Dünya azərbaycanlılarının təşkilatlanması və fəaliyyətində artıq yeni bir mərhələ başlayır. Bu mərhələdə fəaliyyət istiqamətlərinin əsas konturları aprelin 22-də Şuşa şəhərində Dünya Azərbaycanlılarının V Qurultayı – Zəfər Qurultayında Prezident İlham Əliyevun nitqində əks edildi.
Dövlət başçısı öncə diqqəti ona yönəltdi ki, 44 günlük müharibədə əldə edilən tarixi Zəfərdən sonra ilk dəfədir ki, dünya azərbaycanlıları toplaşır, qurultay keçirir. Qurultayın isə Zəfər adı daşıması təsadüfi deyil: “Ümumiyyətlə Zəfər adı xalqımıza çox yaraşır. Siz buraya Zəfər yolu ilə gəlmisiniz, qurultayın adı Zəfər qurultayıdır. Hazırda ölkəmizin müxtəlif yerlərində, ilk növbədə, azad edilmiş ərazilərdə Zəfər muzeyləri inşa edilir. Bundan sonra Azərbaycan xalqı müzəffər xalq kimi əbədi yaşayacaq, bundan sonra bizim dövlətimiz qalib dövlət kimi yaşayacaq. Bu böyük xoşbəxtlikdir - hamımız üçün, Azərbaycanda yaşayanlar, Azərbaycan vətəndaşları üçün, xaricdə yaşayan azərbaycanlılar üçün”. İndi Azərbaycanın yaratdığı yeni reginal reallıqlar fonunda dünya azərbaycanlılarının təşkilatlanması, diaspor quruculuğu müstəsna önəm kəsb edir. Faktdır ki, xaricdə yaşayan soydaşlarımızın, təşkilatların fəaliyyətinin koordinasiyası milli həmrəyliyin güclənməsinə, strateji hədəflərin reallaşmasına təkan verib. Bu mənada, Dünya Azərbaycanlılarının V Qurultayının Şuşada keçirilməsinin əhəmiyyəti də böyükdür. Bunun mühüm mənəvi-siyasi əhəmiyyəti, rəmzi mənası var. Qeyd edək ki, indiyə qədər keçirilmiş 4 qurultay dünya azərbaycanlılarının həmrəyliyinin güclənməsinə müstəsna töhfə verib. Beşinci qurultay isə Zəfər təntənəsidir, yeni Qələbə salnaməsinin yaradılmasıdır. Elə bu səbəbdən Zəfər Qurultayı zəngin dövlətçilik tariximizin parlaq səhifələrindən biri olacaq. Bu Zəfərin əldə edilməsində bütün azərbaycanlıların öz payı var. Məsələnin bu tərəfinə toxunan prezident İlham Əliyev qeyd edir: ”Biz hamımız - həm Azərbaycanda yaşayan Azərbaycan vətəndaşları, dünya azərbaycanlıları bir nöqtəyə vururduq, bir hədəfə çatmaq üçün çalışırdıq. Mən deyirdim ki, biz hər birimiz hər gün bu müqəddəs günü yaxınlaşdırmalıyıq, öz əməyimizlə, işimizlə, hərə öz yerində və torpaqlarımızın işğaldan azad olunmasından daha vacib və ali vəzifə yox idi... Bizim bütün işlərimizin, apardığımız siyasətin, atdığımız addımların fövqündə bu müqəddəs günü yaxınlaşdırmaq və bu günü görmək amalı dururdu. Biz buna öz gücümüzlə nail olduq. Azərbaycan xalqı 30 il davam edən mənasız danışıqlar əvəzinə öz gücünü ortaya qoydu, ədaləti bərpa etdi, beynəlxalq hüququ bərpa etdi və bütün dünyaya sübut etdi ki, biz böyük xalqıq və heç vaxt bu xalq, Azərbaycan xalqı işğalla barışmaq fikrində deyildi”.
Dövlət başçısı çıxışında Ermənistan-Azərbaycan münaqişəsinə ekskurs etməklə yanaşı, Azərbaycanın, onun diasporunun qarşısında yeni vəzifələr də müəyyənlşdirdi. Bu vəzifə və tapşırıqların ən vacib istiqamətlərindən biri məhz ölkəmizə qarşı aparılan bəzi təxribat və çirkin təbliğatların qarşısının alınması, Azərbaycan həqiqətlərinin daha aktiv şəkildə diaspor təmsilçiləri vasitəsilə onların çalışdıqları, yaşadıqları ölkələrdə geniş ictimai zümrələrə təqdim olunması və azərbaycanlıların yaşadıqları ölkələrin ictimai-siyasi həyatında daha da aktiv rol oynamalarıdır. Qeyd etmək lazım gəlir ki, postmünaqişə dövründə erməni lobbi təşkilatları, onların bəzi havadarları tərəfindən Azərbaycana qarşı davamlı surətdə çirkin təxribat və kampaniyalar aparılır. Bu səbəbdən diaspor təşkilatlarının üzərinə yeni tapşırıqlar və vəzifələr düşür ki, onlar daha da koordinasiyalı şəkildə və sıx birləşərək Azərbaycan həqiqətlərini dünya ictimaiyyətinə çatdırsınlar. Bu xüsusda Prezident İlham Əliyev qeyd edib: “Son illər ərzində bizim diaspor təşkilatlarımız çox fəallaşıb, həm İkinci Qarabağ müharibəsində biz bunu gördük, həm də ondan əvvəlki dövrdə. Hətta erməni radikal qüvvələrinin fiziki hücumlarına baxmayaraq, - onlar yenə də say çoxluğundan istifadə edib bizim fəallara qarşı cinayət törətmişlər, - azərbaycanlılar öz sözünü demişdilər, bu gün də bunu etmək lazımdır. Yəni, yaşadığınız ölkələrin ictimaiyyətini, əgər belə demək mümkündürsə, maarifləndirmək lazımdır - həm Azərbaycan reallıqları haqqında, postmünaqişə dövrü haqqında və Azərbaycan tarixi haqqında. Hesab edirəm ki, bu, çox vacibdir. Çünki tarixi amillər həmişə istənilən münaqişənin siyasi və digər yollarla həll edilməsi üçün çox vacibdir. Tarix də göz qabağındadır”. Diaspor qarşısında yeni vəzifələrlə bağlı TASS agentliyinin baş direktorunun birinci müavini Mixail Qusman qeyd edir ki, prezident İlham Əliyev Şuşadakı çıxışında Azərbaycanın gələcəyinə inamı və əminliyi ilə hər kəsi ruhlandırdı: “Dünya Azərbaycanlılarının V Qurultayının Şuşada, Azərbaycanın azad edilmiş ərazisində, neçə illər işğal altından olmuş tarixi Azərbaycan ərazisində keçirilməsi tarixi hadisədir. Bütün dünyadan həmvətənlərimizin buraya gələ bilməsi hər kəsə güclü təsir bağışladı. Hamı yüksək əhval-ruhiyyədədir və bu əhval Azərbaycan Prezidenti İlham Əliyevin çıxışı zamanı xüsusilə müşahidə olundu. O, hər kəsi Azərbaycanın gələcəyinə inamı və əminliyi ilə ruhlandırdı və ölkənin planları barədə danışmaqla böyük təəssürat oyatdı. Qurultayın bütün iştirakçıları yaşadıqları yerdən asılı olmayaraq hər zaman öz doğma torpaqlarına onun gələcəyi, uğurları və nailiyyətləri ilə bağlıdır. Biz arzulayırıq ki, Azərbaycan üzərində həmişə dinc səma olsun. Əsas odur ki, Azərbaycan bu gün dünya ictimaiyyətinin hörmətli üzvlərindən biridir, gələcəyə inamla baxır və fikrimcə, möhtəşəm planlara malikdir. Əminəm ki, bu planlar reallaşacaq”.
Dövlət başçısı onu da ayrıca qeyd etdi ki, diasporun ana Vətənlə təmasları da sıx olmalıdır və bu zaman an dili faktoru diqqət mərkəzində yer almalıdır: “Azərbaycanda yaşayan azərbaycanlılar istəyirik ki, xaricdə yaşayan azərbaycanlılar öz tarixi Vətəni ilə sıx bağlı olsunlar... Əlbəttə, çox istəyirik ki, ikinci, üçüncü nəsil azərbaycanlılar öz mədəniyyətinə bağlı olsun. Əlbəttə, bu o qədər də asan məsələ deyil. Burada onlar, ilk növbədə, Azərbaycan dilini bilməlidirlər. Burada, əlbəttə ki, təkcə ailələrdə Azərbaycan dilini yaşatmaq mümkündür, ancaq kifayət deyil. Ona görə Azərbaycan məktəblərinin, bazar günü məktəblərinin açılması istiqamətində də biz hər zaman kömək göstərməyə hazırıq. Əslində, bunu edirik. Bəlkə də bunu daha da təşkilatlanmış şəkildə etmək lazımdır. Çünki Ana dili əsas amildir. Ana dili bütün Azərbaycan vətəndaşlarını birləşdirir”. Bütün bunlar bir daha təsdiq edir ki, Azərbaycan diaspor fəaliyyətindəki inkişafın yeni mərhələsinə çatıb. Bundan sonrakı mərhələdə Azərbaycanın necə sülhpərvər ölkə olduğunu və prezidentin dediyi kimi düşmənə yalnız döyüş meydanında beynəlxalq qanunlar çərçivəsində cavab verən ləyaqətli bir ölkə olduğunu göstərmək lazımdır. Diaspor xarici ölkələrdə dövlətçilik prinsiplərini əsas tutaraq iş aparmalıdır. Diaspor nümayəndələri Azərbaycan həqiqətlərini dünyaya çatdırmaq və lazım olanda bəzi qüvvələrin yalanlarını ifşa etmək məsələsində aktivliyini daha da artırmalıdır.
Tahir TAĞIYEV
