Məlum olduğu kimi, əldə olunan 10 noyabr razılaşmasına görə, Azərbaycan Laçından yan keçməklə Qarabağdan Ermənistana alternativ yolun inşasını sürətlə davam etdirir. Hiss edilir ki, Ermənistanda bununla bağlı ciddi narahatlıq yaşanır. Yolun may-iyun aylarında açılışı gözlənilir.
Qeyd edək ki, bu 10 noyabr anlaşmasında yer alıb deyə, Rusiya və Ermənistan gedişata mane ola bilmir. Ekspertlər qeyd edir ki, alternativ yolun özəlliyi tək Laçın şəhərinin tam bizim nəzarətə keçməsi deyil, həm də Ermənistanın “Laçın dəhlizi” adlandırdığı köhnə yoldan Xankəndiyə müxtəlif kommunikasiya xətləri gedir – işıq, qaz, internet və s. Yeni yolda isə bu kommunikasiya xətləri olmayacaq, Xankəndi şəhərimizin bütün təminatını özümüz həyat keçirəcəyik. Bu yolun açılışından Ermənistan niyə belə narahatdır və Azərbaycan əlavə olaraq hansı dividendləri götürmüş olacaq?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, 10 noyabr bəyanatının 6-cı bəndinə görə, 3 il ərzində Qarabağı Ermənistanla birləşdirən alternativ yolun inşası tamamlanmalıdır: “Azərbaycan bu bəndə uyğun olaraq öz üzərinə düşən işləri yekunlaşdırmaq üzrədir. Marşrutun dəyişməsi Laçın şəhərinin də tamamilə Azərbaycanın nəzarətinə keçməsini təmin edəcək. Sizcə, erməniləri yalnız bu məsələmi narahat edir? Mən güman edirəm ki, ermənilərin isterikası yalnız marşrutun dəyişməsi ilə deyil, bütövlükdə Laçın dəhlizi ilə bağlıdır. Azərbaycan dəfələrlə bəyan edib ki, Laçın dəhlizi Zəngəzurdan keçəcək dəhlizlə eyni statusda olacaq. Bu amil, təbiidir ki, Ermənistanı ciddi narahat edir. Bəyanata görə, dəhlizi rus sülhməramlıları qoruyur. Sülhməramlıların müddəti bitənə kimi Laçın dəhlizi ilə bağlı məsələyə baxılmalıdır. Azərbaycan qəti şəkildə deyir ki, Zəngəzur dəhlizinə Bakının tələb etdiyi status verilməsə, Laçından keçən yola da ölkəmiz gömrük postları və sərhəd xidmətini yerləşdirəcək. Ermənilərin əsas ehtiyat etdiyi bu məqamdır. Deyirlər ki, belə olacağı təqdirdə Qarabağda bir nəfər də olsun erməni qalmayacaq. Mən hesab edirəm ki, bu istiqamətdə mübarizə daha da gərginləşəcək. Çünki ermənilər Zəngəzurdan keçəcək yola dəhliz statusu verməyə razı deyillər. Bir vaxtlar Qarabağın statusu ilə bağlı məsələdə də geriyə addım atmırdılar. Keçən ilin oktyabrında Paşinyan bəyanat vermişdi ki, Qarabağ Azərbaycanın tərkibində ola bilməz. Ancaq bir müddət əvvəl Paşinyan deyir ki, Qarabağın Azərbaycanın tərkibində qalmaması mümkün deyil. Ermənistan hakimiyyəti bir qədər çevik davranışlar ortaya qoyur. Biz də ona adekvat addımlarımızı atmalıyıq”.
Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov deyib ki, Azərbaycan əhalisinin birbaşa hərəkətini təmin etmək üçün Laçın şəhərindən yan keçən avtomobil yolu çəkilir: “Hazırda ermənilər Laçın şəhərinə daxil olaraq hərəkət edirlər. Laçından keçmədən çəkilən alternativ yoldan həm ermənilər, həm də biz istifadə edəcəyik. Həmin yol Laçının 6 kəndini birləşdirəcək. Sözügedən alternativ 28 km olan yolun artıq 17 km-i çəkilib, Həkəri çayı üzərində bir körpü də tikilib. Cari ilin iyul ayına qədər istifadəyə veriləcək”.
Məhəmmədəli QƏRİBLİ
