Ermənistandan Xankəndiyə gedən qaz kəmərinin partlaması barədə xəbər yayılar-yayılmaz,. Ermənistan mediasında və ermənilərin istifadə etdiyi sosial şəbəkə siqmentlərində Azərbaycana qarşı qarayaxma kampaniyasına başlanıldı.
Ermənistanın ombudsmanı Kristine Qriqoryan öz Facebook səhifəsində iddia edib ki, guya Azərbaycan Ermənistandan Qarabağa gedən qaz kəmərinin təmirinə qəsdən mane olur. “Azərbaycan Qarabağda qaz kəmərinin təmirinə qəsdən müdaxilə edir”. O iddia edib ki, guya son günlər baş verənlərlə bağlı ona “qarabağlı həmkarı” Qeqam Stepanyan məlumat verib.
Qeyd edək ki, Teleqram kanalında qaz kəmərini Azərbaycanı şərləmək üçün ermənilərin özlərinin dağıtdığı haqda məlumat əksini tapıb. Teleqramda qeyd edilib ki, əldə olunan informasiyalardan kəmərin qaz sızıntısından deyil, təxribat nəticəsində partladığı məlum olub və partlayışı erməni quldurları törədib, məqsəd də bunu Azərbaycanın üstünə atmaq olub.
“Xankəndidəki qaz xəttinin partladılması və bu təxribatın bizim üzərimizə atılması cəhdinin də...”
Siyasi ekspert Rövşən Rəsulov bizimlə söhbətində bildirdi ki, partlayışla bağlı üzə çıxan məlumatlar ombudsmanların (?) yalan və iftiralarını ifşa edir.
“Bu sualın cavabını ən gözəl şəkildə Prezident İlham Əliyev şərh edib. Xatirinizdədirsə, dövləti başçısı ölkə jurnalistlərinə verdiyi geniş xarakterli müsahibəsi zamanı Ermənistana bel bağlamamağı onların öz vədlərinə əməl etməmələri ilə əlaqələndirib. Bu fakt isə özünü bütün cəhətlərdən sübuta yetirir. O cümlədən, son günlər Qarabağda erməni separatçı-quldur tör-töküntülərinin fəallaşmaları, habelə Azərbaycandan rəsmi icazə, razılıq alınmadığı halda Ermənistan ombudsmanının ərazimizə qanunsuz daxil olub, orada öz təbirincə “reydlər” keçirməsi də qeyd edilən faktı kifayət qədər sübuta yetirmiş olur. Təbii ki, Bakının da səbri tükənməz deyil və bu səbrin başa çatması artıq an məsələsinə çevrilib”.
R.Rəsulovun sözlərinə görə, bütün bunlar azmış kimi, öz təxribatlarını daim Azərbaycan tərəfinin üzərinə yıxmağa cəhdlər göstərən quldur rejim təmsilçiləri paralel olaraq Rusiya sülhməramlılarının etinasızlığından, daha dəqiq desək, məsuliyyətsizliyindən də maksimum dərəcədə istifadə edirlər: “Biz, hətta zaman-zaman həmin təxribatlarda RSK-nın da iştirak etdiyinin şahidləri oluruq. Bugünlərdə Xankəndidə qaz xəttinə edilən təxribatın da arxasında yalnız erməni separatçılarının deyil, həm də onlara açıq-aşkar xidmət edən RSK-nın komandanı, general-mayor Volkovun dayandığını əminliklə vurğulaya bilərik. Bu şəxsin əvvəl-başdan separatçılarla əlbir olmasının tarixini isə 2020-ci ilin dekabrında Xocavənddə keçirilən antiterror əməliyyatına bağlamaq mümkündür. Məhz həmin vaxt erməni diversantlarını məhv edən, eləcə də əsir alan Azərbaycan hərbçiləri qarşılarında o vaxtın RSK komandanın müavini Volkovu gördülər. Lakin onun cəhdləri nəticəsiz qaldı və suyu süzülə-süzülə, rüsvayçı şəkildə geriyə qayıtdı. Həmin vaxtdan başlayaraq onun azərbaycanlılara qarşı antipatiya hissləri oyandı və nəticədə bu gün Qarabağda baş verən erməni təxribatlarının arxasında onun da barmağının olduğunu söyləyə bilərik”.
R.Rəsulovun qeyd etdiyinə görə, bu adam qanunsuz şəkildə separatçıların ona peşkəş etdiyi üzüm bağlarını şəxsi biznesinə çevirib və separatçılar hansı arzunu diləyirlərsə o da dərhal həmin arzuların həyata keçməsi üçün əlindən gələni əsirgəmir. “Belə olan halda bu kimi olayların qarşısının alınması üçün ciddi addımların atılması zərurəti yaranıb və atılacağına da şübhə yoxdur. İlk növbədə normal, dürüst bir RSK komandanı gətirilərək Volkovu əvəzləməlidir, ardınca isə RSK üçtərəfli bəyanatdakı reallaşdırılmamış bəndləri icra etmək üçün əməli fəaliyyətə keçməlidir.
Xankəndidəki qaz xəttinin partladılması və bu təxribatın bizim üzərimizə atılması cəhdinin də cavabı veriləcək və verilir də. Artıq qeyri-rəsmi məlumatlara görə, Azərbaycan Ordusunun tam nəzarətində olan bu bölgələr birdəfəlik separatçı ünsürlərdən təmizlənəcək və hər hansı kənardan müdaxiləyə imkan verilməyəcək. Qarşıdan yaz ayları gəlir və antiterror əməliyyatlarının keçirilməsi üçün münbit şərait yaranır. Hesab edirəm ki, bu il bizi Qarabağda uğurlu və sevindirici sürprizlər gözləyir”- deyə R.Rəsulov vurğuladı.
İradə SARIYEVA
