Rusiyanın Ukraynaya qarşı hərbi əməliyyatlara başlamasından iki həftə keçir. Baş verənlər onu deməyə əsas verir ki, ölkəni və xalqı fəlakətlərdən, təlatümlərdən sığortalamaq üçün düşünülmüş, praqmatik, ağıllı siyasət yürütmək, qlobal və geosiyasi reallıqları nəzərə almaq zəruridir.
Azərbaycan bu gün də beynəlxalq siyasi arenada baş verənlərə münasibətdə doğru davranış sərgiləyir. Azərbaycan Qoşulmama Hərəkatının fəaliyyətdə olan sədridir və dünyada gedən proseslərə həm də bu statusla üzərinə düşən öhdəliklər kontekstində yanaşır. Bakını heç bir siyasi avantüraya cəlb etmək mümkün deyil. Bütün qərarlar dərin siyasi təhlilə əsaslanır, dövrün reallıqları nəzərə alınır, gələcək üçün real proqnozlar müəyyən edilir, istənilən qərarların qəbulunda milli maraqlar əsas götürülür. Bu gün Azərbaycan həm Türkiyə, həm də Rusiya ilə müttəfiqlik münasibətləri qurmaqla ən çətin dövrdə özünün təhlükəsizliyinə zəmanət alıb. Postsovet məkanında ikinci belə ölkə yoxdur. Azərbaycan Rusiya-Ukrayna müharibəsində hansısa tərəf tutmur. O baxımdan, Azərbaycanın Rusiya-Ukrayna müharibəsinə münasibətdə mövqeyi nə qədər perspektivlidir? Sözügedən müharibədə Azərbaycan hazırkı mövqeyi tutmasaydı, o zaman ölkəmiz hansı çətinliklərlə, problemlərlə üzləşə bilərdi? Belə siyasət, siyasi kurs ölkəmizi nələrdən xilas edir və edəcək?
“... indiki məqamda Azərbaycanın yeritdiyi siyasət doğrudur”
Sözügedən məsələ ilə bağlı fikirlərini “Bakı-Xəbər”lə bölüşən AVCİYA-nın vitse-prezidenti, professor Məhərrəm Zülfüqarlının fikrincə, Ukrayna məsələsində Azərbaycan hansısa tərəfin yanında yer alsaydı, o zaman bu, ölkəmiz üçün pis nəticələnə bilərdi: “Qərbyönümlü ekspertlər Qərb hansı addımı atırsa, onu müdafiə edirlər. Rusiyanı müdafiə edənlər isə Putinə haqq qazandırırlar. Bəyan edirlər ki, NATO-nun Şərqə doğru genişlənməsi doğru addım deyildi. Rusiya-Ukrayna müharibəsində Azərbaycanın mövqeyi diqqəti cəlb edir. Biz Ukraynanın yanında yer alsaydıq, Gürcüstanın gününə düşərdik. İşğaldan azad olunan əraziləri itirə bilərdik. Bu zaman Qərb bizi Gürcüstanı, Ukraynanı dəstəklədiyi qədər dəstəkləməzdi. Yox, Rusiyanın yanında yer alsaydıq, o zaman Qərbin ciddi iqtisadi və siyasi təzyiqi ilə üzləşərdik. Bu mənada indiki məqamda Azərbaycanın yeritdiyi siyasət doğrudur. Biz nəzərə almalıyıq ki, Qarabağda erməni separatçıları hələ də qalmaqdadır və üstəlik, orada Rusiya sülhməramlıları fəaliyyət göstərir. Azərbaycan ötən ilin iyununda “Şuşa bəyannaməsi”ni imzalamaqla Türkiyə ilə müttəfiqlik sazişi bağladı. Fevralın 22-də Rusiya ilə bənzər saziş imzalandı. Bununla biz Rusiyadan gələ biləcək təhdidi neytrallaşdırdıq. Hələ biz onlarla belə bir saziş imzaladığımız halda son günlər Qarabağda erməni təxribatları artıb. Görün belə saziş olmasaydı ermənilər necə fəallaşacaqdılar? O üzdən yeridilən siyasət Rusiyanı nisbətən neytrallaşdırmaq, Azərbaycanı təhlükədən qorumaqla güclü tərəf kimi çıxış etmək məqsədi daşıyır. Düzdür, Ukrayna xalqı qəhrəmandır və Rusiya işğalına qarşı dirənir. Ancaq təkcə bu xilas yolu deyil axı. Günlərdir Zelenski NATO-dan Ukraynanın hava məkanının bağlanmasını tələb edir. Ancaq NATO buna getmir. Çünki ABŞ-ın məqsədi odur ki, müharibə davam etsin, iki xalq bir-birinə düşmən olsun və Rusiya tamamilə zəifləsin. Ona görə də Azərbaycan doğru olaraq kiminsə tərəfini tutmur. Bu da ölkəni çoxşaxəli gələcək təhdidlərdən qoruyur”.
O baxımdan professor hesab edir ki, Rusiya-Ukrayna müharibəsinə münasibətdə Azərbaycan doğru yoldadır.
Vidadi ORDAHALLI
