Məlum olduğu kimi, Ermənistan baş naziri Nikol Paşinyan Rusiyada səfərdə olub. Rusiya prezidenti Valadimir Putinlə görüşən Paşinyan bir sıra məsələləri müzakirə edib. Paşinyanla Putin arasında danışıqların yekununda müttəfiqlik əlaqələrinin möhkəmləndirilməsi və əvvəllər əldə edilmiş razılaşmaların həyata keçirilməsinə dair 30 bəndlik birgə bəyanat imzalanıb.
Paşinyan Moskvaya getməzdən əvvəl Ermənistanın baş naziri Şarl Mişellə telefon danışığı aparıb. Telefon danışığı zamanı Brüsseldə əldə olunmuş razılaşmaların icrası prosesi, regiondakı vəziyyət və Ermənistan-Aİ ikitərəfli gündəliyindəki məsələlər müzakirə edilib. O cümlədən, əsas müzakirə olunan məsələlərdən biri də Aİ-nin “Şərq Tərəfdaşlığı” proqramının iqtisadi və investisiya planı çərçivəsində Ermənistana 2,6 milyard avro vəsaitin ayrılması ilə bağlı sazişin icrası olub. Danışıq zamanı investisiya paketində nəzərdə tutulan proqramların səmərəli şəkildə həyata keçirilməsinin vacibliyi vurğulanıb. Şarl Mişel Aİ-nin Ermənistan üçün nəzərdə tutulan investisiya proqramının tam şəkildə həyata keçirilməsinə sadiq olduğunu bir daha təsdiqləyib və proqramların praktiki icra mərhələsinə tez başlanmasının vacibliyini vurğulayıb.
Maraqlıdı, Rusiya ilə imzalanan 30 maddəlik bəyannamədən və İrəvanın sanksiyalara qarşı əks mövqedə durmasından sonra Aİ 2,6 milyard avronun ayrılması prosesini yubatmaq və yaxud da təxirə salmaq istəyəcəkmi?
“20 il hakimiyyətdə olan Köçəryan-Sarkisyan cütlüyü birmənalı Rusiyayönümlü siyasət yeridib, amma...”
Məsələyə münasibət bildirən politoloq Tural İsmayılov prinsipcə, bunu istisna etmədi: “Nəzərə almaq lazımdır ki, Paşinyanın Moskva səfərindən əvvəl Şarl Mişellə apardığı danışıqda Ermənistanın Avropa İttifaqından maliyyə yardımı dilənməsi aktual olub. Təəssüflər olsun ki, Aİ təsisatları erməni lobbisinin təsiri ilə müxtəlif proqramlar çərçivəsində Ermənistana maliyyə yardımı göstərib. Ermənistanın uzun illər Azərbaycan ərazilərini işğal altında saxlaması amili nəzərə alınmayıb. Qərb dairələri bu və ya digər formada Ermənistana yardım göstəriblər. 44 günlük Vətən müharibəsindən sonra da Ermənistana maliyyə yardımının göstərilməsi prioritet olub. Dağıntılara Azərbaycan əraziləri məruz qaldığı halda, Ermənistana 2,6 milyard avro yardım edilməsi gündəmdədir. Sonuncu danışıqlarda yenidən bu məsələ müzakirə olunub. Baxmayaraq ki, bu müzakirələrdən sonra Ermənistan Rusiya ilə müəyyən sazişlər imzalayıb. Hansı ki, orada bir sıra məqamlar birbaşa olaraq Aİ-nin Rusiya ilə bağlı siyasətinə qarşı yönəlib. Ancaq Ermənistanın belə addım atmasının bu mənada Qərbin yanaşmasına təsir edəcəyini demək çətindir. Ona görə ki, Qərb siyasi institutlarının Ermənistana yanaşması onun Rusiya ilə münasibətlərindən kənarda nəzərdə tutulub. Məsələ ondadır ki, 20 il hakimiyyətdə olan Köçəryan-Sarkisyan cütlüyü birmənalı Rusiyayönümlü siyasət yeridib. Ancaq buna baxmayaraq, Qərbdən Ermənistana bu və ya digər formada maliyyə yardımı edilib. Ancaq bu dəfə yanaşma fərqli ola bilər. Çünki Rusiya ilə Qərbin münasibətləri çox kəskindir. Hesab edirəm ki, bu mənada Avroittifaq Ermənistana maliyyə yardımının həcmini azalda bilər”.
Ancaq politoloq yardımın tamamilə kəsiləcəyini düşünmür.
Vidadi ORDAHALLI
