Rusiyanı Ukraynada məğlubiyyətə uğratmaq üçün Qərb ölkələrinin indi daha böyük qətiyyətlə hərəkət etməsi müşahidə edilir. Bunu, əvvəlki dövrlərdən fərqli olaraq, Qərbin Ukraynaya daha ağır silahlar verməyə razılaşması da sübut edir. Artıq ABŞ bu istiqamətdə fəaliyyətə başlayıb.
Belə bir vaxtda Avropa İttifaqı Şurasının prezidenti Şarl Mişel “European Pravda” qəzetinə müsahibəsində maraqlı açıqlamalar verib. O bildirib ki, Avropa İttifaqı Rusiyaya qarşı müharibədə dəstək olmaq üçün ağır silahlar alıb Ukraynaya pulsuz təhvil verməyə razılaşıb: “Təhlükəsizlik baxımından bununla bağlı çox xəbər olmayacaq. Amma biz Ukraynanı bu silahlarla təmin etmək öhdəliyimizə sadiqik. Mən çox yaxşı xatırlayıram ki, müharibə başlayandan iki gün sonra prezident Zelenski mənə zəng edərək Ukraynaya silah verilməsini koordinasiya etməyi xahiş etdi. Avropa İttifaqı üçün çox çətin qərar idi, biz bunu əvvəllər etməmişdik. Ancaq biz bunu bir neçə saat ərzində etdik”. Onun sözlərinə görə, o vaxtdan keçən iki ay ərzində Avropa İttifaqı “European Peace facility” (Ukrayna Silahlı Qüvvələrinin ehtiyaclarını ödəmək üçün satınalmalarda istifadə olunur) vasitəsilə artıq 1,5 milyard avro ayırıb: “Bu, bir çox Avropa İttifaqına üzv dövlətlərin ikitərəfli səviyyədə gələn dəstəyinə əlavədir. Lakin bu yardım kifayət deyil, biz daha çox etməliyik və edəcəyik”. Beləliklə, Qərb Rusiyanı Ukrayna bataqlığına daha çox batırmağa çalışır. ABŞ-ın maliyyə naziri Canet Yellen bu fonda qeyd edir ki, Amerika Birləşmiş Ştatlar hazırda “Böyük Yeddilik”də olan tərəfdaşları və beynəlxalq maliyyə institutları ilə növbəti rüb ərzində Ukrayna iqtisadiyyatı üçün ayda 5 milyard dollar səviyyəsində yardım ayıracaq: “Biz “Böyük Yeddilik”çərçivəsində, həmçinin beynəlxalq maliyyə institutları ilə müzakirələr aparırıq. Biz maliyyə ehtiyaclarını və bu pulu necə toplaya biləcəyimizi müzakirə edəcəyik. Düşünürəm ki, biz Ukraynanın ehtiyaclarını ödəmək üçün yollar tapmalı olduğumuzu qəbul etməkdə birləşmişik”.Onun sözlərinə görə, ABŞ Ukraynaya 1 milyard dollar yardım edib və gələcək maliyyə dəstəyi üçün ABŞ administrasiyası Konqresə əlavə sorğu ilə müraciət etməli olacaq.
Lakin Rusiya da geri çəkilmək niyyətində deyil. Tanınmış rusiyalı ekspert Konstantin fon Eggert hesab edir ki, Kreml təkcə Donbasla kifayətlənməyəcək. O hesab edir ki, Donbas uğrunda döyüş Rusiyanın Ukraynaya təcavüzünün final yox, aralıq mərhələsi olacaq: “Putinə bəzi regionlar yox, bütün Ukrayna lazımdır. Buna görə də döyüşlər bir müddət səngisə belə, müəyyən müddətdən sonra Rusiya prezidenti yenə də genişmiqyaslı müharibəyə qayıdacaq”. Onun fikrincə, Donbas uğrunda döyüş mühüm məqamdır, lakin Rusiya ilə Ukrayna arasında müharibə aylarla, bəlkə də illərlə davam edəcək: "Putinin anlayışına görə, hətta Rusiya Federasiyasının ərazisi ilə Krım arasında bir növ quru dəhlizinin yaradılması da Ukrayna probleminin bütövlükdə həlli demək deyil. Müharibə davam edəcək, çünki Rusiyaya tamamilə tabe olan Ukrayna lazımdır. Ona görə də Putin bu ideyanın prinsipcə mümkün olmadığına əmin olana qədər hansısa formada Ukraynanı özünə tabe etdirməyə çalışacaq”. Eggert əmindir ki, Rusiyanın bank sistemi Qərblə əlaqəsi kəsildiyi üçün ölkəsinin defolt olub-olmamasının Putin üçün heç bir əhəmiyyəti yoxdur: “İnvestorlar Rusiyadan qaçır. 1998-ci ildə də maliyyə böhranı oldu, amma o zaman Rusiya dünyaya açıq idi və xarici kreditlərdən asılı idi. İndiki Rusiyada belə bir şey yoxdur və hələ gözlənilmir”. Onun sözlərinə görə, Qərbin tətbiq etdiyi sanksiyalar müəyyən müddətdən sonra öz təsirini göstərəcək: “Rusiyada bu, təxminən bir il çəkə bilər. Ehtimal etmək olar ki, qlobal iqtisadiyyata ciddi şəkildə qarışan Rusiya böyük zərər görəcək. Xüsusilə yüksək texnologiyalar yarımkeçiricilər və idxalın bütöv bir çeşidi sahəsində yerli istehsalla əvəz edilə bilməz və ya qismən Çin tədarükü ilə əvəz edilə bilməz”. Politoloq qeyd edir ki, Kreml hakimiyyəti ölkə əhalisini sonsuza qədər vətənpərvər isteriya vəziyyətində saxlaya bilməyəcək. Bununla belə, Rusiyanın Ukraynada daha bir təhlükəli addım atmağa hazırlaşdığı üzə çıxıb. Belə ki, Rusiyanın tutduğu Xerson vilayətində işğalçılar “xalq respublikası” yaratmaq üçün aktiv fəaliyyətə başlayıblar. Ukraynanın “Cənub” operativ komandanlığı bildirir ki, artıq “referendum” keçirmək üçün hazırlıqlar gedir. İddiaya görə, “referendum”u 27 apreldə keçirmək planlaşdırılıb. Ukraynalı ombudsman Lüdmila Denisova isə qondarma referendumun 1-10 may arasında keçiriləcəyinə cəhd ediləcəyi haqda məlumat aldığını deyib. Qeyd edib ki, 2014-cü ildə Luqansk və Donetskdə keçirilən qondarma referendum ssenarisini Xersonda tətbiq etməyə çalışırlar. Xerson şəhər meri İqor Kolıxayev onda “referendumun tarixi” ilə bağlı hər hansı dəqiq məlumat olmadığını deyib. Kolıxayev hazırda işğal altında olan şəhərdə fəaliyyətini davam etdirdiyini, insanlara xidmət etdiyini də bildirib.
Nahid SALAYEV
