlarının meyitləri üzərində gəzməyə hazır olmaları Ermənistanda heç kimə sirr deyil. Və indi itaətsizlik aksiyalarının dağıdılması zamanı heç kimin ölməməsi müxalifətin yox, Paşinyanın xidmətidir. Nə qədər “kapitulyant” olsa da, mənasızcasına erməni xalqının qanını tökməyə qətiyyən hazır deyil”.
Nahid SALAYEV
