Prezident İlham Əliyev Dünya Azərbaycanlılarının V Qurultayında çıxışı zamanı bildirib ki, əgər sülh müqaviləsindən imtina etsələr, onda biz də Ermənistanın ərazi bütövlüyünü tanımayacağıq, bunu rəsmən bəyan edəcəyik:
"Hazırda iki ölkənin xarici işlər nazirləri, nazirlikləri işçi qrupları formalaşdırır və hesab edirəm ki, yaxın gələcəkdə konkret danışıqlara başlamaq lazımdır və danışıqları çox uzatmaq lazım deyil. Çünki məhz beş prinsip əsasında sülh müqaviləsi imzalanacaq. Ona görə müqavilənin mətni tezliklə hazırlana bilər, imzalana bilər və beləliklə, Ermənistanla Azərbaycan arasında əlaqələr, o cümlədən diplomatik əlaqələr yaradıla bilər. Bu təklifi irəli sürməklə bir daha biz xoş niyyətimizi göstəririk və yenə də deyirəm, uzaqgörənlik göstəririk. Ermənistanda hərdənbir baş qaldıran revanşist qüvvələr bilməlidirlər ki, bu, Ermənistan üçün yeganə çıxış yoludur və bəlkə də son şansdır. Əgər bundan imtina etsələr, onda biz də Ermənistanın ərazi bütövlüyünü tanımayacağıq, bunu rəsmən bəyan edəcəyik. İkinci Qarabağ müharibəsinin nəticələrini nəzərə alaraq Ermənistan tərəfi yaxşı başa düşməlidir ki, bu addım nəyə gətirib çıxaracaq.
Amma yenə də dediyim bütün bu müsbət məqamlara baxmayaraq, hər birimiz – həm Azərbaycan hökuməti, həm səfirliklər, diaspor təşkilatları, bütün fəallar yeni reallıqları dünya ictimaiyyətinə çatdırmalıdırlar. Sizin – xaricdə yaşayan azərbaycanlıların bu sahədə daha böyük imkanlarınız var. Son illər ərzində bizim diaspor təşkilatlarımız çox fəallaşıb, həm İkinci Qarabağ müharibəsində biz bunu gördük, həm də ondan əvvəlki dövrdə. Hətta erməni radikal qüvvələrinin fiziki hücumlarına baxmayaraq, - onlar yenə də say çoxluğundan istifadə edib bizim fəallara qarşı cinayət törətmişlər, - azərbaycanlılar öz sözünü demişdilər, bu gün də bunu etmək lazımdır".
Maraqlıdır, Azərbaycan Ermənistanın ərazi bütövlüyünü tanımasa nə baş verə bilər?
Milli Dirçəliş Hərəkatı Partiyasının sədri Fərəc Quliyev “Bakı-Xəbər”ə açıqlamasında bildirdi ki, beynəlxalq qanunlara görə, qonşu olan dövlətlər mütləq mənada bir-birinin sərhədlərini tanımalıdır: “Ermənistan bizim ərazi bütövlüyümüzü tanımamaqla, əslində öz sərhədlərini də tanımır. Bununla bərabər üçüncü dövlət Rusiyanın da qoşunlarını sərhəddə yerləşdirib. Həmin ölkənin öz sərhədlərini qoruyan qoşunları yoxdur. Bu, o deməkdir ki, üçüncü dövlətin vasitəsilə sərhədlərini tanımadığı ölkəyə təhdid yaradır. Bu mənada, əgər ərazi bütövlüyümüzü tanımayacaqsa, buna adekvat cavab olmalıdır. Biz də onun ərazi bütövlüyünü tanımırıq. Bunun üçün də tarixi sənədlərə, hüquqa və xəritələrə istinad edirik. Prezident dedi ki, biz 1920-ci ildə SSRİ-yə daxil olanda Zəngəzur Ermənistana verilib. Nəzərə almaq lazımdır ki, Zəngəzur veriləndə indiki Mehri ərazisi verilməmişdi. Bu ərazimiz də 1929-cu ildə Ermənistana verilib. Biz çox rahat şəkildə həmin ərazilərə iddia edə bilərik. Ortada aksioma var. SSRİ-yə daxil olan ölkələr, həmin ərazi ilə də oradan çıxmalıdır. Hətta Ermənistanın ağası olan Putin də bu fikri ifadə etmişdi. Düzdür o, bunu Krıma görə demişdi ki, işğala haqq qazandırsın. Bizim üçün legitim əsaslar yaranır ki, ərazi iddiasında olaq. Azərbaycan öz sərhədlərini qorumaq istiqamətində addımlar atır, ancaq Ermənistan təxribatlar törətməkdə davam edir. Bunların qarşısını almaq üçün, Ermənistanın bizim ərazi bütövlüyümüzü tanıması vacibdir”.
Məhəmmədəli QƏRİBLİ
