Rusiya Müdafiə Nazirliyinin Müdafiənin idarəedilməsi milli mərkəzinin rəisi, general-polkovnik Mixail Mizintsev Ukraynaya humanitar yardımların çatdırılması barədə danışarkən Azərbaycanla bağlı təxribatçı ifadəyə yer verib.
Rusiya qoşunlarının nəzarətində olan Ukrayna ərazilərinə yardımların çatdırılmasından bəhs edərkən Mizintsev “Suriyadan 50 ton ərzaq, Dağlıq Qarabağdan isə 14 ton zəruri tələbat malları göndərildiyini” bildirib.
Azərbaycan Müdafiə Nazirliyi rusiyalı generalın bu açıqlamasına dərhal reaksiya verib və Rusiya tərəfinə “Dağlıq Qarabağ” adlı inzibati ərazi vahidinin olmadığını xatırladıb.
Bəyanatda deyilir ki, Rusiya Müdafiə Nazirliyi tərəfindən Ukraynaya göndərilən humanitar yardım kontekstində verilmiş açıqlamada “Dağlıq Qarabağ” ifadəsinin işlədilməsi qəbuledilməzdir.
Bildirilib ki, Azərbaycan ərazisində “Dağlıq Qarabağ” adlı inzibati-ərazi vahidi yoxdur:
“Rusiya tərəfindən dəfələrlə ali və yüksək səviyyələrdə verilmiş açıqlamalarda Azərbaycanın ərazi bütövlüyü, suverenliyi və sərhədlərinin toxunulmazlığına dəstək təsdiq edilib. Eyni zamanda iki ölkə arasında imzalanmış müvafiq sənədlərdə də bu mövqe bir daha təsbit olunub.
Rusiyanın rəsmi mövqeyinə zidd olaraq, bundan əvvəl də Rusiya MN-in rəsmi açıqlamalarında Azərbaycanın suveren ərazilərinə bu adla müraciət edilməsi halları müşahidə olunub.
Bu kimi açıqlamalar Azərbaycan-Rusiya əlaqələrinə xələl gətirə və Rusiya sülhməramlı qüvvələrinin müvəqqəti olaraq yerləşdirildiyi Azərbaycan əraziləri boyunca vəziyyətin gərginləşməsinə səbəb ola bilər.
Azərbaycan Müdafiə Nazirliyi Rusiya Federasiyasının Müdafiə Nazirliyini ölkəmizin suveren ərazilərinə Azərbaycanda mövcud olmayan inzibati-ərazi vahidləri adı altında müraciət edilməsi təcrübəsinin dayandırılmasına çağırır”.
Qeyd edək ki, bu yaxınlarda Rusiya sülhməramlılarının gözü qarşısında ermənilər daha bir təxribata əl atdılar. Onlar Qarabağda Ukraynaya açıq dəstək aksiyası keçirdilər. Azərbaycan Ukrayna ilə Rusiya arasında gedən müharibədə neytrallıq nümayiş etdirdiyi halda, bizim ərazi vahidimizdə anti-Rusiya tədbiri keçirilir və sülhməramlılar buna heç bir reaksiya vermir. Bütün bunlara nə ad vermək olar?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, bu, Rusiya Müdafiə Nazirliyinin ilk təxribat xarakterli açıqlaması deyil:
“Rusiya Müdafiə Nazirliyinin rəsmi saytında “Dağlıq Qarabağda Rusiya sülhməramlı kontingenti” adlı xüsusi bölmə yaradılıb. Həmin bölmədə müvafiq xəbərlər və multimedia materialları, habelə Rusiya Müdafiə Nazirliyi rəhbərliyinin sülhməramlı əməliyyatın aparılması ilə bağlı brifinqləri dərc edilir. Nazirliyin məlumatına görə, bu bölmə daim Rusiya sülhməramlılarının işi və münaqişə bölgəsindəki vəziyyət barədə aktual xəbərlərlə, foto və video materiallarla yenilənir. Bütün məlumatlar xarici dillərə tərcümə olunur. Görürük ki, sülhməramlılar haqda hesabatda dəfələrlə “Dağlıq Qarabağ” ifadəsi işlədilir. Bu da müharibədən sonra Azərbaycanın yaratdığı reallıqları inkar etmək deməkdir.
Çünki keçmiş “DQMV” ləğv edilib və Azərbaycan Prezidentinin sərəncamı ilə “Qarabağ”, “Şərqi Zəngəzur” iqtisadi zonaları yaradılıb. Azərbaycan Prezidenti dövlətimizin adından keçmiş Dağlıq Qarabağın inzibati sərhədlərinin ləğv edildiyini rəsmən bəyan edib. Burada heç bir texniki yanlışlıqdan söhbət gedə bilməz. Rusiya dövləti üçün məsələ bu formada qalıb, hesab edirlər ki, ərazi ”Dağlıq Qarabağ" kimi qalmalıdır. Onlar bu cür göstərməklə sülhməramlılarının xidmət etdiyi ərazini guya dəqiq çatdırmağa çalışırlar. Biz istəyərdik ki, Qarabağın dağlıq hissəsi yazılsın, hər halda, bu vəziyyət arzuolunan hal deyil, bizim üçün tarixin arxivinə getmiş məsələdir. Ona görə Rusiya Müdafiə Nazirliyinin mövqeyini dövlətin mövqeyi kimi qiymətləndirməliyik. Bundan əvvəl də bəzi şəhər və kənd adlarını ermənilər adlandırdığı kimi qeyd edirdilər. Hər dəfə Azərbaycan tərəfi buna etiraz edəndə deyirlər ki, texniki səhv olub. Mən isə burada, texnikidən daha çox, siyasi motiv görürəm. Belə qənaətə gəlinir ki, sanki sülhməramlılar orada ermənilərə yiyəlik edir".
Məhəmmədəli QƏRİBLİ
