Ermənistanda ictimai-siyasi müstəvidə ziddiyyətlərin son dpvrlərdə yenidən kəskinləşməsi, iqtidar və müxalifət arasında uçurumun daha da dərinləşməsi müşahidə edilir. Bu da nəticə etibarı ilə cəmiyyətdə proseslərə neqativ təsir göstərir.
Müxalifət Qarabağ məsələsi ilə bağlı son proseslər fonunda hakimiyyətə təzyiq göstərməyə çalışsa da, istədiyi nəticəni ala bilmir. İlk növbədə ona görə ki, cəmiyyətdən lazımı dəstək ala bilmir. Bununla belə, artıq bir neçə gündür ki, Ermənistan parlamentinin “Şərəf duyuram” fraksiyasının rəhbəri, ölkənin Milli Təhlükəsizlik Xidmətinin keçmiş direktoru Artur Vanetsyan İrəvanda, Azadlıq meydanında Qarabağla bağlı oturaq aksiya keçirir. Ermənistanın “Qraparak” nəşri yazır ki, bu hal hakimiyyətin lehinə işləyir: “Elə görünürdü ki, Qarabağ erməniləri və xüsusən də məşhur adamları – “siyasətçilər”dən tutmuş ziyalılara və generallara qədər hər kəs Qarabağ uğrunda mübarizəyə qoşulmalı idi. Lakin onlar gizləniblər. Yalnız “Ədalət” fraksiyasının lideri Davit Qalstyan bir neçə gündür Azadlıq meydanında Vanetsyanın yanındadır və o, maarifləndirmə yürüşünün ön cərgələrində olub. Qarabağın “siyasi elitası” niyə bu günlərdə Azadlıq meydanında deyil və ya heç olmasa dəstəkləyici bəyanatlar, müsahibələr vermir? Jurnalistimiz bu barədə Qarabağın “deputatı” Vahram Balayana sual verib. “Yəni Qarabağdan Azadlıq meydanına toplaşmağa gəlməlidirlər?”, - deyə o, suala sualla cavab verib. Yeri gəlmişkən, bu günlərdə Qarabağın məşhur adamları, “keçmiş məmurlar”, generallar gizli fəaliyyətə keçiblər və telefon zənglərinə belə cavab vermirlər”. Qarabağ məsələsindən bir şey çıxmadığı üçün müxalifət Paşinyanı Ermənistan-Rusiya münasibətlərini korlamaqda ittiham etməyə başlayıb. Ermənistan Respublikaçılar Partiyasının sədr müavini Armen Aşotyan bu xüsusda bildirir: “Ermənistanı hələ də baş nazir Nikol Paşinyan təmsil edir. O isə öz “ata evini” satmağa hazırdır. Alıcılar kifayət qədər çoxdur və hər kəs mütləq “pay almaq” istəyəcək. Burada, başa düşməliyik ki, problem onlarda deyil, bizdədir. Axı biz hələ də Qarabağın təhvil verilməsinin vacibliyindən açıq danışan adamla təmsil olunuruq. Və o, hələ də hakimiyyətdədir. Xarici dünya bu insanla yalnız öz mənfəəti üçün ünsiyyət qurur. Paşinyan həm Brüsseldə, həm də Moskvada danışıqları təmin etməklə “geosiyasi şpaqat” açdı. Bu hakimiyyət Ermənistan-Rusiya strateji münasibətlərini korlayır. Xarici siyasətimizdə həmişə Ermənistan-Rusiya strateji münasibətləri üstünlük təşkil edib. Bizim qorxumuz o idi ki, Nikol Paşinyan və komandası ardıcıl olaraq Ermənistan-Rusiya münasibətlərini pozacaq. Son 4 ildə bunun şahidi olduq”. Amma erməni politoloq Areq Koçinyan Ermənistan müxalifətinin hərəkətlərinə toxunaraq vurğulayıb ki, müxalifətin addımlarının Qarabağ və Ermənistanla heç bir əlaqəsi yoxdur, bu addımlar Ermənistanın “suverenliyi”nə qarşı addımlardır. Elə Ermənistanın Respublikaçılar Partiyasının üzvü Karine Əcəmyan da məsələyə eyni prizmadan yanaşır: “Bu günlərdə Ermənistanda bir qrup insan indiki hakimiyyətə qarşı etirazlar keçirir, Paşinyan və onun komandasını devirmək istəyir, guya bunların hamısı Ermənistan naminə edilir. Amma gözüaçıq cəmiyyətin üzvləri tam olaraq anlayır ki, bu etirazların arxasında duran sarkisyançılar, köçəryançılar, qərbyönlülər, ruspərəstlərdir və onların ən əsas məqsədi taxtdır. Erməni xalqı avam, axmaq xalq deyil. Nəyin necə olduğunu biz ilk gündən görürük. Hamımız anlayırıq ki, bütün bu baş verənlər yaxın gələcəkdə azərbaycanlı və türklərin İrəvan küçələrində rahat dolaşacaqlaqlarından, Qarabağ və Zəngəzurun isə tam olaraq Bakının nəzərəti altında olacağından xəbər verir. Bu prosesi dayandıra biləcək heç nəyimiz yoxdur. Xalqımız müharibə istəmir. Məhz bu səbəbdən o yuxarıda adların çəkdiyimiz robertçilər, serjçilər heç nəyə nail ola bilməyəcəklər. Biz anlayırıq ki, Nikol nə qədər zəif siyasətçi olsa da, respublikasını tam olaraq yoxa çıxmaqdan qoruya biləcək”. Erməni siyasətçinin sözlərinə əsasən, hazırda Ermənistanda Qərbin müəyyən gücləri tərəfindən planlar hazırlanır: “Hər şeyə hazır olmalıyıq”. Yeri gəlmişkən qeyd edək ki, “Qraparak” nəşri Qərbin müəyyən addımlar atacağını yazır: “Bu günlərdə Ermənistanın baş naziri Nikol Paşinyanın Rusiyaya səfər edərək burada müttəfiqliyi gücləndirən yeni sənədlərə qol çəkməsi İrəvanda birmənalı qarşılanmayıb. Qərbin Moskvaya qarşı bütün sferalarda genişmiqyaslı cəbhələr açması fonunda baş nazirin Rusiyaya sığınması siyasi elitanın qəzəbinə səbəb olub. Nikol Paşinyanın Moskva səfəri hakim fraksiyada çaxnaşma yaradıb. Mənbələrimiz bildirir ki, Paşinyanla Putinin məlum birgə bəyanatından sonra Qərb və ya daha dəqiq desək, Soros sektoru parlament daxilində birbaşa etirazlara qalxaraq baş naziri açıq şəkildə hədələyir. Onlar deyirlər ki, Nikol bundan sonra “rus çəkmələrini yalayacaq” və Qərbdən uzaqlaşacaq”. O da vurğulanır ki, Paşinyan Moskvaya getməzdən əvvəl və ya səfərdən sonra deputatlarla görüşməsə də, səfərin nəticələrini onlara təqdim etməsə də, məlum bəyanatın mətnində Qarabağ məsələsinin qısa şəkildə də olsa qeyd olunması iqtidaryönlü deputatların hirsini nisbətən soyudub: “Məsələ burasındadır ki, bir neçə həftə əvvəl Brüssel görüşündən sonra Avropa İttifaqı Şurasının prezidenti Şarl Mişelin yaydığı bəyanatda Qarabağla bağlı bir kəlmə də söz açılmamışdı. Mənbəmiz xatırladıb ki, bu isə Avropa İttifaqı ilə bağlı üçtərəfli görüşlərə dair Dağlıq Qarabağın adı çəkilməyən üçüncü belə haldır”.
Tahir TAĞIYEV
