Ermənistan növbəti dəfə Rusiyaya xəyanət etməkdədir. Hər halda, bu ölkə mediasında yer alan məlumatlar, ekspertlər tərəfindən səslənən fikirlər, rəsmi müstəvidə atılan müəyyən addımlar da bunu təsdiqləyir. Ermənistanda belə hesab edilir ki, Qərb sanksiyaları Rusiyanı çökdürür, Ukraynada hərbi əməliyyatların uzanması isə vəziyyətin daha faciəvi xarakter almasına gətirib çıxarır. Elə bu səbəbdən İrəvanın təcili Moskvadan uzaqlaşıb Qərblə yaxınlaşmasına dair çağırışlar artır.
Belə bir vaxtda Ermənistanın baş naziri Nikol Paşinyanın Fransaya işgüzar səfərə getməsi təsadüf sayılımır. Rəsmi məlumata əsasən, hökumət başçısı Parisdə “Ambisiyalar: Ermənistan-Fransa” forumunda iştirak edəcək. Eyni zamanda, iki ölkənin hökumət üzvləri müxtəlif sahələrdə əməkdaşlığın inkişafı və genişləndirilməsi məsələlərini müzakirə edəcəklər. Paşinyanı səfərdə xarici işlər naziri Ararat Mirzoyan, səhiyyə naziri Anahit Avanesyan, ərazi idarəetmə və infrastruktur naziri Qnel Sanosyan və digər rəsmi şəxslər müşayiət edir. Belə heyətlə Paşinyanın Fransa səfəri İrəvanın Qərblə əməkdaşlığı genişləndirmək niyyətinin göstəricisi hesab edilir. Buna müvafiq olaraq da Ermənistan Rusiyadan uzaqlaşır. Bu fonda “armenianreport” portalı yazır: “Ermənistan indi məhv olan Rusiyanın müttəfiqləri arasındadır. Biz bütün dünya tərəfindən bəşəriyyət üçün təhlükə kimi tanınan dövlətin rəsmi müttəfiqiyik. Dəmir pərdənin o biri tərəfindəyik. Bu, sərt reallıqdır. Ermənistan KTMT-nin, Gömrük İttifaqının, Aİİ-nin üzvüdür. O, Rusiyanın lehinə və Ukraynanın əleyhinə səs verir. Hər kəsin gördüyü budur. Hətta bizim tarixi müttəfiqlərimiz də bizə kömək etməyəcək. Çünki Putin Rusiyasının müttəfiqi statusundan qurtulmaq üçün özümüz özümüzə kömək edə bilmədik. Baxmayaraq ki, “məxməri inqilab”ın qələbəsindən sonra əla fürsətlər mövcud idi. Amma qaçırdıq. Aydındır ki, bu, Rusiyanın günahıdır. Amma heç kimin vecinə deyil. Hamı tabloya baxır. Bir də var ki, bizim milli rüsvayçılığımız çox uzaqlara gedən faciəvi perspektivlərə malikdir. İndi isə gəlin başqa xəbərlərə baxaq. ABŞ, Türkiyə və ona qonşu ölkələr Ukraynanın təhlükəsizliyinin təminatçısı ola bilərlər. Bu barədə Ukraynanın NATO-ya üzvlüyünə qədər onun tam təhlükəsizliyini təmin edə biləcək sazişin bağlanmasını təklif edən Ukraynanın hakim “Xalqın xidmətçisi” partiyasının bəyanatında da deyilir. Bəyanatda Azərbaycanın adı çəkilmir, lakin bu açıq şəkildə nəzərdə tutulur. Ukrayna prezidenti Volodimir Zelenski dəfələrlə tarixi düşmənimiz olan Azərbaycanla strateji müttəfiqliyin vacibliyi barədə açıq danışıb. Üstəlik, rəsmi Kiyev də Bakı ilə eyni yolla getdi. Türkiyə ilə ittifaq NATO ilə ittifaq kimidir. Ukraynanın Rusiya ilə qarşıdurmada qalib gəlmək üçün hər şansı var. Bu, Türkiyə və Azərbaycan üçün çox yaxşı xəbər olacaq. Və Ermənistan üçün çox pis. Bunun nə qədər pis olduğunu düşünmək belə insanı qorxudur. Bütün aspektlərdən. Amma biz artıq heç nəyə təsir edə bilmirik”.
Erməni siyasi şərhçi Derenik Malxasyan da məsələyə eyni prizmadan yanaşır: “Qarabağ müharibəsi zamanı Ukraynada Zelenski rejimi özünü Azərbaycanın müttəfiqi kimi aparırdı. Amma indi görünür ki, Ermənistanda Zelenski rejiminin pərəstişkarları çoxdur. Əslində Zelenski rejiminin pərəstişkarları İlham Əliyevin müttəfiqini dəstəkləyirlər. Deməli, Ermənistan üzərində Azərbaycan yenə diplomatik qələbə qazanır”. Ermənistanın “Modus Vivendi” mərkəzinin rəhbəri, siyasi şərhçi Ara Papyan isə indiki vəziyyətdə qeyd edir: “Rusiya kimin müttəfiqidir, Ermənistanın, yoxsa Azərbaycanın? Rusiya nə Ermənistanın, nə də Qarabağdakı ermənilərin təhlükəsizliyini müdafiə edir. O, erməniləri qorumur, orada girov saxlayır ki, Ermənistan həmişə əzilmiş durumda “ovcunda” olsun”. Erməni politoloq Hakob Badalyan isə bildirir: “Aydındır ki, münaqişə təkcə Rusiya-Ukrayna zonasında deyil, ümumilikdə Rusiya-Qərb, daha doğrusu Rusiya ilə ABŞ arasındadır”. Onun sözlərinə görə, hamı görüb ki, hər şey ABŞ-a verilən təhlükəsizlik zəmanəti şərtləri ilə başlayıb, bu şərtlər rədd edilib və bu hadisələr sonda Ukrayna üzərində müharibəyə gətirib çıxarıb: “Bu müharibə əsasən bu münasibətləri aydınlaşdırmaq üçün alətə çevrilib. Vəziyyətin qiymətləndirilməsi belədir. Ermənistan bu vəziyyətdə mümkün qədər neytral qalmağa çalışmalıdır. Çünki bir tərəfdən aydındır ki, Rusiya bizim üçün mühüm rol oynayan ölkədir, digər tərəfdən bu, Qərb dünyasıdır, yenə də mühüm məsələlərdə, təhlükəsizlik də daxil olmaqla, bizim üçün əhəmiyyətli bir yükdür. Ermənistan isə, nəinki bu halda, ümumiyyətlə imkan daxilində iki qütb arasında görünməkdən çəkinməlidir. Ona görə də hesab edirəm ki, Ermənistanın vəzifəsi neytral qalmaqdır. İndi biz Ukraynada nə baş verdiyini görürük. Rusiyanın Ukrayna xalqına necə hücum etdiyini görərək hamımız acı yaşayırıq. Düzdür, Qarabağ savaşında Ukrayna dövləti bizim üçün səsini çıxarmadı, amma bu o demək deyil ki, biz indi özümüzü gözdən salmalı, səsimizi qaldırıb Ukrayna xalqının başına gələnləri danışmamalıyıq”.
Samirə SƏFƏROVA
