Qarabağda müvəqqəti yerləşdirilən Rusiya sülhməramlıları iki nəzarət-buraxılış məntəqəsini ləğv edərək oradan çıxıblar. Erməni mediası xəbər verir ki, sökülən hər iki nəzarət-buraxılış məntəqəsi Xocavənd və Xocalı (Sos və Xaçmaç kəndləri) rayonlarında yerləşirdi.
Bildirilib ki, sülhməramlılar həmin kəndlərdə nəzarət-buraxılış məntəqəsi saxlamağı mənasız hesab edib, ona görə də onu söküblər. Ərazidən çıxan rusiyalı hərbçilərin hara köçürülməsi haqqında məlumat verilməyib. Bu məlumat nə dərəcədə həqiqəti əks etdirə bilər və doğrudursa ruslar bunu hansı məqsədlə edib?
“Tərxis Olunmuş Hərbçilərin Gəncləri Maarifləndirmə” İctimai Birliyinin sədri, hərbi ekspert Emin Həsənli “Bakı-Xəbər”ə açıqlamasında bildirdi ki, Rusiya-Ukrayna müharibəsi başlayandan bir müddət sonra Qarabağdakı rus sülhməramlıların bir maşın karvanı ilə xidmət etdikləri ərazini tərk etmələri ilə bağlı görüntülər yayıldı: “Müxtəlif fikirlər səsləndi. Əsasən deyildi ki, Rusiya bu elitar qüvvələrdən Ukraynadakı müharibədə istifadə edəcək. İndi də deyirlər ki, Rusiya ümumilikdə səfərbərlik edə bilməz, çünki 18 milyon ehtiyatı var. Qismən səfərbərlik etsə, yeni çağrışçıları hazırlamağa vaxt lazımdır. Ancaq nəzərə almalıyıq ki, Rusiyanın əsgər sayı hazırda çoxdur. Müharibənin gedişi ərzində də əlavə əsgər hazırlığı ilə məşğul olub. Bu baxımdan da, Qarabağdakı 1960 nəfər sülhməramlı o qədər də böyük rəqəm sayılmır. Ola bilsin ki, bu qüvvələrdən tam başqa istiqamətdə istifadə etmək planı olub. Bütün hallarda, sülhməramlıların addımları Azərbaycan Müdafiə Nazirliyi ilə razılaşdırılmalıdır. Çünki onlar öz xidmətlərini bizə məxsus ərazidə aparırlar. Postların yerdəyişməsi ilə bağlı biz hər hansı rəsmi xəbərə rast gəlməmişik. Rusiya sülhməramlıları ilə bağlı birmənalı fikir yoxdur. Onlar üçtərəfli bəyannamənin şərtlərinə tam əməl etməyənə, erməni silahlılarını tam tərkislah etməyənə kimi onlara münasibət mənfi olacaq. Ukrayna müharibəsi fonunda bu Rusiya üçün son şansdır ki, bölgədə normal sülhməramlı missiya həyata keçirdiyini sübut edə bilsin. Azərbaycan bu yöndə öz üzərinə düşən nə varsa hamısını yerinə yetirir. Bu baxımdan da, sülhməramlılar atdıqları bütün addımlarla bağlı şəffaf izahat verməlidirlər. Son hadisə baş veribsə, buna rəsmi izahat verməlidirlər. Əks halda, belə gizli fəaliyyət sühməramlıların bölgədən çıxarılması ilə nəticələnə bilər”.
Məhəmmədəli QƏRİBLİ
