Azərbaycan dövləti diaspor quruculuğu sahəsində son illər daha genişmiqyaslı işlər görüb. Əlbəttə, görülən işlər dünya azərbaycanlılarının vahid ideya ətrafında birləşməsi, mütəşəkkilləşməsi, təşkilatlanması baxımından çox əhəmiyyətlidir.
Son 4 ildə 31 ölkəni əhatə edən 14 Koordinasiya Şurası, eyni zamanda 12 ölkədə 18 Azərbaycan evi yaradılıb. Tallin, Varşava, Budapeşt, Brüssel, Zalsburq, Barselona, Köln, Berlin, Münhen, Kiyev, Odessa, Ankara, İğdır, Qahirə, Tbilisi, Marneuli və Qardabani şəhələrində fəaliyyət göstərən Azərbaycan evlərinin, şübhəsiz ki, öz məqsədləri, hədəfləri, əldə etdiyi uğurları var.
12 ölkədə 18 Azərbaycan evinin yaradılmasının əhəmiyyəti, hədəfləri, gələcək perspektivləri nədir?
İSBAM sədri Samir Adıgözəlli “Bakı-Xəbər”ə bildirdi ki, 18 ildir diaspor fəaliyyəti ilə məşğuldur və bu səbəbdən də gedən proseslərə yaxından bələddir. Dünya azərbaycanlılarının qurultaylarında, bu istiqamətdə müxtəlif ölkələrdə keçirilən tədbirlərdə, yığıncaqlarda iştirak etdiyini deyən S.Adıgözəllinin dediyinə görə, həm Rusiyada, həm Ukraynada, həm Türkiyədə, həm də Avropa ölkələrində, xüsusən də Şərqi Avropa dövlətlərdə fəaliyyət göstərən diaspor təşkilatları ilə sıx əlaqədə işlədiyib, birgə tədbirləri, layihələri olub. “Ümumiyyətlə, həm Azərbaycanın ədalətli mövqeyini dünya ictimaiyyətinə çatdırılması, həm də milli dövlətçilik maraqlarımızın müdafiə olunması istiqamətində dünya azərbaycanlılarının təşkilatlanması çox vacibdir. Xaricdə yaşayan çoxminli soydaşlarımız Ali Baş Komandanımızın rəhbərliyilə rəşadətli ordumuzun qazandığı qələbənin dünyaya çatdırılmasında çox mühüm rolu var. Azərbaycanın daxilində gedən proseslərin, qazandığımız uğurların beunəlxalq aləmdə təbliğində diasporumuz da az rol oynamır. 18 Azərbaycan evinin, 14 Koordinasiya Şurasının yaradılması dünya azərbaycanlılarının ölkəmizlə bağlı məsələlərdə koordinasiyalı şəkildə fəaliyyət göstərməsi üçün çox mühüm əhəmiyyət daşıyır. Azərbaycan evinin olması o deməkdir ki, artıq bu istiqamətdə olan pərakəndəlik aradan qaldırılıb. Sevindirici haldır ki, bu istiqamətdə canlanmalar var. Onlardan da biri Azərbaycan evinin yaradılmasıdır. Əvvəla, biz hər kəsi qucaqlamalıyıq. Bütün diaspor qurumlarına istilik göstərməliyik ki, onlar ruhlanıb fəaliyyətlərini davam etdirsinlər. Hətta iki nəfərlik bir təşkilata da biganə yanaşmalı deyilik. Hesab edirəm ki, Azərbaycan evi fəaliyyət göstərdiyi ölkələrdə soydaşlarımızın doğma evidir, yuvasıdır. Bu evlərin Azərbaycan mədəniyyətinin, Azərbaycanın haqq işinin, dövlət siyasətinin və sairin təbliğində xüsusi yeri var”.
S.Adıgözəlli hesab edir ki, bu sahədə uğurlarla yanaşı problemlər də var. O qeyd etdi ki, Rusiyada diaspor təşkilatlarımızın əsassız qərarlarla qapadılması və hələ də açılamaması, bu sahədə vahid təşkilatının olmaması problemdir. Başqa yerlərdə də bu problemin olduğunu deyən S.Adıgözəllinin sözlərinə görə, bunların həllinə çalışılmalıdır. “Müxtəlif ölkələrdə fəaliyyət göstərən Azərbaycan evinin missiyası və hədəfləri çox böyükdür. Mən Varşavada yerləşən Azərbaycan evinin fəaliyyətinin şahidi oldum və çox razı qaldım. Orada işləyənlər əsasən gənclərimizdir, onların diaspor işinə ürəkdən yanaşması məni çox sevindirdi. Diaspor işi, lobbiçilik ürək, sevgi işidir. Ukrayna-Rusiya müharibəsi nəticəsində Ukraynadan Polşa vasitəsilə Azərbaycana gələn vətəndaşlarla Varşavadakı Azərbaycan Evi gecə-gündüz işlədi, soydaşlarımıza hər cür dəstək verdilər”- deyə S.Adıgözəlli bildirdi.
İradə SARIYEVA
