Aprelin 22-də Şuşa şəhərində Dünya Azərbaycanlılarının V Qurultayı işə başlayıb. Azərbaycan Prezidenti İlham Əliyev tədbirdə çıxış edib. Aprelin 23-dək davam edəcək Zəfər qurultayında 65 ölkədən 400 nəfərə yaxın diaspor nümayəndəsi iştirak edir.
Qeyd edək ki, Dünya Azərbaycanlılarının V Qurultayı son illər yüksək təşkilatlanma və birlik nümayiş etdirən, beynəlxalq ictimaiyyətin Azərbaycan həqiqətləri ilə bağlı məlumatlandırılmasında xüsusi rol oynayan diasporumuzun Qarabağın azad olunmasından sonra ilk böyük görüşüdür. Zəfər Qurultayında bundan sonra diasporun fəaliyyətini müəyyənləşdirəcək mühüm qərarların qəbul ediləcəyi gözlənilir.
Xatırladaq ki, Dünya Azərbaycanlılarının I Qurultayı ümummilli lider Heydər Əliyevin təşəbbüsü ilə 2001-ci ildə, II qurultay Prezident İlham Əliyevin Sərəncamına əsasən 2006-cı ildə, III qurultay 2011-ci ildə, IV qurultay isə 2016-cı ildə keçirilib.
Şuşada keçirilən V Qurultay dünya azərbaycanlılarının işində, fəaliyyətində konkret olaraq nələri dəyişməlidir, hansı istiqamətdə dəyişikliklər yaratmalıdır?
“Yeni hədəflər də, məqsədlər çox aydındır”
AVCİYA-nın vitse-prezidenti, professor, siyasi şərhçi Məhərrəm Zülfüqarlı “Bakı-Xəbər”ə şərhində bildirdi ki, əvvəlki qurultaylardan fərqli olaraq, V Qurultay Zəfər qurultayıdır və bunun Şuşada keçirilməsinin xüsusi mənası var. M.Zülfüqarlı hesab edir ki, V qurultay həmçinin dünya azərbaycanlılarının tamamilə yenidən təşkilatlanması, daha da güclü fəaliyyət göstərməsi, o cümlədən də bu sahədə olan boşluqların aradan qaldırılması, fəaliyyətlərinə yeni biçim, yeni məzmun verilməsi baxımından çox əhəmiyyətlidir. Professor Zülfüqarlının fikrincə, diasporumuz, dünya azərbaycanlıları öz fəaliyyət istiqamətlərində xeyli dəyişikliklər etməlidirlər və edəcəklər də. “Şuşada Dünya Azərbaycanlılarının V Qurultayı keçirilir. Bu çox əlamətdar hadisədir, 44 günlük müharibədən sonra yaşayan tarixi hadisələrdən biridir. Mən özüm Dünya Azərbaycanlılarının qurultayının bir neçəsinin iştirakçısı olmuşam. Bu həmrəylik Azərbaycan dövlətinin daha da güclənməsinə dəstəkdir, köməkdir. Bilirsiz ki, Dünya Azərbaycanlılarının həmrəyliyinin əsası 1989-cu ilin dekabrında Naxçıvanda sərhəd hərəkatında qoyulub. Sonradan həmin gün - dekabrın 31-i Dünya Azərbaycanlılarının Həmrəylik Günü kimi qeyd olunur. Ümummmili liderimiz Heydər Əliyevin bilavasitə səyi nəticəsində bu əlamətdar hadisə tarixə düşüb. Qurultay isə xaricdə yaşayan soydaşlarımızın fəaliyyətini əlaqələndirmək, onların xaricdəki fəaliyyətlərinin hədəflərini müəyyənləşdirmək baxımından və Azərbaycan həqiqətlərinin dünyaya çatdırılmasında mühüm əhəmiyyət kəsb edib. Heç şübhəsiz ki, zəfər qurultayından sonra Dünya Azərbaycanlıları öz fəaliyyətlərində xeyli dəyişikliklər etməlidirlər və yeni hədəflərlə yola çıxmalıdırlar. Yeni hədəflər də, məqsədlər çox aydındır. Çünki onlar qalib bir ölkənin diasporudur, müzəffər bir xalqın övladlarıdır. Dünya Azərbaycanlıları öz fəaliyyətlərini qalib bir dövlətin təbliğatçısı kimi qurmalıdırlar. Prezident xaricdə yaşayan görkəmli soydaşlarımızı təltif etdi, onların fəaliyyətini qiymətləndirdi. Mənə elə gəlir ki, bu qurultay Azərbaycanın dünyada daha da tanınmasına, mövqeyinin daha güclənməsinə səbəb olacaq”.
M.Zülfüqarlının sözlərinə görə, o, illər əvvəl Almaniada fəaliyyət göstərən Azərbaycan və Türkiyə diasporunun Xocalı soyqırımı ilə bağlı Berlin, Frankfurt və Hamburq şəhərlərində keçirilmiş tədbirində iştirak və məruzələrlə çıxış edib: “Yəni 2014-cü ilin fevralında xaricdə fəaliyyət göstərən soydaşlarımızın fəaliyyətini əyani görmüşəm”.
İradə SARIYEVA
