Rusiyanın ingilis dilində yayımlanan RT telekanalı və “Sputnik” xəbər agentliyinin baş redaktoru Marqarita Simonyan bu gün beynəlxalq miqyasda daha çox nasist düşüncəli jurnalist kimi xatırlanır. Bu da təsadüfi deyil.
Marqarita Simonyanın fikirləri, sosial şəbəkələrdəki paylaşımları erməni əsilli bu şəxsin baxış və fəaliyyətinin humanizm prinsipləri ilə daban-dabana zidd olduğunu göstərir. Çox da uzağa getmədən yaxın tarixə nəzər salmaqla bunun faktiki təzahürlərini görmək olar. Cari il martın 18-də Moskvanın “Lujniki” stadionundakı çıxışında o, açıq şəkildə Rusiyanı Ukraynanı işğal etməyə növbəti çağırışlar etdi: “Ana Rusiya, Donbası geri götür. Ana Rusiya, övladlarını qoru!”. Bütün bunlara görə Ukrayna məhkəməsi Marqarita Simonyan barəsində qiyabi həbs qətimkan tədbiri seçib. Simonyanın Rusiyanın Ukraynadakı hərbi müdaxiləsini dəstəkləyərək təbliğ etdiyinə görə Avropa İttifaqına girişi yasaqlanıb. Lakin o, ərazi iddiasını təkcə Ukrayna ilə bağlı səsləndirmir. Qardaş Türkiyə də Simonyanın hədəfindədir. Belə ki, o, Türkiyənin Qars və Ağrı dağını Rusiyanın tərkibinə qaytarmaq istədiyini bildirir: “Əlbəttə, Qars və Ağrı dağını Rusiyanın tərkibinə qaytarmaq istəyirəm. Bu ərazilər biabırçı Qars sazişinə qədər Rusiyaya məxsus olub. Mən tamamilə imperiya düşüncəli, rus şüurlu adamam,– ümumiyyətlə, bütün hamısını qaytarmaq istərdim. Daha bir utancverici Brest sazişi ilə əhalimizin üçdə birini və ərazimizin böyük hissəsini itirmişik”.
Marqarita Simonyan qazax xalqını da eyni yanaşma ilə bu ilin yanvarında baş verən hadisələr fonunda təhqir edib. Xatırladaq ki, Rusiyanın Qazaxıstandakı etirazçıların qovulmasına hərbi yardım etməsi üçün o, qazaxların qarşısında 6 tələb irəli sürüb. Bununla bağlı öz “Teleqram” kanalında Qazaxıstan hakimiyyətinin qarşısına qoyulan şərtləri dərc edib: “İşğal edilmiş Krımı Rusiyanın ərazisi kimi tanımaq. Kiril əlifbasına qayıtmaq. Rus dilini ikinci dövlət dili etmək. Rus məktəblərini “rahat buraxmaq”. Ölkədə “Rusiya əleyhdarı olan qeyri-kommersiya təşkilatlarını” məhv eləmək. Millətçi qüvvələrlə əməkdaşlıq eləmədən Rusiyaya qarşı “qardaş” daxili siyasət yürütmək”. Bu məsələdə Marqarita Simonyanla yanaşı, onun əri, erməni əsilli rusiyalı teleaparıcı Tiqran Keosayan da olduqca fəaldır. Qeyd edək ki, Tiqran Keosayan özünün “yutub” kanalında Qazaxıstan hakimiyyətinin Rusiya-Ukrayna olayına münasibəti və mayın 9-da ölkədə paradın keçirilməyəcəyi ilə bağlı qərarlarını ələ salaraq bildirib: “Qardaş ölkələr Rusiya ilə ABŞ-NATO qarşıdurmasında tutacaqları tərəfi müəyyənləşdirməlidir. Rusiya kimin onunla, bir yerdə olub-olmadığını diqqətlə izləyir”. Artıq Qazaxıstan Xarici İşlər Nazirliyi Tiqran Keosayanı “arzuedilməz şəxslər” siyahısına salmaq üçün hüquqi prosesə başlayıb. Marqarita Simonyan və onun əri ilə bağlı belə misalların sayını artırmaq olar. Bu şəxslərin hər ikisi həm də anti-Azərbaycan mövqeləri ilə tanınır. Onlar qondarma “erməni soyqırımı”nı təbliğ etməklə yanaşı, Rusiyadakı erməni diasporunun fəal üzvlərindəndir. Burada bir daha qeyd edək ki, Marqarita Simonyan “Sputnik” xəbər agentliyinin də baş redaktorudur. “Sputnik” agentliyinin isə Bakı filialı da fəaliyyət göstərir. Xatırladaq ki, Rusiyanın “RİA Novosti” agentliyinin beynəlxalq şöbəsinin bazasında “Sputnik” 2014-cü ilin noyabrında yaradılıb. Bir müddət əvvəl isə “Sputnik”in Azərbaycandakı nümayəndəliyinə Vitali Denisov yeni rəhbər təyin olunub. Denisov bundan əvvəl Gürcüstanda “Cənubi Osetiya Respublikası”nda “Sputnik”in yerli bürosuna başçılıq edib. Sosial şəbəkədə yayılan məlumatlara əsasən, o, Rusiya xüsusi xidmət orqanlarına bağlıdır. Qeyd edək ki, Denisov Marqarita Simonyanın yaxın kadrlarındandır. ABŞ Nümayəndələr Palatasının xarici işlər üzrə komitəsinin başçısı Ed Roys bir müddət əvvəl Simonyanın başçılıq etdiyi RT və “Sputnik” kanalları ilə bağlı narahatlığını ifadə etmişdi. O, bu media qurumlarının uğurlarına görə Rusiya xüsusi xidmət orqanlarının dəstəyinə borclu olduğunu vurğulamışdı. Yeri gəlmişkən, Simonyan Ukraynadakı indiki hadisələrdən əvvəl ABŞ-dan qovulub. RT kanalının isə ABŞ-da nümayəndəliyinə qadağa qoyulub. Bunlar fonunda indi Azərbaycan cəmiyyətini də narahat edən Simonyanın rəhbəri olduğu “Sputnik“ agentliyini revanşist ermənilərin ruporuna çevirməsidir. Azərbaycan hüquqi dövlət kimi xarici media strukturunun yayım siyasətinə qarışmır. Amma informasiya savaşında milli maraqlarını da müdafiə etmək hüququnda imtina etmir. Bu mənada, Simonyanın ruporu olan "Sputnik-Azərbaycan"ın fəaliyyətinin dayandırılması aktuallaşır. Digər tərəfdən yaddan çıxmamalıdır ki, Rusiyada Azərbaycanın “oxu.az”, “haqqın.az”, “minval.az”, “Caliber” kimi portallarının yayımına qadağa qoyulub. Bundan başqa, Simonyanın Azərbaycan-Rusiya münasibətlərinin ruhuna uyğun olmayan fəaliyyətinə də etiraz olunmalıdır. Bəzi ekspertlərə görə, ən azı, Simonyan rəhbərlikdən kənarlaşdırılmayana qədər “Sputnik-Azərbaycan”ın fəaliyyəti dayandırılmalıdır. Xüsusən də nəzərə almalıyıq ki, Ermənistanla Azərbaycanın münasibətlərinin nizamlanması və sülh müqaviləsinə ümidlərin artdığı bir dönəmdə “Sputnik-Azərbaycan”ın fəaliyyəti sağlam informasiya mühiti üçün ciddi təhdiddir. Hər halda, bu məsələyə indi daha çox diqqət etməyin zamanı çatıb.
Samirə SƏFƏROVA
