Ermənistanda Rusiyaya qarşı istər rəsmi, istərsə də qeyri-rəsmi fəaliyyət müxtəlif formada özünü göstərməkdə davam edir. Belə görünür ki, ermənilər bu siyasəti davam etdirməkdə qərarlıdır.
Ermənistan prezidenti Armen Sarkisyan İl-de-Frans Şurasının sədri Valeri Pekresi və onun rəhbərlik etdiyi nümayəndə heyətinin üzvlərini qəbul edərkən, dolayı da olsa, Rusiyanın bostanına daş atıb. A.Sarkisyan görüş zamanı bəyan edib ki, Ermənistanın əsil dostu Fransadır: “Bu gün Ermənistan üçün çox həssas dövrdür. Epidemiya və müharibədən sonra biz çətinliklər yaşayırıq. Müharibədə məğlubiyyət acıdır, amma bizim vəzifəmiz ləyaqətlə tab gətirə biləcəyimizi göstərməkdir.Və bunda biz dostların köməyini yüksək qiymətləndiririk. Müharibə zamanı biz birdəfəlik əmin olduq ki, bizim əsl dostumuz Fransadır”.
Bununla bir növ Ermənistan rəsmi səviyyədə Rusiya ilə bağlı mövqeyini ortaya qoyur. Yəni Ermənistan Avrasiya İqtisadi İttifaqında və KTMT-də təmsil olunsa da, Rusiyanı özünə dost hesab etmir. O baxımdan bütün bunları ekspertlər necə dəyərləndirir?
“Sarkisyan Kremlə qarşı va-banka gedəcəyini hesab edir və addımının mümkün nəticələrini nəzərə almır”
Sözügedən məsələ ilə bağlı fikirlərini “Bakı-Xəbər”lə bölüşən “Səs” Media Qrupunun rəhbəri, politoloq Bəhruz Quliyevin fikrincə, Ermənistan prezidenti Armen Sarkisyanın Fransanı özünə həqiqi dost kimi gördüyünü bəyan etməsi ilk növbədə ölkəsinin Qərbə olan bağlılığının göstəricisidir: “Eyni zamanda bu, Rusiyanın forpostu rolundan çıxmaq cəhdləri kimi qəbul olunmalıdır. Halbuki, Ermənistan sözdə müstəqil olduğu illərdən başlayaraq Rusiyanın əlaltısı olub. Bütün sosial və iqtisadi dayaqları bilavasitə Kremlin vasitəsilə idarə edilib. Məsələyə daha dəqiq yanaşsaq onu da etiraf etməliyik ki, bu gün xəritədə Ermənistan adlı dövlət mövcuddursa, buna görə Rusiyaya minnətdar olmalıdır. Çünki monoetnik, qonşularına qarşı daim ərazi iddiaları ilə çıxış edən İrəvanın ipi hər zaman Moskvanın əlində olub. Ölkəyə də rəhbərlikləri Rusiyanın təyin elədiyi insanlar həyata keçiriblər. İndi isə Ermənistanın hakim siyasi isteblişmenti Qərb cinahına məxsusdur. Sirr deyil ki, Ermənistan iqtidarını “məxməri inqilab” adı altında hakimiyyətə yiyələndirən də məhz Avropanın Qərb dairələridir. Bu xüsusda, Fransanın adını öndə çəkə bilərik. Məlum olduğu kimi, 44 günlük Vətən müharibəsində Fransa, başda prezident Emmanuel Makron olmaqla, açıq-aşkar Ermənistanın işğalçı siyasətini davam etdirməsinə dəstəyini ifadə edirdi. Əbəs deyil ki, Azərbaycan Prezidenti İlham Əliyev də öz çıxış və bəyanatlarında dəfələrlə bu barədə fikirlərini açıq şəkildə bəyan etdi. Ona görə də A.Sarkisyanın Fransanı Ermənistanın həqiqi dostu kimi qiymətləndirməsinə təəccüb etməyə dəyməz”.
Politoloqun fikrincə, Rusiyanın Ermənistan prezidentinin bu bəyanatna necə reaksiya verəcəyi maraq doğurur: “Çünki Ermənistan bəhs etdiyimiz vasitə ilə rəsmi səviyyədə Rusiya ilə bağlı mövqeyini ortaya qoyur. Halbuki, Ermənistan Aİİ-də və KTMT-də təmsil olunur. Belə davam edərsə, İrəvan naşükürlüyünü, nankorluğunu ifadə edəcəksə, Ermənistanın həmin təşkilatlardan sıxışdırılaraq çıxarılacağını da ehtimal edə bilərik. Yəni Rusiya istədiyi andaca bu vasitəni reallaşdırmaq gücündədir və bu da kimsəyə sirr deyil. Görünür, A.Sarkisyan Kremlə qarşı va-banka gedəcəyini hesab edir və addımının mümkün nəticələrini nəzərə almır. Lakin xatırlayaq ki, Ermənistan ötən ilin yayında və payızında Azərbaycana qarşı da va-banka getmək qərarını verdi və nəticəsi gözlər önündədir. Amma biz Fransanın sona qədər Ermənistanın yanında olub-olmayacağını da bəri başdan deyə bilmərik. Necə ki, Fransa müharibə dövründə sadəcə boş bəyanatlar səsləndirməklə kifayətləndi. Bundan sonra da bənzər bəyanatlarla çıxış edərsə, həmin bəyanatların İrəvana nə qədər müsbət təsirlərinin olub-olmayacağını da indidən ehtimal edə bilərik. Ermənistanın ölkə rəhbərliyi nə qədər anti-Rusiya xarakterli bəyanatlar səsləndirəcəksə, bir o qədər də özünü çıxılmaz vəziyyətə doğru sürükləmiş olacaq. Hətta suverenliyini itirməsi təhlükəsi yaşaya biləcəyini də unutmamalıyıq. Bu gün regionun aparıcı aktorlarından biri də, Türkiyə və Azərbaycanla yanaşı, həm də Rusiyadır və regiondan onminlərlə kilometr uzaqda olan rəsmi Parisin real şəkildə İrəvana əl uzadıb onu düşdüyü böhrandan çıxara biləcəyinə inanmaq çox çətindir”.
Bu baxımdan politoloq hesab edir ki, Ermənistan prezidenti A.Sarkisyan heç də uzaqgörən siyasətçi, yaxud dövlət idarəçisi deyil.
Vidadi ORDAHALLI
