Marseldəki oyunda azərbaycanlılara qarşı görünməmiş ayrıseçkilik baş verib. Bu barədə Qol.az saytı məlumat yayıb. UEFA Konfrans Liqasının 1/16 final mərhələsinin dünən keçirilən “Marsel” – “Qarabağ” oyununda (3:1) təəccüb doğuran hadisə yaşanıb. Belə ki, 90 dəqiqəlik matçın gedişatı zamanı azərbaycanlı azarkeşlərin yer aldığı tribuna və Azərbaycan Bayrağı yayımı həyata keçirən fransız rejissorları tərəfindən bir dəfə də olsun ekranda göstərilməyib. Bunun əksinə olaraq, erməni azarkeşlərin Ermənistanın bayrağını açdığı tribunanı isə tez-tez görmək mümkün olub.
Qeyd edilənə görə, dinindən, milliyətindən asılı olmayaraq, bütün futbol, o cümlədən digər idman oyunlarında qonaq komandanın azarkeşlərinə hörmət əlaməti olaraq onların yer aldığı tribuna efirdə göstərilir. Sayt yazır ki, amma “Marsel” – “Qarabağ” görüşü zamanı bunu görmək mümkün olmayıb. Əlbəttə, azərbaycanlı və erməni azarkeşlərə münasibətdəki bu görünməmiş ayrıseçkiliyi texniki məsələlərlə əlaqələndirmək çətindir. Burada siyasi məsələlərin rol oynadığını söyləmək mümkündür. Fransa tərəfinin ermənilərin yanında olduğunu bu dəfə futbol oyunları zamanı da görə bildik. Təbii ki, burada məsuliyyət birbaşa olaraq oyunun yayımını həyata keçirən Fransa tərəfinin, konkret olaraq, “Canal+”in üzərində düşür. Bu da sözügedən məlumatda bildirilir.
Ekspertlər deyir ki, Fransa həmişə olduğu kimi yenə də ermənipərəst mövqeyindən çıxış edib. Bütün idman yarışlarında siyasi maraqların önə çəkildiyini deyən ekspertlərin fikrincə, baş verənlər də sırf siyasi məsələdir.
“İdman məsələsində belə öz ermənipərəstliklərini nümayiş etdiriblər”
“Müasir İnkişaf” İctimai Birliyinin rəhbəri, siyasi şərhçi Mübariz Göyüşlü bizimlə söhbətində bildirdi ki, bu, fransızların, Fransanın türklərə, azərbaycanlılara ikili standartlarla yanaşmasının təzahürüdür. “Bilirsiz ki, idmanda, mədəniyyətdə, iqtisadiyyatda, siyasətdə hər zaman böyük dövlətlərin ikili standartlarla yanaşmalarını görmüşük, görürük. Gedişat belə göstərir ki, biz bu ilili standatlı yanaşmaları bundan sonra da görəcəyik. Xüsusən də, Qarabağla bağlı onların ikili standartlarını açıq-aşkar görmüşük, şahidi olmuşuq, indi də görürük. Qarabağa ikili standartlarla yanaşan ölkələrin önündə Fransa gedir. Çox təəssüf ki, Fransanın bu qeyri-obyektiv mövqeyi özünü futbolda da, azarkeşlərə müasibətdə də göstərib. Bu ölkədə azərbaycanlı və erməni azarkeşlərinə, onların əyləşdikləri tribunaya fərqli yanaşır, bizim bayrağı işıqlandırmır, amma Ermənistanın bayrağını, ermənilərin oturduğu tribunanı işıqlandırır. Bunun sadəcə bir rejissor “xətası” olduğunu düşünmürəm, burada siyasi ayrı-seçkilik motivləri özünü daha qabarıq şəkildə göstərir. Bunu bir rejissor “xətası” saymaq olmaz. Futbol məsələsində də Fransa, onun vətəndaşalrı ermənipərəstliklərini büruzə verirlər, bunu aşırı dərəcədə göstərirlər. Bir sözlə, bu ölkə ATƏT-in Minsk qrupunun üzvü kimi Qarabağ münaqişəsində necə ki, qeyri-obyektiv mövqe tutdu, eləcə də futbol məsələsində bu yolu davam etdirir. Bu onu göstərir ki, bu ölkə idmana da siyasi rəng və erməni təəssübkeşli, tərəfkeşliyi qatıb. Çox təəssüf ki, idmanı da siyasətə alət ediblər. Hətta idman məsələsində belə öz ermənipərəstliklərini nümayiş etdiriblər”.
M.Göyüşlü hesab edir ki, Azərbaycan azarkeşlərinin oturduğu tribunanı da, bayrağımızı da ekranda göstərmək bir norma olduğu halda, fransalı rejissor buna da dözümsüz yanaşıb. Azərbaycan azarkeşlərinin və Bayrağının bir neçə dəfə ekranda nümayiş etdirilməməsinin onların ayrıseçkiliyə yol verməsi ilə yanaşı, həm də nə qədər aqressiv olduqlarını göstərdiyini deyən M.Göyüşlünün sözlərinə görə, böyük dövlətlərin bir çoxu özünü ermənipərəst kimi göstərir.
İradə SARIYEVA
