ABŞ dövlət katibinin siyasi məsələlər üzrə müavini Viktoriya Nuland bəyan edib ki, Birləşmiş Ştatlar Ukraynada bioloji laboratoriyaların Rusiya qoşunlarının nəzarətinə keçməsinin qarşısını almağa çalışır.
O qeyd edib ki, Ukraynada bioloji tədqiqat obyektləri var və hazırda Kiyev və Vaşinqton orada toplanmış materialların Rusiya qüvvələrinin əlinə keçməsinin qarşısını almağa çalışır: “Ukraynada bioloji tədqiqatlar üçün imkanlar var. Biz narahatıq ki, Rusiya qoşunları onlara nəzarəti ələ keçirməyə cəhd edə bilər, ona görə də biz ukraynalılarla birlikdə bu tədqiqat materiallarından hər hansı birinin Rusiya qüvvələrinin əlinə keçməsinin qarşısını almaq üçün çalışırıq”.
Rusiya Xarici İşlər Nazirliyinin sözçüsü Mariya Zaxarova isə deyib ki, ABŞ-ın Ukraynadakı laboratoriyalarında aparılan araşdırmalar onların bu ölkə ərazisində qanunsuz cinayət əməllərini sübut edir: “Viktoriya Nuland dünən amerikalı qanunvericilərin sualını cavablandıraraq, təkcə “tədqiqat” üçün adlandırdıqları laboratoriyaların mövcudluğunu təsdiqlədi. Bunların hansı materiallar olduğunu indi təxmin etmək mümkün deyil, çünki təxmin ediləcək bir şey yoxdur. Bunlar ABŞ-ın Ukrayna ərazisində qeyri-qanuni və cinayətkar fəaliyyətini təsdiq edən materiallardır”.
Təəssüf doğuran məqam odur ki, Rusiya media vasitələri yersiz formada bu məsələdə Azərbaycanın da adını hallandırır. Rusiya telekanallarının yaydığı məlumata görə, guya belə laboratoriyalar təkcə Ukraynada deyil, Azərbaycanda da fəaliyyət göstərir. Qeyd olunur ki, məhz Azərbaycanda bir neçə belə laborotoriya var.
“Bu bizə qarşı olan informasiya savaşının tərkib hissəsidir”
Məsələyə münasibət bildirən hərbi ekspert İbrahim Rüstəmlinin sözlərinə görə, Azərbaycanda ABŞ-a məxsus biolaboratoriyaların olması barədə yayılan informasiyalar təxribat xarakterlidir: “Rusiya telekanallarında bununla bağlı yayılan məlumatlar təxribat xarakterlidir. Bundan əvvəl də belə yalan məlumat yayıblar. Ancaq sözügedən məsələ ilə bağlı hansısa fakt təqdim olunmayıb. Nəzərə almaq lazımdır ki, Azərbaycan ərazicə kiçik dövlətdir. O üzdən, belə gizli biolaboratoriyalar olsaydı, onun üstü açılacaqdı. Çünki adətən ərazisi böyük olan ölkələrdə belə biolaboratoriyalar fəaliyyət göstərir. Ukrayna ərazi baxımından Azərbaycandan 10 dəfə böyükdür. Üstəlik, ölkədə ucu-bucağı görünməyən meşə massivləri var. Ona görə də, bu bizə qarşı olan informasiya savaşının tərkib hissəsidir. Azərbaycandan fərqli olaraq, Ukraynada belə laboratoriyaların olmasını ABŞ etiraf edir. Bütövlükdə, bizdə belə bir laboratoriyanın olması mümkün deyil. Çünki həm buna zərurət yoxdur, həm də Azərbaycan qonşularla olan münasibətləri nəzərə alır. Ancaq görünür, Rusiya telekanallarında ermənilərin maraqlarına xidmət edən şəxslər belə yalan məlumatları yayırlar”.
Hərbi ekspert onu da qeyd etdi ki, Rusiya telekanalları belə əsassız məlumatlara son qoymalıdır.
Vidadi ORDAHALLI
