Azərbaycanın beş bəndlik sülh təklifinə ermənilər 6 bənd çıxardılar - bu da onların sülhə "hazırlığı"...

Elşad Həsənov: “Böyük ehtimalla, onların tələbləri sırasında Qarabağın ermənilər yaşayan hissəsinə statusun müəyyən edilməsi və oradakı ermənilərin hüqiq və azadlıqlarının təmin edilməsi var”

img

Ermənistan Azərbaycanın 5 bəndlik təklifinə cavab olaraq rəsmi Bakıya altı bənddən ibarət təklif  göndərib. Bu  barədə erməni jurnalistlərlə söhbətində Ermənistan Təhlükəsizlik Şurasının katibi Armen Qriqoryan məlumat verib.

O, təkliflərin nədən ibarət olduğunu açıqlamayıb.

“Bu iki təkliflər paketini birləşdirib müzakirələrə başlamaq lazımdır. Bu məsələdə həm Azərbaycan, həm də digər beynəlxalq tərəfdaşlar tərəfindən anlaşma var. Azərbaycanın bəndlərində Ermənistan üçün qəbuledilməz heç nə yoxdur. Sülh müqaviləsi ətrafında danışıqlara başlamaq lazımdır”, - deyə Qriqoryan bildirib. Qeyd edək ki, Azərbaycan danışıqların başlaması üçün Ermənistana 5 bənddən ibarət təklif göndərib. Bu təkliflər aşağıdakılardır:

Dövlətlərin bir-birinin suverenliyi, ərazi bütövlüyü, beynəlxalq sərhədlərinin toxunulmazlığı və siyasi müstəqilliyini qarşılıqlı şəkildə tanıması;

Dövlətlərin bir-birinə qarşı ərazi iddialarının olmamasının qarşılıqlı təsdiqi və gələcəkdə belə bir iddianın qaldırılmayacağına dair hüquqi öhdəliyin götürülməsi;

Dövlətlərarası münasibətlərdə bir-birinin təhlükəsizliyinə hədə törətməkdən, siyasi müstəqillik və ərazi bütövlüyünə qarşı hədə və gücdən istifadə etməkdən, habelə BMT Nizamnaməsinin məqsədlərinə uyğun olmayan digər hallardan çəkinmək;

Dövlət sərhədinin delimitasiyası və demarkasiyası, diplomatik münasibətlərin qurulması;

Nəqliyyat və kommunikasiyaların açılışı, digər müvafiq kommunikasiyaların qurulması və qarşılıqlı maraq doğuran digər sahələrdə əməkdaşlığın qurulması.

Çox maraqlıdır, Ermənistanın 6 təklifi nədən ibarət ola bilər?

Siyasi şərhçi Elşad Həsənov “Bakı-Xəbər”ə açıqlamasında bildirdi ki, sülh danışıqlarının hələ yekunlaşmadığını, davam etdiyini söyləyə bilərik: “Şarl Mişelin vasitəçiliyi ilə bizimlə Ermənistan arasında Brüsseldə bir məhsuldar görüş oldu. Həmin görüşdən sonra xarici işlər nazirləri səviyyəsində görüş baş tutdu. Ardınca  Prezidentin köməkçisi Hikmət Haclyevlə Ermənistanın Təhlükəsizlik Şurasının katibi Armen Qriqoryan arasında görüş baş tutdu. Qriqoryan görüşdən sonra bildirib ki, biz Azərbaycanın təkliflərini qəbul etməyə bilməzdik. Çünki  maddələrin hamısı beynəlxalq hüquq normalarının parametrlərinə tam cavab verir. Ancaq bununla yanaşı, özləri də 6 maddəlik təklif veriblər. Böyük ehtimalla, onların tələbləri sırasında Qarabağın ermənilər yaşayan hissəsinə statusunun müəyyən edilməsi və oradakı ermənilərin hüqiq və azadlıqlarının təmin edilməsi var. Bilirsiniz ki, Azərbaycan dövləti status məsələsi ilə bağlı tələbi rədd edir. Onlar istəyir ki, irəli sürdükləri 6 təklif bizim təkliflərimizlə birləşdirilərək müzakirə edilsin. Onların elə təklifləri var ki, biz onu qəbul etmişik. Məsələn, Qarabağda yaşayan dinc vətəndaşların təhlükəsizliyinə biz tam təminat veririk. Onlar bizim vətəndaşlığımızı qəbul edəcəyi təqdirdə bütün konstitusion hüquqlardan istifadə edəcəklər. Hər halda, Azərbaycan öz prinsiplərindən bir addım da olsun geri çəkilən deyil”.

Məhəmmədəli QƏRİBLİ

Peşə etikası

Son xəbərlər