Məlum olduğu kimi, Ermənistanın baş Naziri Nikol Paşinyanın Moskvaya rəsmi səfəri reallaşıb. Səfər çərçivəsində Paşinyanın Rusiya prezidenti Vladimir Putinlə təkbətək görüşü də olub. Rusiya mediası Kremlin rəsmi saytına istinadən yazır ki, tərəflər diplomatik münasibətlərinin 30 illiyi ilə bağlı 30 bənddən ibarət əməkdaşlığa dair bəyannamə imzalayıblar.
Sənəddin təqdimatından görünür ki, tərəflər yenə də “Dağlıq Qarabağ” ifadəsini işlədir. Həmçinin vurğulanır ki, hazırda fəaliyyəti dayandırılan Minsk qrupu həmsədrləri institunun təcrübəsindən yaralanmağın vacibliyi vurğulanır. Hər iki ifadə Azərbaycanın maraqlarına ziddir. Çünki Azərbaycan bəyan edir ki, həmsədrlik institutu bu müddət ərzində heç bir əməli fəaliyyətə imza atmayıb. Biz eyni zamanda “Dağlıq Qarabağ” adlı inzibati ərazi vahidini də ləğv etmişik. Onun yerində iki iqtisadi zona yaradılıb. Belə olan təqdirdə , maraqlıdır, Putinlə Paşinyan niyə həmsədrlər institutunu və Dağlıq Qarabağ sözünü "diriltməkdə” maraqlıdır?
Politoloq Elşən Mustafayev “Bakı-Xəbər”ə açıqlamasında bildirdi ki, Ermənistanın özündə də etiraz aksiyaları baş qaldırıb: “Bunu da təşkil edən Rusiyaya bağlı müxalif qüvvələrdir. Onlar hökumət başçısını Ermənistanın maraqlarını və Qarabağı Azərbaycana satmaqda ittiham edirlər. Hətta Brsüssel görüşündən sonra Azərbaycanla Ermənistan arasında başlanmış sülh prosesini pozmaq üçün Paşinyana sui-qəsd də edilə biləcəyini də səsləndirirlər. Ermənistan tarixində belə hallar çox olub. Sülh prosesində irəliləyiş olan kimi 1999-cu ildə parlamenti güllə baran etdilər.
Ona görə də, Azərbaycan və Ermənistan arasında sülhün əldə edilməsində N.Paşinyanın Rusiyaya rəsmi səfərində aparacağı danışıqların nəticəsi mühüm rol oyanaya bilər. Görünən budur ki, Rusiyanın son vaxtlar Azərbaycan və Ermənistan arasında əldə olunan sülh prosesini pozmaq üçün addımlar atır. Hətta Rusiyanın bu məqsədlə bütün vasitələrə əl atacağı ehtimal edilir. Rusiya öz strateji məqsədləri üçün bu münaqişənin tam həll edilməsini istəmir. Çünki münaqişənin qalması onlara bölgəyə təsir imkanı yaradır. Əslində, sülh prosesi imitasiya xarakteri daşıyır. Ermənistan Qarabağ məsələsini yeni şəraitdə davam etdirmək siyasətindən sülh prosesində istifadə etmək istəyir. Azərbaycanın istəyir ki, Ermənistan bizim daxili işlərimizə qarışmasın. Yəni bu, həm ərazi iddialarına, həm də erməni əhalidən öz məqsədləri üçün istifadə siyasətinə aiddir. İndi Ermənistan taktikanı dəyişməklə məşğuldur. Ermənistan bir ölkə kimi Azərbaycana qarşı hər hansı ərazi iddiasının olmadığını göstərmək istəyir. Amma Qarabağda yaşayan ermənilərin təhlükəsizliyinin və siyasi gələcəyinin təminatçısı kimi bu prosesdə iştirak etmək istəyir. Yəni əvvəlki mövqeyini yeni formada davam etdirir. Onlar təhlükəsizlik adı altında Azərbaycan ərazisinin bir hissəsində öz qoşunlarını saxlayır. Görünən budur ki, bu prosesdə Rusiya da onlara dəstək verir.
Bu gedişlə tam sülhə nail olmaq mümkün deyil. Çünki Ermənistan Azərbaycana qarşı ərazi iddialarından əl çəkmək istəmir. Rusiya bir tərəfdən həmsədrlikdən imtina edir, digır tərəfdən həmin təsisatın təcrübəsinə istinadı lazım bilir. Əslində, sətraltında demək istəyir ki, münaqişənin uzadılmasında maraqlıdır. Bəllidir ki, Minsk qrupu 30 il ərzində münaqişənin ömrünü uzatmaqla məşğul olub”.
Məhəmmədəli QƏRİBLİ
