Ermənistanın baş naziri Nikol Paşinyanın Rusiya prezidenti Vladimir Putinlə görüşünün nəticələri ilə bağlı müzakirələr davam etməkdədir.
Moskvada aparılmış danışıqlarının yekunlarına əsasən Kremlin saytında dərc olunmuş birgə Bəyanatda deyilir ki, Putin-Paşinyan görüşündə üçtərəfli əməkdaşlığın gücləndirilməsi, baş nazir müavinlərinin birgə sədrliyi ilə yaradılan komissiyanın fəaliyyətinin aktivləşdirilməsi barədə razılığa gəlinib. 3+3 əməkdaşlıq formatının uğurla fəaliyyətə başladığı qeyd edilib. Putinlə Paşinyan Ermənistan-Azərbaycan sərhədinin delimitasiyası üzrə komissiyanın yaradılması prosesini sürətləndirmək barədə də razılığa gəliblər.
Moskva və İrəvan, həmçinin, Azərbaycan, Ermənistan və Rusiya liderlərinin müntəzəm görüşləri və üç liderin 9 noyabr 2020-ci il, 11 yanvar tarixli razılaşmalarının icrası çərçivəsində konstruktiv işi davam etdirmək barədə razılığa gəlib.
Tərəflər Rusiya sülhməramlı kontingentinin təhlükəsizliyin təmin edilməsinə, Dağlıq Qarabağ əhalisinin həyatı üçün əlverişli və təhlükəsiz şəraitin yaradılmasına həlledici töhfəsini vurğulayıb. Onlar təxirəsalınmaz humanitar vəzifələrin tezliklə həllinin, Dağlıq Qarabağ nizamlanmasının siyasi və diplomatik vasitələrlə həllinin zəruriliyini, bu kontekstdə ATƏT-in Minsk qrupunun həmsədrlik institutunun potensialından və təcrübəsindən onun beynəlxalq mandatına uyğun istifadənin vacibliyini qeyd ediblər.
Maraqlıdır ki, görüşlə bağlı Kremldən yayılan sənəddə Minsk qrupunun həmsədrlik institutunun potensialı və təcrübəsindən yararlanmaq ifadələri var. Rusiya MQ-ni yenidən proseslərə qoşmaq istəyir. Maraqlıdır ki, Rusiya rəsmiləri bir neçə gün əvvəl Minsk qrupunun fəaliyyətinin dayandığını bəyan etdilər. Hətta həmin təsisatdakı həmsədrin fəaliyyətinə xitam verib, onu xüsusi nümayəndə kimi təyin etdilərsə, yenidən Minsk qrupunun fəaliyyətinin dirildilməsi ilə bağlı təzadı necə anlamaq olar?
Qarabağ Azadlıq Təşkilatının sədri Akif Nağı “Bakı-Xəbər”ə bildirdi ki, Paşinyanın budəfəki Moskva səfəri bir sıra vacib məqamları ilə diqqəti cəlb etdi: “Rusiya ona xüsusi bir münasibət sərgilədi. Bura Putinlə keçirilən görüşü və ətraflı müzakirəni, ölkələr arasında müxtəlif sahələri əhatə edən əməkdaşlıq sənədinin imzalanmasını, Dumanın və Federasiya Şurasının sədri ilə görüşü, Nijnıy Novqoroda səfərini aid edə bilərik. Bunu belə şərh etmək olar ki, özü üçün gərgin bir məqamda Rusiya Ermənistanın hansısa formada könlünü alıb, özünə cəlb etmək istəyir. Ola bilər ki, Rusiya Paşinyanı Avropanın da müdafiə etdiyi Brüssel razılaşmasında əldə olunan nəticələrə razı salmaq istəyir. Ancaq bu da çox inandırıcı görünmür. Böyük ehtimalla, Rusiya Ermənistandan öz məqsədləri üçün istifadə etməyə çalışır. Minsk qrupu ermənilərin yeganə tutacaq yeri hesab olunur. Rusiya bununla Ermənistana bir reverans edir. Sənəddə həmin məqamın olması elə sənəd üzərində də qalacaq. Rüsiya Minsk qrupunu diriltmək istəsəydi xüsusi nümayəndəlik institutu yaratmazdı. ABŞ da bənzər addım atıb. Yəqin ki, Fransa da eyni yolla gedəcək. Artıq bu o anlama gəlir ki, tərəflər Azərbaycanın mövqeyini qəbul ediblər. Minsk qrupu heç bir mahiyyət daşımadığı üçün onu buraxıblar. Sənədə Minsk qrupu ilə bağlı salınan bəndin heç bir əhəmiyyəti olmayacaq. Bunu bütün həmsədrlər və Ermənistanın özü də yaxşı anlayır”.
Məhəmmədəli QƏRİBLİ
