Rusiya prezidenti Vladimir Putin Fransa prezidenti Emmanuel Makron və Almaniya kansleri Olaf Şoltsla telefon danışığı aparıb.
Söhbət zamanı Putin deyib ki, “DXR” və “LXR”in müstəqilliyinin tanınması haqqında fərman imzalamağa hazırlaşır.
Avropa İttifaqının xarici işlər və təhlükəsizlik siyasəti üzrə ali nümayəndəsi Josep Borrell Rusiyanı bu addımı atmamağa çağırıb. Ancaq bütün bu səylərə baxmayaraq, Rusiya prezidenti qondarma “DXR” və “LXR”in müstəqilliyinin tanınması barədə fərmanlar imzalayıb.
“Mən bu qərarı verməyi zəruri hesab edirəm. “Donetsk Xalq Respublikası” və “Luqansk Xalq Respublikası”nın müstəqilliyini və suverenliyini dərhal tanıyın”, – o, vətəndaşlara televiziya vasitəsilə müraciətində deyib.
Putin Rusiya Federal Məclisindən bu qərarı dəstəkləməyi, sonra isə hər iki “respublika” ilə dostluq və qarşılıqlı yardım sazişlərini ratifikasiya etməyi xahiş edib.
Bundan sonrakı proseslərin inkişafı necə olacaq?
Aydın Quliyev: “...Rusiyanın atdığı bu addımın acığına Ukraynanın NATO-ya inteqrasiya prosesini sürətləndirəcək”
“Bakı-Xəbər” qəzetinin Baş redaktoru Aydın Quliyev hesab edir ki, hadisələrin bu yöndə gedişi Gürcüstan ssenarisinin həyata keçəcəyi ehtimallarını artırır: “Gürcüstan da birmənalı şəkildə Qərbə doğru inteqrasiya yolunu tutdu, nəticədə Rusiya Gürcüstanın iki ərazi subyektini ondan qopardı. Bundan sonra Qərb Gürcüstanın özünə doğru inteqrasiya yolunu dəstəkləməyə başladı. İndi həmin ssenarını biz Ukrayna ilə bağlı görə bilərik. Gürcüstandan iki ərazinin qoparılması Rusiya ilə Gürcüstan arasında davamlı müharibəyə səbəb olmadığı kimi, ola bilsin ki, Ukrayna ilə bağlı da bənzər hal yaşanacaq. Çünki müharibənin çox risqli bir qərar olduğunu hər iki tərəf başa düşür. Daha çox ehtimal etmək olar ki, Rusiyanın bu qərarından sonra Qərb Rusiya ilə kəskin ritorikanı saxlayacaq. Ukraynaya yardımları gücləndirəcək. Rusiyanın atdığı bu addımın acığına Ukraynanın NATO-ya inteqrasiya prosesini sürətləndirəcək. Hətta mümkündür ki, Ukraynaya NATO-ya qəbulla bağlı fəaliyyət planı təqdim etsin. Məsələnin bu variantda inkişaf edəcəyi daha çox ehtimal edilir. Ən az ehtimal edilən variant isə Ukrayna ilə Rusiya arasında müharibənin ola biləcəyi ilə bağlı söylənənlərdi”.
İlqar Vəlizadə: “Tərəflər müharibəni istəmədikləri üçün danışıqlara cəhd göstərirlər”
Politoloq İlqar Vəlizadə isə hesab edir ki, istənilən halda tərəflər müharibə istəmir: “İşçi qrupu müharibə ssenarilərinin gerçəkləşməməsi üçün danışıqların zərurətini göstərir. Həqiqətən, hərbi-siyasi vəziyyət o həddə çatar ki, müharibə qaçılmaz olar. Tərəflər müharibəni istəmədikləri üçün danışıqlara cəhd göstərirlər. Təəssüflər olsun, son olaylar göstərir ki, danışıqların real vəziyyətə təsiri olmur. O ki qaldı müharibə olacaqmı kimi suallara, bunu konkret heç kim cavablandıra bilməz. Amerikanın ən yüksək rütbəli məmurları, dövlət katibi deyirdi ki, müharibə filan tarixdə başlayacaq. Amma müharibə deyilən tarixdə başlamadı. Bu bəyanatlar daha çox siyasi xarakter daşıyır. Belə siyasi xarakterli mesajlar verilir ki, Putini müharibədən çəkindirsinlər”.
Məhəmmədəli QƏRİBLİ
