Son vaxtlar bir sıra Avropa ölkələri ATƏT-in Minsk Qrupunun fəaliyyətinin bərpa edilməsi ilə bağlı çağrışlar edir. Əsasən də bu ölkələrin Ermənistanda olan səfirləri bunu xüsusi olaraq gündəmə gətirirlər. Hətta Qarabağ məsələsində zaman-zaman passiv mövqedən çıxış edən ölkələr belə, həmsədrlərdən danışır.
Çox qəribədir ki, indiyə qədər Qarabağ məsələsində passiv mövqedən çıxış edən İsveç də Minsk Qrupunun tərəfdarı kimi çıxış edir. Baxmayaraq ki, İsveç ATƏT-in Minsk Qrupunun 11 üzvündən biri olsa da, Qarabağ məsələsinin tənzimlənməsində hansısa təşəbbüslə çıxış etməyib.
Bu arada Təhlükəsizlik Şurasının katibi Armen Qriqoryan İsveç Krallığının Ermənistandakı fövqəladə və səlahiyyətli səfiri Patrik Svenson ilə görüşüb. Görüş zamanı bir sıra məsələlərlə bağlı fikir mübadiləsi aparılıb. O cümlədən, tərəflər Dağlıq Qarabağ münaqişəsinin ATƏT-in Minsk Qrupunun həmsədrliyi çərçivəsində uzunmüddətli siyasi yolla həllinin vacibliyini vurğulayıblar.
Yeri gəlmişkən, A.Qriqoryan Finlandiya səfiri ilə də görüşüb. Ancaq Finlandiya səfiri MQ-ni dəstəkləməklə bağlı mövqe sərgiləməyib.
Maraqlıdır, zaman-zaman Qarabağ məsələsində passiv mövqedən çıxış edən ölkələr belə indi niyə Minsk Qrupuna diqqət göstərməyə başlayıb?
“Bu dövlətlər anlamalıdır ki, Minsk Qrupu bundan sonra Qarabağ tənzimlənməsində hansısa vacib rol oynaya bilməz”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin fikrincə, bir sıra Avropa ölkələri məsələnin mahiyyətini dərk etmədən axına qoşulur: “Bax, problem bundadır. Minsk Qrupu 30 ilə yaxın fəaliyyətsizliyi ilə tarix olub. Bunu İsveç rəsmiləri də yaxşı bilir, Avropanın digər siyasiləri də. Ortada ciddi əsaslar var. BMT-nin məlum 4 qətnaməsi ola-ola ATƏT-in Minsk Qrupu səmərəsiz bir performans sərgilədi. Azərbaycan öz gücü ilə həmin qətmamələrin yerinə yetirilməsini təmin etdi. Ötən müddət ərzində bir Avropa ölkəsi belə, Minsk Qrupunun səmərəsiz fəaliyyətinə etiraz etmədi. Məlum 44 günlük müharibənin dayandırılmasında, əsirlərin mübadiləsində, mina xəritələrinin verilməsində, digər humanitar xarakterli işlərin görülməsində Minsk Qrupu hansısa rol oynamadı. Bütün bu işlər ya Rusiyanıın, ya da Avropa İttifaqının vasitəçiliyi ilə həyata keçirilib. Belə olan halda Minsk Qrupu lazımdırmı? Təbii ki, yox. Avropa ölkələri Fransanın, erməni lobbisinin maraqlarından çıxış edərək Minsk Qrupunu diriltmək istəyirlər. İsveç səfirinin ortaya qoyduğu mövqe də bundan irəli gəlir. Bu dövlətlər anlamalıdır ki, Minsk Qrupu bundan sonra Qarabağ tənzimlənməsində hansısa vacib rol oynaya bilməz. Belə olan halda həmsədrlərin vasitəçiliyi ilə heç bir danışıqdan söhbət gedə bilməz. Azərbaycanın təklif etdiyi məsələlər, həyata keçirdiyi çoxşaxəli layihələr regionda sabitliyə xidmət edir. Ona görə də Avropa ölkələri bütün bunlara dəstək verməlidir”.
V.Rəhimzadə onu da qeyd etdi ki, bəzi Avropa ölkələri müharibədən sonra yaranan yeni reallıqları qəbul etməlidir.
Vidadi ORDAHALLI
