Ermənistan Milli Təhlükəsizlik Partiyasının sədri Qarnik İsaqulyan yalan məlumat yaydığı üçün həbs edilib. Bildirilir ki, Qarnik İsaqulyan 2021-ci il sentyarbın 20-də keçirdiyi mətbuat konfransında Ermənistanın Ukraynadakı səfiri barəsində yalan məlumat verib.
O deyib ki, guya səfir Türkiyə və Azərbaycanın xüsusi xidmət orqanları tərəfindən ələ alınıb, habelə 2008-ci ildən sonra bu dövlətlərin uyğun qurumları ilə əməkdaşlıq edib. Partiya sədrinin iddiasına əsasən, guya səfir Azərbaycanın Ukraynadakı səfiri ilə görüşüb. Bu görüşün nəticəsində isə Ermənistanın Baş naziri Batumidə Türkiyə Prezidenti ilə görüşməli imiş. Ermənistanda pensiyaları vermək üçün pul olmadığından, guya Türkiyə Prezidenti ona pul köçürməli imiş. İstintaq nəticəsində müəyyən edilib ki, Qarnik İsaqulyan səfirə böhtan atmaqla ağır cinayət işləyib. Vurğulanıb ki, partiya sədri yalan məlumat yaydığını etiraf edib.
Bir partiya sədri işlətdiyi fikirlərə görə həbs edilib, ancaq heç bir beynəlxalq təşkilat bu barədə etirazını bildirmir. Ancaq biz görmüşük ki, Azərbaycanda xırda bir səs çıxan kimi beynəlxalq qurumlar etiraz bəyanatlarını ard-arda düzür. Partiya sədrinin üzləşdiyi bənzər hadisə Azərbaycanda olsaydı beynəlxalq qurumların reaksiyası necə olardı?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, Ermənistanda mövcud vəziyyətə yanaşmada da ikili standartlar sərgilənir: “Ermənistanda siyasilər etiraf edirlər ki, Nikol Paşinyan hakimiyyətə gəldikdən sonra demokratiya adı altında ölkənin tanınmış siyasi və ictimai xadimlərinə qarşı repressiv vasitələrdən geniş şəkildə istifadə etməklə, onları bir-bir sıradan çıxararaq zərərsizləşdirir. O öz siyasi rəqiblərini bir-bir həbsə atdırır, onlara hədə-qorxu gəlir. Düzdür, bəzilərinə qarşı haqlı olaraq belə addımlar atılır. Amma siyasi motivlərə görə həbsə atılanlar da az deyil. Paşinyanın bu “demokratik yanaşmasına” Qərbin seyrçi mövqeyi isə baş nazirin əl-qolunu daha da açır. Fürsətdən istifadə edən baş nazir gələcəkdə özünə rəqib olacaq istənilən şəxsi korrupsiyaya qarşı mübarizə ittihamı ilə həbs etdirir, özünü xalqın təəssübkeşi kimi göstərərək, rəqiblərini sıradan çıxarır. Ümumiyyətlə, Ermənistanda sosial-iqtisadi vəziyyətin ağırlaşması fonunda müşahidə olunan proseslərdən biri də bu ölkədə insan hüquqlarının, söz və fikir azadlığının qorunması sahəsində mövcud durumun gündən-günə pisləşməsi, demokratik dəyərlərin məhv edilməsidir. Qərb ölkələrinin və bir çox beynəlxalq təşkilatların Ermənistanda baş verənlərə münasibətdə ikili standartlardan çıxış etməsi adıçəkilən ölkənin özündə də ciddi tənqid hədəfinə çevrilib. Guya insan hüquqlarının qorunması ilə məşğul olan, özlərini “azadlıq carçısı” adlandıran beynəlxalq təşkilatlar Ermənistanda baş verən hadisələri təbii qəbul edir. Bu isə, qeyd olunduğu kimi, Ermənistanda belə hiddətlə qarşılanır. Sizi əmin edirəm ki, bənzər hadisə Azərbaycanda baş versəydi, biz çox ciddi beynəlxalq basqılarla üz-üzə olardıq”.
Məhəmmədəli QƏRİBLİ
