Məlum olduğu kimi, Rusiya prezidenti Vladimir Putin Mariupoldakı “Azovstal” zavodu sahəsinə cəmləşmiş Ukrayna ordusu silahlılarının mövqelərinə hücumu tam dayandırmağı əmr edib. Putin bunu Rusiyanın əsgər və zabitlərinin bundan sonrakı hücumda həyatını itirməməsi ilə əlaqələndirib. Putinin bu qərarı müxtəlif müzakirələrə səbəb olub. Müxtəlif versiyalar səslənir. Hətta belə fikirlər var ki, orada yeraltı şəhərcik var.
Məlumat üçün qeyd edək ki, “Azovstal” 12 kv.km ərazisi olan mürəkkəb və çox möhkəm istehkamlı quruluşlu, çoxsaylı yeraltı keçidləri olan sahədir. Hələ sovetlər dövründən bütün şəhərin nüvə hucumundan mülki müdafiə məkanı kimi çox güclü qorunma qurğuları, yeraltı yaşayış üçün nəzərdə tutulub. Belə versiyalar var ki, oranı almaq böyük itkilərə səbəb olacaqdı. Putin əsas diqqəti Donbasın ələ keçirilməsinə yönəldib. Artıq Rusiya prezidenti bununla bağlı əmr də verdi. Ancaq qarşıda 500 km uzunluğunda bir cəbhə xətti var. Bu da Rusiya üçün heç də asan olmayacaq. Çünki Qərbin Ukrayna ordusuna yardımı get-gedə daha da artır.
Bütün bu deyilənlərin fonunda, maraqlıdır, ortada konkret planlar olduğu halda Putin “Azovstal” zavoduna hücumdan niyə vaz keçdi?
“Bir şeyi nəzərə almaq lazımdır ki, rus ordusunun motivasiya səviyyəsi aşağıdır”
Sözügedən məsələyə aydınlıq gətirən hərbi ekspert Azad İsazadə bunu əsasən Rusiya ordusunun üzləşəcəyi ciddi itkilərlə əlaqələndirdi: “Dəqiq səbəbini demək çətindir. Çünki Putinin nə düşündüyünü proqnozlaşdırmaq mümkün deyil. Ancaq real hadisələr onu göstərir ki, doğrudan da Rusiya ordusu “Azovstal”ı ələ keçirə bilməyib. Bu isə o deməkdir ki, orada çox güclü müdafiə sistemi qura biliblər. Çünki zavodun altında yeraltı sığınacaqlar olmaqla yanaşı, həm də etibarlı keçidlər var. Yəni “Azovstal”ın müdafiəçiləri bundan çox məharətlə istifadə edirlər. Nəzərə almalıyıq ki, orada əsasən seçmə və yaxşı döyüş təcrübəsinə malik “Azov” alayı vuruşur. O cümlədən, desant və milli qvardiya qüvvələri döyüşür. Rusiya ordusu ora daxil ola bilmir və buna görə də Putin hücumu dayandırıb. Üstəlik, qarşıdan 9 May gəlir. O vaxta qədər Putin bir sıra hədəflərə çatmağı qarşısına məqsəd qoyub. “Azovstal”a hücum davam etsəydi, vaxt daha da uzanacaqdı. Rusiya üçün indi əsas vacib məntəqə Kramatorskı ələ keçirməkdir. Ona görə də bütün gücü ora yönəldiblər. Ancaq bütün bunlar o demək deyil ki, “Azovstal” ətrafında döyüşlər davam etməyəcək. Orada 2000-dək yüksək motivasiyalı müdafiəçi var. O üzdən, onlar döyüşü davam etdirəcək. Hətta əks-hücuma keçəcəkləri də istisna deyil. Bir şeyi nəzərə almaq lazımdır ki, rus ordusunun motivasiya səviyyəsi aşağıdır”.
Ekspert onu da əlavə etdi ki, Ukraynada döyüşlər daha da şiddətlənəcək.
Vidadi ORDAHALLI
