Məlum olduğu kimi, Brüssel görüşünün ikinci raundundan sonra belə göründü ki, artıq Avropa İttifaqı Minsk Qrupunun edə bilmədiyi missiyanı üzərinə götürməkdə qərarlıdır. Azərbaycan və Ermənistan liderlərinin son görüşü zamanı əldə edilən razılıqlardan gəlinən nəticələr də belə deməyə əsas verir. Bu səbəbdən Moskva çevik addım ataraq Azərbaycan-Ermənistan münasibətlərinin normallaşması üzrə xüsusi nümayəndə təyin etdiyini açıqladı. Belə ki, Minsk Qrupunda Rusiyanı təmsil edən İqor Xovayev danışıqlar üzrə xüsusi nümayəndə təyin edildi.
Bu arada belə görünür ki, artıq ABŞ da Minsk Qrupundakı həmsədrin statusunu dəyişir. Dövlət Departamentinin Avropa və Avrasiya Məsələləri üzrə Bürosunun məlumatında bildirilir ki, Dövlət katibinin köməkçisi Donfrid Birləşmiş Ştatların prosesə ən yaxşı şəkildə necə dəstək verə biləcəyini müzakirə etmək üçün bu həftə Qafqazda danışıqlar üzrə baş müşaviri Endryu Şoferi regiona göndərib. Burada diqqəti çəkən məqam odur ki, Endryu Şofer Minsk Qrupunda amerikalı həmsədr idi. Ancaq Dövlət Departamentinin son məlumatı göstərir ki, artıq o, həmsədr yox, Qafqazda danışıqlar üzrə baş müşavirdir. Bu isə Birləşmiş Ştatların da məsələyə yanaşmasının dəyişməsindən xəbər verir. Düzdür, Minsk Qrupunun buraxılması barədə rəsmi qərar yoxdur. Ancaq praktiki olaraq proseslər buna doğru gedir. Bununla yanaşı, Vaşinqton Azərbaycan-Ermənistan münasibətlərinin normallaşması və sülh sazişinin imzalanması prosesinin Brüssel razlaşması çərçivəsində həyata keçirilməsini istəyir.
Bütün bunları ekspertlər necə dəyərləndirir?
“Hesab edirəm ki, prinsipcə bu, Azərbaycanın diplomatik qələbəsidir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə prizmadan yanaşdı: “İkinci Qarabağ müharibəsindən sonra Minsk Qrupu de-fakto öz fəaliyyətinə son verib. Bu format münaqişənin həlli ilə məşğul olurdu. Ancaq məlum olduğu kimi, sözügedən uzun illər Minsk Qrupu özünü doğrultmadı. Hazırda Azərbaycan daxili problemi olan bir neçə məsələni özü həll edir. Həmçinin Avropa İttifaqının vasitəçiliyi ilə Ermənistan və Azərbaycan arasında sülh müqaviləsinin bağlanması üzrə danışıqlar gedir. Belə olan təqdirdə artıq Minsk Qrupuna ehtiyac yoxdur. Beynəlxalq konyukturada bunun mümkün olmadığı aydındır. Hazırkı məqamda Rusiya Ermənistan və Azərbaycan arasında öz nümayəndəsini təyin edib. ABŞ da belə bir addım atdı. Ona görə də bununla hər iki ölkə çalışır ki, öz maraqları prizmasından məsələyə yanaşsın. Artıq ABŞ da, Fransa da Minsk Qrupunun həmsədirliyinə son qoydu. Hesab edirəm ki, prinsipcə bu, Azərbaycanın diplomatik qələbəsidir. Ermənistanın bütün cəhdlərinə rəğmən, Minsk Qrupu formatı fiaskoya uğradı”.
O baxımdan politoloq ABŞ-ın da analoji addım atmasına müsbət yanaşdı.
Vidadi ORDAHALLI
