Rusiyanın “Kommersant” nəşrinin yaydığı məlumata görə, Ermənistanın baş naziri Nikol Paşinyanın Rusiya səfərində Qarabağla bağlı yekun razılaşma əldə olunub. Sözügedən məlumat Paşinyana istinadən yayılıb.
Paşinyan Moskvada Dövlət Dumasının sədri Vyaçeslav Volodinlə görüşündə deyib ki, Rusiya prezidenti Vladimir Putinlə Moskvada keçirilən danışıqlarda Qarabağ məsələsi ilə bağlı yekun razılıq əldə olunub: “Təhlükəsizlik, Qarabağ münaqişəsi, regional infrastrukturun blokadadan çıxarılması və Ermənistanla Azərbaycan arasındakı sərhədlərin demarkasiyası və delimitasiyası prosesi daxil olmaqla, bir sıra mühüm məsələlər üzrə yekun razılıq əldə olunub. Biz prezident Putinlə məhsuldar müzakirə apardıq və birgə bəyanat qəbul etdik”.
Görünən odur ki, Ermənistan baş naziri Qarabağ məsələsi barəsində əminliklə danışır. Maraqlıdır, Paşinyan hansı qəti Qarabağ razılaşmasından danışır? Bəlkə bununla bağlı gizli razılaşmalar da var?
“İstənilən halda, Paşinyana müəyyən təzyiq olan kimi, götürdüyü öhdəliklərdən yayınır”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, Rusiyanın Paşinyana hansısa gizli vədlər verməsi istisna olunmur: “Azərbaycan cəmiyyətində İlham Əliyev-Nikol Paşinyan görüşündən sonra belə rəy formalaşıb ki, guya erməni cəmiyyətində yalnız Nikol Qarabağ məsələsinin həllində maraqlıdır. Yəni Paşinyan məsələni həll etmək istəyir, amma kimlərsə buna mane olur. Fikrimcə, bu heç də belə deyil. Ona görə ki, belə götürəndə erməni siyasətçiləri içərisində ən hiləgəri Paşinyandır. Çünki Paşinyan istər Avropa İttifaqının, istərsə də Rusiyanın təşəbbüsü ilə keçirilən görüşlərdə müəyyən öhtəliklər götürür. Ancaq istənilən halda, ona müəyyən təzyiq olan kimi, götürdüyü öhdəliklərdən yayınır. Bütün hallarda həm Aİ-dən, həm də Rusiyadan hər dəfə nəsə qopartmağa çalışır. Hansı görüş olur, formal şəkildə öhdəlik götürür. Əfsuslar olsun ki, öhdəliklərdən yayınanda nə Rusiyanın, nə də Aİ-nin təzyiqlərinə məruz qalır. Bu da mövcud ikili standartlardan irəli gəlir. Həm də Avroittifaq Rusiya amilinə görə Paşinyana təzyiq etmir. Ona görə də Brüssel görüşündən dərhal sonra Paşinyan Putinlə görüşdü. Bu gün Rusiya dünyada təcrid olunmuş vəziyyətdədir. Putin elə görüntü yaratmaq istəyir ki, Ermənistan Rusiyanın yanındadır. Ona görə də Paşinyanın Qarabağla bağlı dediklərinə ciddi yanaşmaq olmaz. Biz birdəfəlik anlamalıyıq ki, Rusiya Qarabağ məsələsinin birdəfəlik həllini istəmir. Kreml istəyir ki, məsələ dondurulmuş səviyyədə qalsın. Bu minvalla həm Ermənistan, həm də Azərbaycan Rusiyanın təsir dairəsində qalsın. Ona görə də müxtəlif formada erməni separatçılarını himayə edirlər. Ancaq Paşinyanın son Moskva səfəri müəyyən ehtimallara əsas verir. O da ondan ibarətdir ki, Kremlin Ermənistana bəzi gizli vədlər verdiyi güman olunur. Bu, separatçıların silahlandırılması və təhlükəsizlik çətirinin yaradılması formasında ola bilər”.
Bu baxımdan partiya sədri hesab edir ki, Rusiyaya etibar etmək olmaz.
Vidadi ORDAHALLI
