Rusiya ilə yaxınlaşan Ermənistan Qərb tərəfindən yaxın tezlikdə ciddi cəzalara məruz qala bilər. Çünki Ermənistan Rusiyanın Ukrayna siyasətinə getdikcə daha çox dəstək verməyə başlayır. Qeyd edilənlər fonunda “armenianreport” portalı yazır ki, Ermənistanın baş naziri Nikol Paşinyanın Rusiyaya son səfəri bu mənada uğurlu sayıla bilməz.
Diqqət ilk olaraq ona yönəldilir ki, Rusiya və Ermənistan nasizmə qarşı birgə mübarizə haqqında razılığa gəlib: “Bu barədə məsələ Rusiya prezidenti Vladimir Putinlə Ermənistanın baş naziri Nikol Paşinyan arasında danışıqların yekunlarına dair verilən birgə bəyanatda xüsusi vurğulanır. Təkcə bu başlıq xüsusi diqqətə dəyər! Onu oxuyandan sonra Qərb, xüsusən də ABŞ və Böyük Britaniyanın siyasətçiləri ölkəmizə siyasi və iqtisadi təzyiq göstərmək üçün çox konkret addımlara keçə bilərlər. Kremlin mətbuat xidmətinin məlumatında isə nasizmə qarşı birgə mübarizə ilə bağlı qeyd olunur: “Tərəflər ortaq keçmişə ümumi yanaşmaları saxlamaqla, İkinci Dünya müharibəsinin nəticələrinə yenidən baxılmasına və tarixin saxtalaşdırılmasına qarşı mübarizəni davam etdirmək niyyətində olduqlarını bildiriblər. Biz irqçilik, ksenofobiya, neonasizmin istənilən təzahürlərinə, habelə milli, dil və ya dinə görə ayrıseçkiliyə, o cümlədən Rusiyada və Ermənistanda yaşayan vətəndaşların və həmvətənlərin hüquq və qanuni maraqlarına toxunan ayrıseçkiliyə qarşı səyləri artırmağa razılaşdıq”. Bəli, burada nasist Almaniyasında olan faşizmi ağartmağın yolverilməzliyindən danışılır. SSRİ-də və dünyanın müxtəlif ölkələrində on milyonlarla insanın həyatı bahasına dünyanı fəlakətə sürükləyən məhz o idi. Amma problem ondadır ki, indiki mərhələdə bütün sivil dünya Putin Rusiyasını Hitler Almaniyasının prototipi kimi qəbul edir. Bu, təkzibedilməz faktdır. Şübhə edənlərə xatırlatmaq istərdik ki, ABŞ Dövlət Departamentinin nümayəndəsi Ned Prays CNN-ə deyib ki, dövlətlər Rusiya Federasiyasının “terrorizmin sponsorları” siyahısına daxil edilməsi imkanlarını öyrənir. Administrasiyadakı adı açıqlanmayan kanal mənbəsinin sözlərinə görə, Rusiyanın bu siyahıya daxil edilməsi ehtimalı Ukraynadakı müharibəyə görə “Rusiya Federasiyasının məsuliyyətə cəlb edilməsi vasitəsi” kimi qiymətləndirilir.
Təxminən eyni şeyi indi Rusiya müxalifətinin lideri, erməni şahmatçısı Harri Kasparov da deyir: “Mən tamamilə əminəm ki, Rusiyanın Putinizmdən azad edilməsi Sevastopolda Ukrayna bayrağının qaldırılması ilə başlayacaq. Tamamilə aydındır ki, Ukraynanın ərazi bütövlüyü bərpa edilmədən, Putin rejiminin son tarixi məğlubiyyəti olmadan Rusiyanın öz tarixində yeni səhifəyə başlamaq şansı yoxdur”. Bütün bunlar onu deməyə əsas verir ki, indiki şəraitdə bəşəriyyətə qarşı cinayətlərə görə beynəlxalq məhkəməyə verilə biləcək, əl sıxmayan siyasətçi statusunda olan Putinlə görüş faktının özü Qərbin Ermənistana münasibətinə son dərəcə mənfi təsir göstərəcək. Bəli, Rusiya prezidenti Vladimir Putinin bütün müttəfiqlərini qana bulaşdırmasının başqa bir nümunəsi də var. Bu onun düşünülmüş taktikasıdır. Putinin Ukraynada “xüsusi əməliyyat” başlamazdan əvvəl bütün yaxın çevrəsini, o cümlədən zəif iradəli Narışkini necə nümayişkaranə şəkildə alçaltdığını və qana buladığını hamımız yaxşı xatırlayırıq. İndi Putin Ermənistana münasibətdə də “düzgün” vaxtı seçdi. “Xüsusi əməliyyatın” ikinci mərhələsi başlamazdan əvvəl bütün dünya Ukrayna və demokratiya uğrunda döyüşün nəticəsinin danışıqlar masası arxasında deyil, döyüş meydanında həll olunacağını artıq anlayanda Putin Paşinyanla görüş keçirir..Sonra yuxarıda qeyd edilən bəyanat verilir. Ancaq təkcə bu məqam Qərbin qəzəbinə səbəb ola bilməz. Qərbi digər məqamlar da hiddətləndirir. Məsələn, Kremlin bəyanatına əsasən, tərəflər bir sıra ölkələrin birtərəfli sanksiyalarından narahat olduqlarını bildiriblər və bu çətinliklərin öhdəsindən birgə gəlmək barədə razılığa gəliblər. Əslində bu bir bəyanatdır. Lakin bu sənəddən sonra Ermənistan nəhayət ki, Rusiyaya sanksiyalardan yan keçməyə kömək etməyə çalışan ölkələr sırasına yazıla bilər. Bu isə artıq ölkəmizə qarşı Qərb sanksiyalarının mükəmməl görünən simasıdır. Rusiya bunun müqabilində Ermənistana heç nə vermir, hətta təklif etmir. Məsələn, biz Qaregin Njdeni Hitlerlə bərabər tutmağa çalışan gənc, lakin həmişə sərxoş Mariya Zaxarovadan üzr eşitmədik. İndi Putini Hitlerə bərabər qoyurlar, amma Maşa susur. Lakin onun susması yox, Rusiyanın batması önəmlidir. Siyasi, iqtisadi və hərbi baxımdan Rusiya Ukraynada uduzur. Ermənistan isə, şübhəsiz ki, dünyanın o tayında olmalıdır. İndi Putini qanlı diktator adlandırırlar ki, o, başqalarını da özü ilə uçuruma aparır. Ermənistan da uçuruma gedən yolda Rusiyanın yanındadır”. Bundan əlavə xatırlatmaq lazım gəlir ki, bir müddət əvvəl Ermənistan 4 ədəd Su-30 tipli qırıcı təyyarəsini Ukraynaya qarşı istifadə olunması üçün Rusiyaya verərək, Ukraynada gedən işğalçı müharibənin tərəfinə çevrilib. Ermənistanın bu addımı, başda ABŞ olmaqla, Avropa ölkələrinin də diqqətində olmalıdır. Çünki bu gedişlərin nəticələri İrəvanı da sanksiyaların hədəfinə çevirmək və Qərbdəki fəaliyyətlərinin qarşısını almaq gücündədir.
Samirə SƏFƏROVA
