Rusiya prezidenti Vladimir Putin xalqa müraciətində deyib ki, Lenin və onun tərəfdaşları əraziləri Rusiyadan qopararaq müasir Ukraynanı yaratdılar. O, müasir Ukraynanın bütünlüklə kommunist Rusiyası tərəfindən yaradıldığını vurğulayıb:
“Ukraynanı Vladimir İliç Lenin adına Ukrayna adlandırmaq olar, çünki Ukraynanın memarı Lenindir. Ukrayna Rusiya üçün təkcə qonşu ölkə deyil, həm də tarixin bir parçasıdır”.
Putin qeyd edib ki, Rusiya Ukraynaya real dekommunizasiyanın nə demək olduğunu göstərməyə hazırdır:
"Bolşeviklər sözün əsl mənasında Donbassı Ukraynaya birləşdiriblər. Müasir Ukraynanı tamamilə Rusiya, daha doğrusu, bolşevik, kommunist Rusiyası yaradıb. Bu proses, demək olar ki, 1917-ci il inqilabından dərhal sonra başladı və Lenin və onun tərəfdaşları bunu Rusiyanın özünə qarşı çox kobud şəkildə - öz tarixi ərazilərinin bir hissəsini ondan ayıraraq, qoparmaqla etdilər”.
Putin tarixə belə ekskurs edirsə, onda yaxşı olardı ki, çıxışlarından birində müasir Ermənistanın da tarixi Azərbaycan torpaqlarında yaradıldığını qeyd etsin.
Tarix üzrə fəlsəfə doktoru Səyyar Əliyev “Bakı-Xəbər”ə açıqlamasında bildirdi ki, bizim tarixi torpaqlarımız Dağlıq Qarabağ və ətraf bölgələrlə məhdudlaşmır. O qədər də uzaq olmayan tarixə, XIX əsrin statistikasına baxsaq görərik ki, azərbaycanlıların yaşadığı ərazi çox böyük olub. İndiki Ermənistan əslində Azərbaycanın tarixi torpağıdır.
Ermənilərin kütləvi surətdə torpaqlarımıza köçürülməsinə hələ Türkmənçay və Gülüstan müqavilələri imzalandıqdan sonra başlanılıb. Belə ki, İran və Türkiyədən gətirilən erməni ailələri azərbaycanlıları sıxışdırıb qovaraq həmin əraziləri ələ keçiriblər. Daha sonra isə yer adları rəsmi şəkildə dəyişdirilib. Bu bir faktdır ki, təkcə XIX əsrdə imperiya qüvvələrinin dəstəyi ilə 400 mindən artıq erməni başqa ərazilərdən Azərbaycana köçürülüb. Köçürmələrlə artan erməni sayının fərqinə kiçik bir haşiyə çıxaraq nəzər salaq. Hələ 1823-cü ildə çar Rusiyasının hakim dairələri Qarabağda əhalinin siyahıyaalınmasını aparıblar. Məlum olub ki, Qarabağda cəmi 4 366 erməni var ki, bu da ümumi əhalinin sadəcə 11,7 faizini təşkil edir. Həmin dövrdə bu torpaqlarda azərbaycanlı ailələrinin sayı isə 15.729-ə bərabər idi. Bu da əhalinin sayının 88,34 faizi deməkdir. Təbii ki, tarixi təhrif etmək və Azərbaycan torpaqlarının adlarını dəyişdirmək süni surətdə Ermənistanı monoetnik dövlətə çevirmək siyasətinin tərkib hissəsi idi. Ermənilər 1935-ci ildən planlı şəkildə bu adları erməniləşdirərək "Böyük Ermənistan" ideyasının həyata keçirilməsinə çalışıblar.
Tarixi saxtalaşdırmaq niyyətləri ilə ermənilərin dəyişdiyi ilk Azərbaycan torpağı qədim İrəvan olub. Vaxtilə Azərbaycan xanlığı olan İrəvana yiyələnmək niyyəti erməni dövləti yaratmaq ideyası ortaya atıldıqdan sonra daha da kəskinləşib. Təbii ki, dövrün reallığını nəzərə alan Azərbaycan siyasətçiləri tarixi şəraitə uyğun olaraq bir sıra güzəştlərə getməyin zəruriliyini dərk edirdilər. Bu səbəbdən ermənilərin ərazi iddialarını bütünlüklə aradan qaldırmaq məqsədilə İrəvan onlara paytaxt kimi verildi. Bundan sonra İrəvanın adı Yerevan olaraq dəyişdirildi və bütün sənədlərə bu adla daxil edildi. Lakin hadisələrin sonrakı gedişatı, xüsusən Zəngəzurda baş verənlər göstərdi ki, erməni millətçiləri öz məkrli planlarından heç də əl çəkmək niyyətində deyillər. Bundan sonra 1920-ci il dekabrın 1-də Azərbaycanın Zəngəzur mahalının böyük hissəsi Moskva rəhbərliyinin qərarı ilə Ermənistana verildi. Əminəm ki, Putin tarixi yaxşı bilir və bunlardan da məlumatlıdır. Sadəcə, sərf etmədiyi üçün bu həqiqətləri dilə gətirmir”.
Məhəmmədəli QƏRİBLİ
