Erməni Marqarita Simonyan rəhbərlik etdiyi “Sputnik” media kampaniyası vasitəsilə müxtəlif təxribatlar həyata keçirir. “Sputnik”in Azərbaycanda bağlanması, onun fəaliyyətinə icazə verilməməsi zərurətə çevirilib. Bu media subyekti nə qədər ki qızışdırıcı, qərəzli mövqeyindən əl çəkməyib, onun burada fəaliyyəti dayandırılmalıdır.
Marqarta Simonyan “Sputnik” vasitəsilə həm Azərbaycana, həm də başqa ölkələrə qarşı qərəz sərgiləyir. Bu səbəbdən də onun fəaliyyəti Azərbaycanda bərpa olunmalı deyil. “Sputnik”in Qazaxstan hadisələri, Türkiyədə Gəzi parkı olayları, hazırda Ermənistanda gedən mitinqlərdə tutduğu qızışdırıcı mövqe bu agentliyin bağlanmasına ciddi əsaslar yaradıb. Bu gün “Sputnik-Azərbaycan”ın ölkəmizdə fəaliyyət göstərməsi ciddi narazılıq doğurur.
“Bu medianın sahibləri onu Rusiyanın kölgəsində qurmaqla iz itirməyi hədəfləyiblər”
Tanınmış siyasi şərhçi və media eksperti Azər Həsrət bizimlə söhbətində bildirdi ki, “Sputnik”in bağlanması indinin zərurəti deyil. “Bu qurum Bakının tən ortasında, ən gözəl məkanlarından birində oturub faktiki olaraq anti-Azərbaycan fəaliyyəti ilə məşğuldur. Xatırlatmaq istəyirəm, bir vaxtlar bu işləri “Azadlıq”, “BBC” radiosu görürdü. ABŞ-a, Böyük Britaniyaya aid bu radiolar Azərbaycanda FM dalğasında yayımlanırdı, açıq şəkildə həm ölkə içində, həm də ondan kənarda anti-Azərbaycan fəaliyyəti ilə məşğul olurdular. Təbiidir ki, Azərbaycan dövləti öz maraqlarını qorumaq üçün o radioların ən azı Azərbaycan içində yayımını dayandırdı, ümumiyyətlə onların buradakı bürolarının bağlanmasına nail oldu. Baxmayaraq ki, dünya üstümüzə gəldi. “Sputnik-Azərbaycan” eyni fəaliyyəti daha çirkin və daha açıq şəkildə həyata keçirir. Üstəlik də, bu “Sputnik”in başında duran bir ermənidir. Biz, əlbəttə, insanları millətinə görə bölmürük. Söhbət heç onun erməniliyindən də getmir. Amma o erməni Simonyan bütün varlığı ilə türk düşmənliyini büruzə verir. Sadəcə, Azərbaycan düşmənliyini deyil, ümumiyyətlə türk düşmənliyini. Mən təkcə “Sputnik”in Azərbaycandakı fəaliyyətini deyil, başqa ölkələrdəki, özəlliklə də türk ölkələrindəki fəaliyyətini də müşahidə edirəm. Azərbaycanla yanaşı Türkiyənin özünə saçılan nifrət, orta Asiya türk dövlətlərinə qarşı aşağılayıcı yanaşma göz önündədir. Qazaxların, qırğızların, özbəklərin, türkmənlərin təhqir edilməsi, aşağı kateqoriyadan olan insanlar kimi göstərilməsi “Sputnik”in fəaliyyət kreteriyaları arasındadır. Yəni onlar bizimlə yanaşı digər türkləri də davamlı şəkildə gözdən salır, aşağılayır və bütün bunları Rusiya dövlətnin adı altında gizlənərək edirlər. Bir növ “Sputnik” Agentliyi, media qurumu öz fəaliyyətini Rusiya dövlətinin adı altında həyata keçirməklə Rusiya ilə digər dövlətlər arasında münasibətləri korlamağa xidmət edir. Yəni “Sputnik”in bizə zərəri olmaqla bərabər mənsub Rusiya dövlətinə də çox böyük zərəri var. Bu Sputnik bütövlükdə Rusiya mediası kimi təqdim edilsə də hər halından bir erməni təbliğat maşını olduğu aşkardır. Yəni bu medianın sahibləri onu Rusiyanın kölgəsində qurmaqla iz itirməyi hədəfləyiblər. Ona görə də düşünürəm ki, Azərbaycan dövləti Rusiya Azərbaycan münasibətlərinin zərər görməməsini də nəzərə alaraq “Sputnik Azərbaycanın” fəaliyyətini birmənalı olaraq qadağan etməlidir. Yəni “Sputnik” Azərbaycandan rədd edilməlidir. Bəli, belə bir sərt ifadə işlədirəm, rədd edilməlidir. “Sputnik”in fəaliyyəti anti-Azərbaycan fəaliyyətidir. Biz bunları görürük”.
A.Həsrət qeyd etdi ki, dünyanın 30-dan artıq ölkəsində “Sputnik” şəbəkəsi fəaliyyət göstərir. A.Həsrətin sözlərinə görə, düzdür, Ukrayna məsələsinə görə bəzi Avropa ölkələri bu agentliyi yasaqlayıb, amma başqa ölkələrdə fəaliyyət göstərirlər və bu ölkələrin dilində də yayımla məşğul olurlar: “Hələ nəzərə alaq ki, Sputnik təkcə azərbaycan və rus dillərində deyil, bir sıra vacib xarici dillərdə də yayımla məşğuldur. O dillərdə Azərbaycan haqqında nələr yazırlar, yayırlar, bundan heç xəbərimiz də olmur... Margarita Simonyanın başçılıq etdiyi Sputnik adlı medianın dünyanın hər tərəfindəki təmsilçilikləri anti-Azərbaycan təbliğatı aparır. Hətta Azərbaycandakı təmsilçilik belə bizim haqlı davamıza nəinki töhfə vermir, milli maraqlarımızla daban-dabana zidd yayım siyasəti həyata keçirir. Bundan fərqli olaraq Sputnik Armenia İrəvanda oturub bir erməni mediası kimi fəaliyyət göstərir. Hətta o həddə ki, bəzən sırf Ermənistan mediası olan ayrı-ayrı nəşrləri belə kölgədə qoyaraq bayağı təbliğat aparır. Belə olan halda Azərbaycan niyə bu medianı öz ərazisində saxlamalıdır? Yəni biz belə bir sualla məsələni ictimailəşdirmişdik. Məsələyə təpki də yetərincə oldu. Cəmiyyətin ayrı-ayrı kəsimləri bu məsələdə vahid mövqedən çıxış etdi. Eyni zamanda siyasi mövqeyindən asılı olmayaraq insanların çəkici bir zindana vurduğunun şahidi olduq. Amma aradan bir az keçəndən sonra sanki ehtiraslar soyudu. Yaxud da bizə elə gəlir. Hər halda, nə baş verməsindən asılı olmayaraq biz məsələni diqqətdə saxlayırıq, saxlamağa da davam edəcəyik. Mövqeyimiz də qətidir, birmənalıdır: “Sputnik-Azərbaycan” ölkədən çıxarılmalıdır! Bunun alternativi varmı? Ola bilər... İndi hər halından erməni təbliğat maşınının balası olduğu bilinən bir mediaya biz bu çətin dövrdə niyə dözməliyik? Başında duran M.Simonyan bütün çıxışlarında Azərbaycanı və bir xalq olaraq bizi aşağılayır, Sputnik şəbəkəsinin bütün həlqələri dünyanın hər tərəfində bizə qarşı təbliğat aparır, bizsə ona hələ də Bakının ən gözəl yerində ofis vermişik, meydan açmışıq. Belə olarmı? Yaxud da belə olmalıdırmı? Əsla! Bir dəfə demişdik, təkrar edirik: Azərbaycan dövləti bu Sputniki rədd etməklə öz ləyaqətini qorumalıdır. Biz o dövlətlərdən deyilik ki, kimlərsə gəlib burnumuzun düz ucunda, havamızı udaraq, suyumuzu içərək bizə qarşı hədsizlik etsin! Biz o dövlətlərdənik ki, gərək olduğunda hər kəsə yerini göstərməyi bacarırıq və 2020-ci ilin 44 günlük Vətən müharibəsində bütün dünya buna şahid oldu. Ona görə də hazırda media sahəsindəki bu hərcmərcliyi də yoluna qoyub növbəti dəfə bu davranışımızı sərgiləməkdə gec qalmamalıyıq”.
A.Həsrət vurğuladı ki, “Sputnik”lə bərabər daha bir məsələ də həllini tapmalıdır, elə indi. “Azərbaycanın bütün kabel TV kanallarının təqdim etdiyi paketlərin ən azı 50 faizi Rusiyanın anti-Azərbaycan kanallarıdır. Onların da əksəriyyəti ermənilərin nəzarətindədir. Və bu kanalları bizim kabel yayımçılarımız Azərbaycan tamaşaçısına pulla satır. Təsəvvür edirsinizmi? O kanallar gecə-gündüz bizi yıxıb-sürüyür, ələ salır, aşağılayır, kabel yayımçılarımız isə bunu veclərinə belə almadan pul qazanmağa davam edir! Bu baxımdan dövlət konkret addımlar atmalıdır. Ümumiyyətlə isə kabel yayımı da daxil olmaqla milli təəssübkeşliyi olmayan heç kimə TV yayımı ilə məşğul olmağa imkan verilməməlidir!”- deyə A.Həsrət vurğuladı.
İradə SARIYEVA
